Kiitteeddawanttu Oosuwaa 27

P’awuloosi Roome Beedda

1 Nuuni markkabiyaan S’aaliyaa baanaw k’oppi utteedda wode, P’awuloosanne hara amareeda k’ashetteedda asatuwaa Awugiss’s’oosa wotaadaratuwaa giyaawanttuppe itti Yuuliyoosa giyaa s’eetatuwaa kaappoo aatsiide immeeddino. 2 Iisiyaa gas’aan de’iyaa gadatuwaa biyaa Adiraamis’iyoona markkabiyaan geliide beeddo; Mak’idooniyaa asaa gidiyaa Teselonk’k’e Ariss’s’irokoosi nuunanna de’ee.

3 Wonttisa gallassi nuuni Sidoonaa gakkishshin, Yuuliyoosi P’awuloosaw daroppe Aa, «Ne dabbattuu neena koshshiyaabaa maaddana mala, neeni unttunttukko baanaw danddayaa» yaageedda. 4 Hewaappe denddiide, sintsanna nu bolla c’arkkiyaa diraw, K’op’iroosa haatsaan dooddetteedda sa’aan c’arkkenna bagga beeddo. 5 Kilk’k’iyaa mataaninne P’inifiliyaa matan de’iyaa abbaa pinniide, Lik’iyan de’iyaa Muura gakkeeddo. 6 Hewaan s’eetatuwaa kaappuu S’aaliyaa biyaa Iskkinddiriyaa markkabiyaa demmiide, aan nuuna gelisseedda.

7 Nuuni c’ora wodiyaa loddan biidde, daro metuwaan K’enidoosa katamaa gakkeeddo; hewaanna baanaw nuuna c’arkkuu diggina Salmoonanna aad’d’iide, haatsaan dooddetteedda K’ars’s’eesan c’arkkuwaappe te’ettiidde beeddo. 8 K’aykka daro metuwaan gas’anna gas’anna aad’d’iide, Laasiya katamaa matan de’iyaa abbaa doonaan Markkabii Woppu Giide Shemppiyaa sa’aa geetettiyaasaa yeeddo.

9 Nuuni hewaan c’ora wodiyaa gam"eeddawaappe guyyiyaan, S’oomay biletti diggeedda diraw, markkabiyaan biyaawekka hirggishshin P’awuloosi unttuntta zoriidde, 10 «Asaw, nu buussan wolk’k’aama boshaynne daro bashshay de’anawe taw beettee; bashshay yiyaawe c’aanaa bollanne markkabiyaa bolla s’alalaan gidenna; nu shemppuwaa bollaakka yaanawaa» yaageedda. 11 Shin s’eetatuwaa kaappuu P’awuloosi geeddawaappe aatsiide, markkabiyaan de’iyaawantta azaziyaawenne markkabiyaa goday giyaawaa ammanee. 12 He abbaa mataa katamay balgguwaa shaac’c’anaw unttunttoo miikkenna katamaa; hewaa diraw, c’ora asatuu barenttoo danddayettooppe, Pink’k’e giyaa katamaa gakkiide, balgguwaa yaan shaac’c’ana mala, yaappe denddanaw zoretteeddino; Pink’k’en de’iyaa markkabii shemppiyaa miikko sa’ay doyetteeddawe, away wulliyaasaappenne ushechcha baggappe gidduwaan, k’ay wulliyaasaappenne haddirssappe gidduwaanna.

Abbaa Bollan Gotuu Denddeedda

13 Away kesiyaasaa s’eelliyaa wode ushechcha dugehaa bagga c’arkkuu loddan c’arkkeedda wode, barenttu k’oppeeddawaadan haneeddawaa unttunttoo malatina denddeeddino; markkabii beenna mala oyk’k’iyaa birataa pude dafiide, K’ars’s’eesa matattiide, lank’k’iyaanna aad’d’eeddino. 14 Shin darii gam"ennaan, «Awuraak’iis»*27:14 «Awuraak’iis» Geetettiyaa wolk’k’aama gotuu killi pudehaappe wulahaa bagga c’arkkiyaawaa gidiyaawaa bessee. giyaa daro wolk’k’aama gotuu haatsaa giddon de’iyaa sa’aappe duge unttunttu bolla denddeedda. 15 He gotuu markkabiyaa dechchiide aatsenan diggina, baanaw nuw danddayettennan is’s’eedda diraw, markkabiyaa I afiyaasaa aggiide beeddo.

16 Nuuni K’eeda giyaa haatsaan dooddetteedda c’arkkuwaappe geemmeedda saanna aad’d’iyaa wode, darssi metootiide markkabiyaa wonggiriyaan naagi ashshanaw danddayeeddo. 17 Unttunttu wonggiriyaa pude kesseeddawaappe guyyiyaan, gaadiyaan markkabiyaa s’aas’iide, minisi k’achcheeddino; Sirs’s’isa giyaa shafii kumeedda saan barentta kunddissanenttonne giide hirggiide, markkabiyaa afiyaa sharaa wotsiide, c’arkkuwaan markkabiyaa c’oo yeddi aggeeddino.

18 Gotuu wolk’k’aamiide nu bollan wolk’k’aameedda diraw, wonttisa gallassi c’aanaappe abbaan oluwaa doommeeddino. 19 Heezzentsiyaa gallassikka markkabiyaan de’iyaa miishshaa unttunttu barenttu kushiyan oleeddino. 20 Nuuni daro wodiyaa awaanne s’oolinttiyaa be’ennaan, wolk’k’aama uushuu nu bolla bukkishshin, sintsappe d’ayenaan attokko giide k’oppeeddo.

21 Unttunttu daro wodiyaa k’umaa meennaan gam"eeddawaappe guyyiyaan, P’awuloosi he wode unttunttu giddon denddi ek’k’iide, hawaadan yaageedda; «Asaw, hinttenttu ta zoriyaa akkeeddenttonne K’ars’s’eesappe denddennaan atteeddentto, hawaa mala bayetsaynne k’ohuu nuuna gakkenna. 22 Shin ha"ikka taani hinttentta yayyoppite gaade zoray; ayaw gooppe, ha markkabii bayanaappe attin, hinttenttuppe itti uraa shemppuukka bayenna. 23 Ayaw gooppe, S’oossaa kiitanchchay, taana mooddeedda taani goyinniyaa S’oossaawe, zino k’amma ta matan ek’k’iide, 24 ‹P’awuloosaa, yayyoppa; neeni Roome gadiyaa Kaatiyaa K’eesaara sintsan ek’k’anaw bessee; be’a, S’oossay bare keekatetsaan neenanna biyaa asaa ubbaa shemppuwaa ashshana› yaageedda. 25 Hewaa diraw asaw, yayyoppite. Ayaw gooppe, he kiitanchchay taw odeeddawaadan hananawaa taani S’oossaa ammanay; 26 shin c’arkkuu nuuna itti haatsaan dooddetteedda sa’aan abbaa doonaan dom"issana» yaageedda.

27 Tammanne oyddentso gallassi Meeditiraaniyaa Abbaan nuuna c’arkkuu yaanne haanne sugishshin, markkabiyaan ootsiyaawanttoo k’amma bilahii biittaakko mateeddawaa malateedda. 28 Unttunttu likkiyaa gaadiyaa s’eeraan dees’s’iyaabaa k’achchiide, haatsaan yeggina, haatsay oytamu mitiriyaa c’iimmateeddawaa ereeddino. Guutsaa gam"iidde, laa’entsuwaa yeggiide, hattamu mitiriyaa c’iimmateeddawaa ereeddino. 29 Unttunttu shuchchattiyaasan kunddenna mala yayyiide, markkabii beenna mala oyk’k’iyaa oyddu birataa markkabiyaappe guyyenna abbaan yeggiide, sa’ay wonttana mala, barenttu s’oossatuwaa woossiino. 30 Markkabiyaan ootsiyaawanttu markkabiyaappe kichchanaw koyyiide, markkabii beenna mala oyk’k’iyaa amareeda biratatuwaa markkabiyaappe sintsa baggana abbaan yeggiyaawaa malatiide, wonggiriyaa abbaan wotseedda wode, 31 P’awuloosi s’eetatuwaa kaappuwaanne wotaadaratuwaa, «Hawanttu markkabiyaa giddon de’ana d’ayooppe, hinttenttu attanaw danddaykkita» yaageedda. 32 Hewaappe guyyiyaan, wotaadaratuu wonggirii k’ashetteedda gaadiyaa k’ans’s’iide, yeddi aggeeddino.

33 Sa’ay wonttana hanishin, P’awuloosi ubbay k’umaa maana mala, hawaadan yaagiide woosseedda; «Hinttenttu hachchenna tammanne oyddu gallassaa naageeddita; k’ay he ubbankka k’umaa mibeykkita. 34 Hewaa diraw, guutsa k’umaa hinttenttu maana mala, taani hinttentta woossay; ayaw gooppe, hinttenttu pas’a de’anaw guutsa k’umaa maana koshshee; haray atto hinttenttu huup’iyaa binnanaappe ittuukka bayenna» yaageedda. 35 P’awuloosi hawaa giide, ukitsaa akkiide, ubbaa sintsan S’oossaa galateedda; mentsi Muussaa doommeedda. 36 Hewaappe guyyiyaan ubbay loytsi, barenttoo k’ay k’umaa meeddino. 37 Nuuni markkabiyaan de’iyaawanttu laa"u s’eetanne laappun tammanne usuppuna. 38 Unttunttu miide kaalleedda wode, c’aanaa zarggaa abbaan oliide markkabiyaa dees’uwaa kawushisseeddino.

Markkabiyaa Me’ussaa

39 Sa’ay wontteedda wode, markkabiyaan ootsiyaawanttu gadiyaa eribeykkino; shin haatsay goggiide abbaan geleeddasaa miyyiyaan de’iyaa shafiyaa akeekaan s’eelleeddino. Barenttoo danddayettintto, markkabiyaa he shafiyaakko laagganaw barenttu k’ofaa k’achcheeddino. 40 Yaatiide markkabii beenna mala oyk’k’iyaa biratatuwaa billiide, abbaa giddo yeggeeddino; he wode, markkabiyaa koyyeeddasaa zaariide laaggiyaa mitsaa k’achcheedda gaadiyaa billeeddino; hewaappe guyyiyaan, c’arkkuu markkabiyaa sintsaw sugana mala, markkabiyaa afiyaa sharaa sintsa baggana d’ok’k’u ootsiide, buussaa doommeeddino. 41 Shin markkabii c’iimmuu de’iyaasaappe aad’d’iide haatsaan dooddetteedda sa’aa matan de’iyaa detsasaan dom"etti ek’k’eedda; markkabiyaw guyye baggay beetaa sugetsaan me’erettishshin, sintsa baggay duge d’ishettiide, k’aas’s’ennaan is’s’i aggeedda.

42 Wotaadaratuu k’ashetteedda asaappe ittuunne haatsaa wad’d’iide kessi akkibeenna mala, unttuntta wod’anaw zoretteeddino. 43 Shin s’eetatuwaa kaappuu P’awuloosa ashshanaw koyyiide, wotaadaratuwaa mak’k’uwaa is’s’eedda; haatsaa wad’aa eriyaa ubbay markkabiyaappe haatsaan guppi guppiide kasetiide gas’aa kesana mala azazeedda. 44 Atteeddawanttuppe amareedawanttu sank’k’aan, amareedawanttu k’ay markkabiyaa me’uwaan kesana mala azazeedda; hewaadan ubbatuukka gas’aa sarotetsaan keseeddino.