Atos 2

P’es’iroosa Haasayaa

14 Shin P’es’iroosi, Yesuusi kiitteedda hara tammanne itti kiitettowanttunna denddi ek’k’iide, bare kooshshaa d’ok’k’u ootsiide, unttunttoo hawaadan yaagi odeedda; «Ayihudatoo, k’ay Yerusaalamen de’iyaa ubbatoo, taani odiyaawaa sisite. Hawe hinttenttoo eretto; hinttenttu k’oppiyaawaadan, hawanttu matsottibeykkino. 15 Ayaw gooppe, wonttaappe biro heezzu saate gidee. 16 Shin hawe Nabiyaa Iyu’eel haasayeeddawaa.

17 «I haasayiidde, ‹S’oossay hawaadan yaageedda;

wodiyaa wurssetsaan hawaadan hananawaa.

Taani asaa ubbaa bollan ta Ayaanaa gussana.

Hinttenttu attuma naanaynne hinttenttu mac’c’a naanay

timbbitiyaa odanawantta.

Hinttenttu wodalla naanaykka sas’aa be’anawantta;

hinttenttu c’imatuukka akumuwaa akumettanawantta.✝2:17 Iyu. 2:28-32

18 He gallassatun ta attuma k’oomatuwaa bollaninne

ta mac’c’a k’oomatuwaa bollan

Taani Ta Ayaanaa gussana.

Hewaappe guyye unttunttu timbbitiyaa odanawantta.

19 K’ay Taani bolla saluwaan ooratsabaa,

garssa saankka malaataa bessana.

Suutsay, tamaynne shaariyaadan,

kammeedda c’uway de’ana.

20 Wolk’k’aamanne bonchcho gideedda Godaa gallassay,

gakkanaappe kase away d’umaana;

agenaykka suutsaa malatana.

21 He wode hawaadan hananawaa;

Godaa suntsaa s’eesiyaa ooninne attana›

yaageedda.

22 «Israa’eeliyaa asatoo, ha k’aalaa sisite; Naazireetiyaa Yesuusi hinttenttu giddon S’oossay barenan ootseedda wolk’k’aama oosuwaan, ooratsabaaninne malaatan hinttenttoo d’iishisseedda asaa; hewaa hinttenttukka eriita. 23 Yesuusi hinttenttoo imettana mala, S’oossay kase bare sheniyaaninne bare eraan bare k’ofaa k’achchi wotseedda; yaatina, Aa hinttenttu nagaranchchatuwaa kushiyan mask’k’aliyaa bolla misimaariyan d’ishissiide, kak’issi wod’iseeddita. 24 Shin hayk’uu Yesuusa oyk’k’anaw danddayibeenna diraw, S’oossay hayk’uwaa seelaa aappe d’ayissiide, Aa dentseedda. 25 Ayaw gooppe, Daawite Yesuusabaa hawaadan yaageedda;

« ‹Taani metootennaadan,

Goday ta ushechchaan de’iyaa diraw,

taani ubbaa wode Godaa ta matan be’ay.✝2:25 Maz. 16:8-11

26 Hewaa diraw, ta wozanay nashetteedda;

ta ins’s’arssankka nashechchay kumeedda.

K’ay ta bollaykka lo"o de’ana giide,

nashechchaan naagee.

27 Ayaw gooppe, ta shemppuwaa,

Si’ooliyaan aggakka.

K’ay ne Geeshsha Na’aa anhaakka wook’etsakka.

28 Neeni taana de’uwaa ogiyaa erissaadda.

Neeni taananna de’iyaawaan,

taani darii nashettay›

yaageedda.

29 «Ishatoo, nu aawotuwaa kaappuwaa Daawitebaa taani hinttenttoo geeshshaade odanaw bessee; Daawite hayk’k’iide moogetteedda; Aa duufuu hachche gakkanawukka nu matan de’ee. 30 Daawite Nabiyaa gideedda dirawunne S’oossay Aa naanaa zeretsaappe ittuwaa Aa kawutetsaa oydiyaan utissanaw aw c’aak’k’eeddawaa ereedda diraw,✝2:30 Maz. 132:11; 2 Sam. 7:12-13 31 Kiristtoosa dendduwaa sintsaw s’eelliide, ‹Aa shemppuu Si’ooliyaan attibeena; Aa bollaykka wook’k’ibeenna› giide odeedda.

32 «S’oossay Yesuusa hayk’uwaappe dentseeddawoo nuuni ubbay markka. 33 Hewaa diraw, S’oossay bareppe ushechcha baggan*2:33 Ushechcha bagga: Guussay bonchchuwaanne wolk’k’aa bessiyaa sa’aa. Aa d’ok’k’u d’ok’k’u ootsiide, aw Geeshsha Ayaanaa immana geeddawaadan, Geeshsha Ayaanaa akkiide, hawaa hinttenttu ha"i be’iyaawaanne sisiyaawaa nu bolla gusseedda.

34,35 «Ayaw gooppe, Daawite bare huup’ew saluwaa kesibeenna; shin yaageedda;

« ‹Goday ta Godaa; «Taani ne morkkatuwaa,

neeni gediyaan yed’d’a ek’k’iyaawaa ootsana gakkanaw

hawaan taappe ushechcha baggana utta» geedda›

yaageedda.✝2:34-35 Maz. 110:1

36 «Hewaa diraw, S’oossay mask’k’aliyaa bolla misimaariyan ha hinttenttu d’ishiide kak’k’eedda Yesuusa Godanne Kiristtoosa ootseeddawaa Israa’eeliyaa asaa zeretsay ubbay tumuppe ero» yaageedda.

37 Asay P’es’iroosi geeddawaa siseedda wode, asaw wozanay daroppe boshettina, P’es’iroosanne Yesuusi kiitteedda haratuwaa, «Nu ishatoo, yaatina nuuni ayaa udanee?» yaageeddino.

38 P’es’iroosi unttuntta, «Hinttenttu nagaray atto geetettana mala, nagaraappe simmiide, hinttenttu huup’iyaan huup’iyaan Yesuusi Kiristtoosa suntsan s’ammak’ettite. S’oossay immiyaa Geeshsha Ayaanaa hinttenttu akkana. 39 Ayaw gooppe, S’oossay immana geedda k’aalay hinttenttussa, hinttenttu naanatuwaassanne Goday nu S’oossay barekko s’eesiyaa haakuwaan de’iyaawanttu ubbaassa» yaageedda.

40 P’es’iroosi unttunttoo k’aalaa haraakka gujji markkattiide, «Ha wodiyaa geella asaappe hinttenttu huup’iyaa ashshite» yaagiide zoreedda. 41 P’es’iroosi odeeddawaa akkeeddawanttu s’ammak’etteeddino; he gallassi heezzu sha"a gidiyaa Asay ammaneeddino.