Kiitteeddawanttu Oosuwaa 4

P’es’iroossinne Yohaannisi Ayihudatuwaa Shanggatuwaa Sintsa Shiik’eeddino

1 P’es’iroossinne Yohaannisi asaw odishin, k’eesatuwaa kaappatuu, Geeshsha Golliyaa wotaadaratuwaa azaziyaawenne Saduk’aawanatuu, 2 unttunttu asaa tamaarissiyaa dirawunne hara asatuu hayk’uwaappe denddanawoo markka gidana mala, Yesuusi hayk’uwaappe denddeeddawaa odeedda diraw, darii yilotiide, unttunttukko yeeddino. 3 Unttuntta oyk’k’iide, sa’ay omarssidiggo diraw wonttanaw k’asho golle gelisseeddino.