1 Saa’ooli Iss’s’ifaanoose hayk’uu lo"a gi akkeedda. He gallassi Yerusaalamen de’iyaa ammaniyaawanttu bolla wolk’k’aama yederssuu denddeedda; Yesuusi kiitteeddawanttuppe attin, ammaniyaawanttu ubbatuu Yihudaa gadiyaaninne Sammaariyaa gadiyaan laaletteeddino. 2 S’oossaa asatuu Iss’s’ifaanoosa moogeeddino; k’ay aw daro yeekkeeddino. 3 Shin Saa’ooli ammaniyaa asaa d’ayissanaw baas’etee; ubbaa golliyaa geli geliide, attuma asaanne mac’c’a asaa goochchi goochchiide, k’asho golle yeddee.

4 Laaletteedda ammaniyaawanttu k’aalaa odiidde, ubbasaa beeddino. 5 Pilip’p’oosi Sammaariyaa katamaa wod’d’iide, Kiristtoosabaa asaw odeedda. 6 C’ora Asay Pilip’p’oosi geeddawaa darssi akeekiide siseedda; I ootsiyaa malaataakka be’eedda. 7 Ayaw gooppe, iita ayyaanatuu kooshshaa d’ok’k’u ootsi haasayiidde, c’ora asaappe keseeddino; k’ay c’ora sileeddawanttunne wobbatuu pas’eeddino. 8 He katamaan Asay daro nashetteedda.

9 Shin Simoona geetettiyaa itti bitanii kase, barena wolk’k’aama gi kaayiid, Sammaariyaa asaa, «Laa hawe aybe ooratsabee» giissiidde he katamaan de’eedda. 10 Guutsatetsaappe doommiide, woggatetsaa gakkanaw, Asay ubbay, «S’oossaa wolk’k’ay daro wolk’k’aamay hawaa» giide aabaa sisee. 11 Daro wodiyaappe doommiide, kaayuwaan Sammaariyaa asaa «Laa hawe ayba ooratsabee» giisseedda diraw, Asay aabaa sisee. 12 Shin Pilip’p’oosi S’oossaa kawutetsaabaanne Yesuusi Kiristtoosa suntsaabaa attumawanttoonne mac’c’awanttoo mishiraachchuwaa odiidde, unttunttu aabaa ammaniide s’ammak’etteeddino. 13 K’ay Simoonikka bare huup’ew ammaniide s’ammak’etteeddawaappe guyyiyaan, Pilip’p’oosanna ittippe de’iidde, oosettiyaa malaataanne S’oossay ootseedda wolk’k’aama malaataa be’iide maalaletteedda.

14 Yesuusi kiitteedda Yerusaalamen de’iyaawanttu, Sammaariyaa Asay S’oossaa k’aalaa akkeeddawaa siseedda wode, P’es’iroosanne Yohaannisa unttunttukko yeddeeddino. 15 P’es’iroossinne Yohaannisi wod’d’iide, ammaniyaawanttu Geeshsha Ayaanaa akkana mala, unttunttoo S’oossaa woosseeddino; 16 ayaw gooppe, Sammaariyaa asatuu Godaa Yesuusa suntsan s’ink’k’ataa s’alalaa s’ammak’etteeddawaappe attin, unttunttuppe ittuwaa bollaninne Geeshsha Ayyaanay wod’d’ibeenna. 17 He wode P’es’iroossinne Yohaannisi barenttu kushiyaa unttunttu bolla wotsowaappe guyyiyaan unttunttu Geeshsha Ayaanaa akkeeddino.

18 Yesuusi kiitteeddawanttu barenttu kushiyaa unttunttu bolla wotsina, unttunttoo Geeshsha Ayyaanay imetteeddawaa Simooni be’eedda wode, P’es’iroosassinne Yohaannisaw miishshaa ahiide, 19 «Taanikka ta kushiyaa wotsiyaa ubbay Geeshsha Ayaanaa akkana mala, ha maataa tawukka immeerikkitee» yaageedda.

20 Shin P’es’iroosi aw hawaadan yaageedda; «Neeni S’oossaa imotaa miishshaan shammanaw k’oppeedda diraw, ne miishshay neenanna c’oo d’ayo. 21 Ne wozanay S’oossaa sintsan suure gidenna diraw, new hawaan gishuu baawa. 22 Yaatowaappe guyyiyaan ha ne wozanaa iita k’ofaa diraw, nagaraappe simma; ooni eri ne wozanaan de’iyaa iita k’ofaa S’oossay atto gaanenttonne S’oossaa woossa. 23 Ayaw gooppe, neeni daro k’anaatiyaa oyk’k’aade nagaraa k’ashuwaan de’iyaawaa taani be’ay» yaageedda.

24 Hewaappe guyye Simooni P’es’iroosassinne Yohaannisaw zaariide, «Hinttenttu geeddawaappe ittibaynne taana gakkenna mala, hintte taw S’oossaa woossite» yaageedda.

25 P’es’iroossinne Yohaannisi markkatteeddawaappenne Godaa k’aalaa odeeddawaappe guyyiyaan, guyye Yerusaalame simmeeddino; yaatiide Sammaariyaan de’iyaa daro k’eeri katamatuwaan mishiraachchuwaa k’aalaa odeeddino.

26 Godaa kiitanchchay Pilip’p’oosa, «Denddaade Yerusaalameppe Gaaza afiyaa asi baynna mela sa’aa ogiyaakko ba; he ogii away kesiyaasaa s’eelliyaa wode ushechcha dugehaa baggana de’ee» yaageedda. 27 Pilip’p’oosi denddiide beedda. Hinddekko geetettiyaa Top’p’iyaa kaatattiw biittaa mooddiyaa I miishshaa ubbaakka naagiyaa Top’p’iyaa asaa gideedda itti shuufay de’iyaawe goyinnanaw Yerusaalame beedda. 28 Paray goochchiyaa gaariyaan uttiide, Yerusaalameppe guyye simmiide, nabiyaa Isiyaasa mas’aafaa nabbabee.

29 Geeshsha Ayyaanay Pilip’p’oosa, «He gaariyaakko shiik’aade ittippe gida» yaageedda.

30 Pilip’p’oosi wos’s’i yiide, nabiyaa Isiyaasa mas’aafaa shuufay nabbabishshin sisiide Aa, «Neeni nabbabiyaawaa akeekay?» yaageedda.

31 Shuufay, «Taw odiide akeekissiyaa Asay baynnaan waaniide akeekettii?» yaageedda; k’ay barenanna gaariyaan kesiide uttana mala, Pilip’p’oosa woosseedda. 32 Shuufay nabbabiyaa mas’aafay,

«Dorssaadan I shukettanaw laagettee.

Dorssaa maray bare isikiyaa

k’ans’s’iyaawaa sintsan c’o"u giyaawaadan,

ikka bare doonaa pokibeenna.

33 I kawusheeddawaadan aw s’illo pirdday d’ayeedda.

Yesuusa de’uu ha sa’aappe pude aketti diggeedda diraw,

Aa zariyaabaa oonee odanawe?»

yaageedda.✝

34 Shuufay zaariide Pilip’p’oosaw, «Nabii hawaa oowaa odii? Barebaa odiyee woy hara asaabaa odii? Taw odaarikkii» yaageedda. 35 Pilip’p’oosi zaariide, S’oossaa mas’aafaa I nabbabiyaasaappe doommiide, Yesuusabaa mishiraachchuwaa k’aalaa aw odeedda.

36 Unttunttu ogiyaa oyk’k’i biidde, haatsay de’iyaasaa gakkeeddino; shuufay, «Haatsaa hawaa be’a; s’ammak’ettiyaawaa taana diggiyaawe ayee?» yaageedda.

37 Pilip’p’oosi Aa, «Neeni ne kumentsaa wozanaappe ammanooppe, danddayaa» yaageedda.

I zaariide, «Yesuusi Kiristtoosi S’oossaa Na’aa gidiyaawaa taani ammanay» yaageedda.

38 Gaari ek’k’ana mala shuufay azazina, inne Pilip’p’oosi laa"atuu duge wod’d’iide, haatsaan gelina Pilip’p’oosi Aa s’ammak’eedda. 39 Unttunttu haatsaappe gas’aa keseedda wode, Godaa Ayyaanay Pilip’p’oosa lip’p’i ootsiide, afi aggeedda; laa’entsuwaa shuufay Pilip’p’oosa be’ibeenna; shin bare ogiyaa nashettiide beedda. 40 Pilip’p’oosi bare huup’ew Azos’s’oosan de’iyaawaa ereedda; k’ay K’iisaariyaa yaana gakkanawukka, katamaa ubbaan yuuyyiidde mishiraachchuwaa k’aalaa odee.