1 Shin Saa’ooli Godaa kaalliyaawantta wod’anaw manddiide, k’eesatuwaa ubbatuwaa kaappuwaakko beedda. 2 Yaatiide Godaa ogiyaa kaalliyaa asatuwaa mac’c’awanttanne attumawantta demmooppe, k’achchiide Yerusaalame ahanaw, Damask’k’on de’iyaa Ayihuda woosa golletoo dabddaabbiyaa s’aafanaw Aa woosseedda.

3 I biidde, Damask’k’o katamaa gakkana matoode, k’oppennaan saluwaappe wolk’k’aama poo’uu Aa yuushshuwaa ubbaan poo’eedda. 4 Saa’ooli sa’aan kunddi uttina, «Saa’oolaa Saa’oolaa, ayaw Taana waayissay?» giyaa k’aalaa siseedda.

5 Saa’ooli, «Ta Godaw, neeni oonee?» yaagiide oochcheedda.

Yesuusikka, «Taani neeni yederssaadde de’iyaa Yesuusa» yaageedda.

6 Shin Saa’ooli kokkoriiddinne maalalettiidde, «Ta Godaw, taani ayaa ootsanaadan koyyay?» yaageedda.

Goday Aa, «Denddaade katamaa gela; neeni ootsanaw bessiyaabay new yaan odettanawaa» yaageedda.

7 Saa’oolanna ogiyaan biyaa asatuu ayinne haasayennan ek’k’i aggiide, kooshshaa sisiino; shin oonanne be’ibeykkino. 8 Saa’ooli sa’aappe denddina, Aa ayfii doyetteedda wode, ayinne s’eellanaw danddayibeenna; hewaa diraw, unttunttu Aa kushiyaa oyk’k’i goochchiide, Damask’k’o gelisseeddino. 9 Heezzu gallassaa gakkanawukka I s’eellibeenna; ayinne mibeenna; ayaanneekka ushibeenna.

10 Damask’k’on itti Hanaaniyaa giyaa kaalliyaawe de’ee; Goday sas’aan Aa, «Hanaanew» yaageedda.

Hanaanii, «Ta Godaw, hawaan de’ay» yaageedda.

11 Goday Aa, «Denddaade Suure geetettiyaa ogiyaa baade, Yihudaa soyin itti Saa’oola giyaa S’ersseeseppe yeedda bitaniyaa koya; ayaw gooppe, I woossee. 12 K’ay Hanaaniyaa giyaa bitanii geliide, Saa’ooli laa’entsuwaa s’eelanaadan, bare kushiyaa Aa bolla wotsiyaawaa sas’aan be’eedda» yaageedda.

13 Hanaanii zaariide, «Ta Godaw, Yerusaalamen ne geeshsha asaa bolla he bitanii ay keena iitabaa ootseeddentto, taani daro asaappe sisaad. 14 K’ay Damask’k’on ne suntsaa s’eesiyaawantta ubbaa k’achchanaw, k’eesatuwaa kaappatuu aw maataa immeeddino» yaageedda.

15 Shin Goday Aa, «Saa’ooli Ayihuda gidenna asaa sintsan, kaatatuwaa sintsaaninne Israa’eeliyaa asaa sintsan, Ta suntsaa erissanawunne Taw ootsanaadan dooretteedda miishshaa gidiyaa diraw, neeni ba. 16 Ayaw gooppe, Ta suntsaa diraw, I ay keenaa waayettanaw bessintto, Taani Aa bessana» yaageedda.

17 Hanaanii biide, soy geliide, bare kushiyaa Saa’oola bolla wotsiide, «Ta ishaw Saa’oolaa, neeni yiyaa ogiyaan new beetteedda Yesuusi, neeni s’eelana malanne Geeshsha Ayyaanay neenan kumana mala, taana kiitteedda» yaageedda. 18 Ellekka, ayentto pok’uwaa malay Saa’oola ayfiyaappe wod’d’ina, Saa’ooli laa’entsuwaa s’eelleedda; k’ay denddiide s’ammak’etteedda. 19 K’umaa miide minetti, Damask’k’on de’iyaa kaalliyaawanttunna amareeda gallassaa gam"eedda.

20 Ellekka, «Yesuusi Kiristtoosi S’oossaa Na’aa» yaagiide, Ayihuda woosa golletuwaan k’aalaa odeedda.

21 Hewaa siseedda ubbay maalalettiide, «Hawe Yerusaalamen Yesuusa suntsaa s’eesiyaawantta d’ayissiyaawaa gidennee? K’ay unttuntta k’achchiide, k’eesatuwaa kaappatuwaa sintsa afanaw yibeenneeyye?» yaageeddino.

22 Shin Saa’ooli k’aalaa odiyaa oduu min min beedda; Yesuusi k’ay Kiristtoosa gidiyaawaakka I akeekissiide odeedda diraw, Damask’k’on de’iyaa Ayihudatuu aw zaariyaawaa d’ayeeddino.

23 C’ora gallassaappe guyyiyaan, Ayihudatuu shiik’iide, Saa’oola wod’anaw zoretteeddino. 24 Shin Ayihudatuu barena wod’anaw k’oppowaa Saa’ooli siseedda; unttunttu Aa wod’anaw k’ammanne gallassi katamaa penggiyaa naagiino. 25 Shin kaalliyaawantta Aa k’amma afiide, dirssaa huup’iyaanna k’un"aan duge wotseeddino.

26 Saa’ooli Yerusaalame gakkeedda wode, kaalliyaawanttunna ittippe gakettanaw shiik’i be’eedda; shin kaalliyaawaa I gideeddawaa ubbay ammanennaan is’s’iide, aw yayyeeddino. 27 Shin Barnaabaasi Saa’oola Yesuusi kiitteeddawanttukko afeedda; ogiyaan Godaa I waaniide be’eeddentto, aw Goday wooti haasayeeddenttonne k’ay Saa’ooli Damask’k’on Yesuusa suntsan yayyenaan wooti k’aalaa odeeddentto, unttunttoo geeshshiide odeedda. 28 Saa’ooli Yerusaalamen yuuyyiiddenne Godaa Yesuusa suntsan yayyenaan k’aalaa odiidde, Yesuusi kiitteeddawanttunna ittippe de’eedda. 29 K’ay Saa’ooli Giriike k’aalaa haasayiyaa Ayihudatuwaana haasayeenne palumettee; shin unttunttu Aa wod’anaw koyyeeddino. 30 Ishatuu hewaa sisiide, Saa’oola duge K’iisaariyaa afiide, S’ersseese yeddeeddino.

31 Yihudaan, Galiilaaninne Sammaariyaan ubbaan de’iyaa ammaniyaa asatuu sarotetsaan de’eeddino; k’ay minneeddino; Godaw yayyiyaawaaninne Geeshsha Ayaanaa maaduwaan geemettiidde, payduwaankka dari dari beeddino.

32 P’es’iroosi ubba saan yuuyyiidde, Liidaan de’iyaa geeshsha asatuwaakko k’ay wod’d’eedda. 33 Yaatiide hewaan hosppun laytsaa siliide, arssaan gisiide de’iyaa itti Eeniyaa giyaa bitaniyaa demmeedda. 34 P’es’iroosi Eeniyaa, «Eenaw, Yesuusi Kiristtoosi neena patsee; denddaade ne hiis’aa yegga»* yaageedda. Hewaappe guyye ellekka denddi ek’k’eedda. 35 Liidaaninne Saaroonan de’iyaa Asay ubbay Eeniyaa be’iide, Godaakko simmeeddino.

36 Yoop’p’e katamaan itti S’aabbito geetettiyaa ammanewunna de’aw; S’aabbito guussay Giriike k’aalaan Dork’k’o giyaawaa. Iza bare de’eedda wodiyaa ubbaan lo"obaa ootsaaddenne hiyyeesaa maaddaadde de’aw. 37 He wode iza harggaade hayk’k’ina, Asay izi anhaa meec’c’iide, poo’iyaa pude kessiide gisisseedda. 38 Liiday Yoop’p’ew mata; kaalliyaawanttu P’es’iroosi Liidiyaan de’iyaawaa Yoop’p’en sisiide, «Hayyanaa nuukko ellekka yaarikkii» yaagiyaa kiitaa laa"u asatuwaa bolla aakko kiitteeddino.

39 Hewaappe guyye P’es’iroosi denddiide, unttunttunna bi gakkina, pook’iyaa pude Aa kessiide, kifiliyaa gelisseeddino. Asini baynna am"e mac’c’awanttu ubbay yeekkiiddenne Dork’k’a unttunttunna de’iyaa wode ootseedda k’amishatuwaanne mayatuwaa ubbaa P’es’iroosa bessiidde, Aa yuushshuwaan yuuyyi aad’d’iide ek’k’eeddino. 40 P’es’iroosi unttuntta ubbaa kare kessiide, gulbbati S’oossaa woosseedda; k’ay anhaakko simmiide, «S’aabbitee, dendda» yaageedda; S’aabbitakka bare ayfiyaa dooya P’es’iroosa be’aade, d’ok’k’a uttaaddu. 41 P’es’iroosi izo bare kushiyan maaddiide, dentsi esseedda; hewaappe guyyiyaan, ammaniyaawanttanne asini baynna am"e mac’c’awantta s’eesiide, pas’eeddawunno unttunttoo immeedda.

42 Ha yewuu Yoop’p’e katamaa ubbaan laalettina c’ora Asay Godaa ammaneeddino. 43 P’es’iroosi Yoop’p’en itti Simoona giyaa galbbaa k’aac’iyaawaanna daro wodiyaa gam"eedda.