Eclesiastes 2

Barena Nashechchiyaawekka Hada

1 Taani ta wozanaan, «Ane taw wolk’k’aama nashshechchaa immiyaawe ayentto, k’ay de’iyaa de’uwaa giddonkka lo"obay ayentto be’ana» yaagaade k’oppaad; shin hewekka mela. 2 Ubbaa gede miic’c’iyaawe eeyyatetsaa gidiyaawaa, k’ay daro nashechchaykka ayinne go"ennabaa gidiyaawaa akeekaad. 3 Hewe hewaa gidi utti de’ishshin, aad’d’eeda eratetsaa demmanaw amottaade, ta wozanaa woyniyaa eessan nashshechchaade, hewaa suganaw eeyyatetsan k’ofaa k’achchaad. K’ay Asay ha sa’aa bolla barew de’iyaa k’antsa wodiyaa aatsiyaa, ubbaappe aad’d’iyaa lo"o ogiikka hawaa gaade k’oppaad.

4 K’ay hara itti wolk’k’aamabaa ootsaad; taw de’iyaa keetsatuwaa kees’s’aad; woyniyaa turaakka tokkaad.✝2:4-8 1 Kat. 10:23-27; 2 Od. 9:22-27 5 Dumma dumma ataakilttiyaanne ayifiyaa ayifiyaa mitsatuwaa tokkiyaa sa’aanne Asay shemppiyaa sa’aa gannatiyaadan loytsaade giigissaaddi. He sa’aan dumma dumma ayifiyaa ayifiyaa mitsatuwaakka tokkaade, dichchaad. 6 He dic’c’iyaa mitsatuwaa ushshanaw, haatsaa dagayiyaa sa’aa zeeraade giigissaaddi. 7 Attumanne mac’c’a ayiletuwaa shammaad; k’ay ta son yeletteedda hara ayiletuukka taw de’iino. Taappe kase Yerusaalamen de’eedda oowaappenne dariyaa mehiyaa, deeshshaanne dorssaa wudiyaa haaraad.✝2:7 1 Kat. 4:23 8 Taani mooddiyaa dumma dumma biittatuwaappe bonchchetteedda kaate golliyaa duretaa ayissaade, daro work’k’aanne biraa taw dagayaad. K’ay, taana sabbiide yes’s’iyaa attumanne mac’c’a yetsanchchatuwaa k’as’araad; hewaa bollakka, asaw nashshechchaa immiyaa loytsi daro mac’c’a asaakka shiishshaad.✝2:8 1 Kat. 10:10, 14-22

9 Hewaa diraw, taani taappe kase Yerusaalamen de’eedda ooppenne aad’d’eeda wolk’k’aama asaa gidaaddi. Ta aad’d’eeda eratetsaykka taananna wurssetsay gakkanaw de’eedda.✝2:9 1 Od. 29:25 10 Ta ayifii s’eelleeddabaanne ta wozanay amotteeddabaa ubbaa demmaad; ta asatetsay koyiyaa nashshechchaa ubbaakka diggabeykke. Taani ootseedda oosuwaa ubbaan nashetay; ta daaburaw wod’iikka hewaa. 11 Gido shin, hewaa ubbaa ootsa simmaade taani akeekiyaa wode, loytsi taani aw daabureeddawe ubbaykka mela gidiyaawaa be’aad. Saluwaa gufantsan go"iyaawe ayaynne baawa; ubbaykka c’arkkuwaa oyk’k’anaw yederssiyaabaa mala.

Eranchchay Bare De’uwaappe Demmeedda Eraa

12 Hewaappe guyyiyaan, taani aad’d’eeda eratetsay, eeyyatetsaynne gooshshay ayentto paac’c’aade eranaw k’ofaa doommaad. Kaatiyaa kotaan kaatetiyaa hara kaatii kase oosetteeddawaappe aad’d’iyaa harabaa ay ootsanee? 13 Taani hawaadan yaagaad; «Tumukka poo’uu d’umaappe keekiyaawaadan, aad’d’eeda eratetsay eeyyatetsaappe keekee. 14 C’inc’c’a asatuu barenttu denddiyaa sa’aanne biide gakkiyaa sa’aa eriino; shin eeyyatuu hewaa ubbaa erikkino» yaagaad. Gidoppe attina, unttunttu laa"uwaa wurssetsaykka ittuwaa.

15 Taani ta wozanaan, «Eeyyaa gakkiyaa kaac’ay taanakka gakkee; yaatina, taani aad’d’eeda eranchcha gidiyaawe taana ayaa maaddii?» yaagaade k’oppaad. K’ay taani ta wozanaan, «Hawe ubbabaykka mela!» yaagaad. 16 Ayaw gooppe, eeyyina aad’d’eeda eranchcha gidina, hayk’k’uwaappe hefintsan simmiide, Aa hassayiyaawe baawa; sintsappe yiyaa laytsatuwaan nuuni ubbaykka dogetti attana. Eeyyay hayk’k’iyaawaadan, aad’d’eeda eranchchaykka hayk’k’ee.

Ootsi Daaburiyaawekka Hada

17 Metuwaappe attina, go"iyaawe bayinna diraw, ha sa’aa de’uu taana iiteedda. Hewekka mela; c’arkkuwaa oyk’k’anaw yederssiyaabaa mala. 18 Saluwaa gufantsan taani loytsi daaburaade demmeedda ta mas’uwaa ubbaa taappe guyyiyaan yiyaa uraw yeggaade biyaa diraw, taani daabureeddawe ubbay taana iiteedda. 19 Taappe guyyiyaan yiyaa bitanii aad’d’eeda eranchchentto eeyentto ooni erii? Shin I oona gidinakka, taani loytsi daabureeddawaanne ta c’inc’c’atetsan taani demmeeddawaa ubbaa barew akkiide, goda gidanawaa; yaatooppe, hewekka mela.

20 Hewaa diraw, saluwaa gufantsan hawaa keeshshaa ayaw daaburaaditaashsha gaade ta wozanaan kayyotaad. 21 Asi bare de’eedda laytsan barew de’eedda aad’d’eeda eratetsan, eraaninne hiillan daaburiide demmeeddawaa ubbaa ayinne daaburibeennawoo yeggiide bee. Hewekka k’ay, hadanne likke gidennawaa. 22 Yaatina, saluwaa gufantsan Asay loytsi daaburiide ootseeddawaappe ubbaappe ayaa go"aa demmeeddee? 23 I bare de’uwaa laytsan daaburiyaa daaburay ubbay kayyottooppenne kayyoppe harabaa ayinne aw gujjenna; haray atto k’ammakka Aa huup’ii k’ofaappe shemppenna; gido shin, he ubbaykka mela.✝2:23 Yob. 5:7; 14:1

24 Hewaa diraw, asaw go"aa gidiyaawe ayee gooppe, Asay bare daabureeddabaappe miiddinne ushiide nashettiyaawaa. He nashechchaykka k’ay S’oossaa kushiyaappe imetteeddawaa gidiyaawaa taani akeekaad.✝2:24 Era. 3:13; 5:18; 9:7; Luk'. 12:19; 1 K’or. 15:32 25 Ayaw gooppe, Aa shene gidanawaa d’ayooppe, min ushshinakka asaw nashechchay hak’an beettii? 26 S’oossaa nashechchiyaa uraw S’oossay c’inc’c’atetsaa, eratetsaanne nashshechchaa immee; nagaranchchaw mata I daaburiide shiishshanaadan, daaburaa immee; shin I shiishsheeddawaa S’oossay akkiide, barew yayyiyaawoo haraw immee. Hewaa diraw, ha ubbaykka hadanne c’arkkuwaa oyk’k’anaw yederssiyaabaa mala.✝2:26 Yob. 32:8; Lem. 2:6