Eranchchaa 6

1 Saluwaa gufantsan asaa bolla gakkiyaa loytsi iitabaa taani be’aad. 2 S’oossay asaw mas’uwaa, duretetsaanne bonchchuwaa ubbaa immee; aw koshshiyaabaappe ayaanne pac’issenna. Shin, aw imetteedda mas’uunne duretetsaa ubbaan keetsaw nashettana mala, kumentsaa sheniyaa aw immenna. Hewaa s’alalaakka gidenna; I daaburiide demmeeddawaan hara daaburibeennawe nashshettanaadan ootsee. Hewekka hadanne loytsi kayyottiyaa iitabaa.

3 Itti Asay s’eetu naanatuwaa gakkanaw yeliide, adussa laytsaa de’iide ec’anaw danddayee; shin I barew imetteeddawaan nashettiyaa kaac’ay aw d’ayooppe, k’ay wurssetsan bonchcho mooguwaakka moogettennan attooppe, aappe bare daay uluwaan hayk’k’iide yeletteedda boshay keeka gay. 4 Ayaw gooppe, he boshay c’oo yeletteedda; simmiide k’ay, Aa ooninne hassayenna d’umaw bee; Aa suntsaykka he d’uman kamettiide attee. 5 I aawaa poo’uwaa be’ibeenna; de’uwaabaykka ayentto eribeenna. Hinkko bitaniyaawaappe aad’d’iide shemppiyaawe Aa. 6 Hewaa diraw, nashechchay bayinnan de’ishiina, laa"u sha"u laytsaa de’iyaa asaappe he boshaa kaac’ay lo"a. Ayaw gooppe, wurssetsan laa"uukka itti sa’aa biino.

7 Asi daaburiide ootsiyaa ubbay barew miyaawaa demmanaassa; shin Aa uluu awudenne gidanawaa gi erenna. 8 Yaatina, c’inc’c’a Asay eeyyaappe ayaan keekii? Hiyyeesaykka loytsi c’inc’c’iide, haratuu sintsan waan simerettanentto eriyaawe aw ayaa maaddii? 9 Ayifiyaan be’iyaawe amottiyaawaappe keeka. K’ay hewekka c’arkkuwaa oyk’k’anaw yederssiyaawaa mala mela.

10 Haniyaabay ubbaykka kasetiide kuushetti utteedda. Itti itti Asay waananaw de’intto, adussa wodiyaappe kase baggan eretti utteedda; k’ay ay asaynne bareppe minniyaawaanna gaaddatanaw danddayenna. 11 Haasayay c’orattiyaa wode, hadabay c’orattee; hewe yaatina, asaa ayaa maaddii?

12 Hada gidiide, kuwaadan c’oo aad’d’iyaa guutsa laytsaa bare Asay wootiide aatsanaw koshshintto eriyaawe oonee? K’aykka Asay hayk’k’iide bi kichchina, saluwaa gufantsan hananaw de’iyaawaa asaw odanaw danddayiyaawe oonee?