3 Abraame bare deemuwaan duge guufanneedda; S’oossay aw hawaadan yaageedda; 4 «Simmi, taani neenana c’aak’k’etiyaa c’aak’uu hawaa; neeni daro kawutetsaa aawuwaa gidana. 5 Hawaappe doommiide ne suntsay Abraama geetettenna; shin ne suntsay Abrahaama* gidana. Ayaw gooppe, taani neena daro kawutetsaa aawuwaa ootsaad.✝ 6 Taani neena loytsa c’orissana; taani neeppe kawutetsatuwaa med’d’ana; kaatetuukka neeppe kesana. 7 Taani taappenne neeppe, neeppe guyye ne zeretsaappenne gidduwaan, yeletaappe yeletaa gakkanaw ta c’aak’k’uwaa c’aak’k’etay; ha c’aak’k’uu taani newunne neeppe guyye ne zeretsaw S’oossaa gidana mala med’inaa c’aak’uwaa.✝ 8 Ha"i neeni bete gidaade de’iyaa Kanaane biittay ubbay newunne neeppe guyye ne zeretsaw med’inaw laata gidana mala taani immana; k’ay taani unttunttu S’oossaa gidana» yaageedda.✝

9 K’aykka S’oossay Abrahaama, «Neena gidooppe, neeni ta c’aak’uwaa naaga; neenikka neeppe guyye ne zeretsaykka, yeletaappe yeletaa gakkanaw naagite. 10 Taappenne neeppenne, neeppe guyye ne zeretsaappe gidduwaan hinttenttu naagana ta c’aak’uu hawaa; hinttenttu gidduwaan de’iyaa attumawe ubbay k’as’s’aretto.✝ 11 Hinttenttu attumatetsaa shookuwaa k’as’s’arettiita; hewe taappenne hintteppe gidduwaan de’iyaa c’aak’k’oo mallaa gidanawaa.