Yoonaasa 2

Yoonaasa Woosaa

1 Yoonaasi moliyaa uluwaan de’iidde, hawaadan yaagiide, Med’inaa Godaakko, bare S’oossaakko, woosseedda; 2 «Taani ta tuggaa giddon de’aadde Med’inaa Godaa s’eesaad; s’eesina I taw koyeedda. Taani Si’ooliyaa ulo giddon de’aadde waassaad; neenikka ta waasuwaa sisaadda. 3 Neeni taana c’iimma abbaa garissan duge olaadda; haatsay ta yuushshuwaa dooddeedda; ne umbuletiyaa ne beetay ta bollaanna aad’d’eedino. 4 Hewaa gishaw, taani hawaadan yaagaaddi; ‹Taani ne sintsappe wora olettaad; giddoppenne, taani ne Geeshsha Golliyaa zaaraade be’ana› yaagaaddi.

5 «Haatsay taw k’ood’iyaa gakkanaw mitteedda; c’iimma abbay taana muukkeedda; abban de’iyaa maataykka ta huup’iyaan s’aas’etteedda. 6 Taani deri baasetteedda sa’aa duge wod’d’aad; biittaaninne Aa kubuwan med’inaw gorddettad. Shin abeet Med’inaa Godaw, ta S’oossaw, neeni ta shemppuwaa c’iimma ollaappe kessaadda.

7 «Taani wode, neena Med’inaa Godaa hassayaadi. Ta woosaykka neekko, ne geeshsha Golliyaa Mak’idasiyaa gakkeedda. 8 Hada eek’atoo goynniyaawaanttu GODAN ammanettiyaawaa aggeeddino. 9 Shin taani galataana new yarshshana; taani shiik’k’eeddawaa ubbaakka gatsana. Ayaw gooppe, atotetsay Med’inaa Godaappe yee» yaageedda.

10 Hewaappe guyye, Med’inaa Goday moliyaa azazina, molii Yoonaasa biittaa bollan c’oosheedda.