Daannatuwaa 15

1 Guutsaa takkishin, zarggaa c’akkiyaa wode, Samssooni bare machchatto be’anaw itti ank’k’ara deeshshaa akkiide beedda; I aawuwaa, «Taani ta machchata de’iyaa kifiliyaa gelanaw koyaad» yaageedda.

Shin I gelennaadan, Izi aawuu diggeedda. 2 Izi aawuu Samssoona, «Neeni izo ubbaa is’s’eeddawaa malatina, ne miiziyaw immaad. Shin I teefa michchata iippekka aad’d’a lo"a; Izi diraw izo akka» yaageedda.

3 Hewaappe guyye Samssooni unttunttoo, «Ha"i simmi Piliss’s’eema gadiyaa asaa bolla taani iitabaa ootsooppe, bayzzanchcha gidikke» yaageedda. 4 Biide, heezzu s’eetu worakanatuwaa oyk’k’iide laa"uwaa laa"uwaa dufiyaa ittippe gatsiide, dufetuwaappe gidduwaan yiic’etteedda s’omppiyaa wotsiide k’achcheedda. 5 Hewaappe guyyiyaan, k’ashetteedda s’omppiyaan tamaa oytsiidde, biro c’akettibeenna Piliss’s’eema asaa katsaa giddo worakanatuwaa yeddeedda; c’aketteedda katsaa, ek’uwaan de’iyaa katsaa, woyniyaa turatuwaanne wogaraa s’uuggeedda.

6 Piliss’s’eematuu, «Hawaa ootseeddawe oonee?» yaagiide oochcheeddino.

Shin asay, «Samssooni ootseedda; ayaw gooppe, Timina asaa gidiyaa Aa bolluu, Aa machchatto Aa miiziyaw immeedda dirassa» yaageedda. Piliss’s’eematuu biide, owunne I aawuwaa taman s’uuggeeddino.

7 Samssooni unttunttoo, «Hinttenttu hewaa ootseedda diraw, haluwaa kesennaan aggikke» yaageedda. 8 Unttuntta wolk’k’aama shochchaa shoc’iide, darotuwaa wod’eedda. Hewaappe guyyiyaan biide, Es’aama geetettiyaa koshiyan de’iyaa zaallaa gonggoluwaa giddon gam"eedda.

Samssooni Piliss’s’eematuwaa S’ooneedda

9 Hewaappe guyyiyaan, Piliss’s’eema Asay yiide, Yihudaan dunkkaaniide Leeha geetettiyaa katamaa oleedda. 10 Yihudaa Asay unttuntta, «Ayaw nuuna olanaw yeedditee?» yaagiide oochcheedda.

Shin unttunttu, «Nuuni Samssoona oykki k’achchanawunne I nu bolla ootseeddawaadan Aa bolla ootsanaw yeeddo» yaagiide zaareeddino. 11 Yaatina, Yihudaappe heezzu sha"a asatuu Es’aama geetettiyaa sa’aan de’iyaa zaallaa gonggoluwaa biide Samssoona, «Nuuna mooddiyaawanttu Piliss’s’eema asatuwaa gidiyaawaa erikkiiyye? Yaatina, nu bolla hawaa ayaa iitabaa ootsay?» yaageeddino.

Hewaappe guyye I zaariide, «Unttunttu ta bolla ootseeddawaadan, taanikka unttunttu bolla ootsaad» yaageedda.

12 Unttunttukka zaaretsiide, «Nuuni hawaa yeeddawe neena k’achchiide, Piliss’s’eematoo aatsiide immanaassa» yaageeddino.

Samssooni unttuntta, «Hinttenttu hinttenttu huup’iyaw taana wod’enaadan c’aak’k’ite» yaageedda.

13 Unttunttu, «Eeno, nuuni neena k’achchiide, unttunttoo aatsiide immanaappe attina, wod’okko» yaagiide aw zaareeddino. Hewaappe guyyiyaan, laa"u ooratsa wodoruwaan k’achchiide, zaallaa gonggoluwaappe kessiide afeedino.

14 Samssooni Leeha beedda wode, Piliss’s’eema asatuu nashechchaan waasiide, aanana gaketanaw yeeddino. Med’inaa Godaa Ayyaanay Aa bolla wolk’k’aappe wod’d’eedda; Aa kushiyaa k’achchi wotseedda wodoruwaa, shaluu tamaa be’iide duus’s’iyaawaadan, duuseretsi yegeedda. 15 Yaatiide mata wode hayk’k’eedda itti hariyaa goggoc’c’uwaa demmi akkiide, an sha"a asaa wod’eedda.

16 Samssooni hawaadan yaageedda;

«Hariyaa goggoc’c’uwaan,

taani anhaa bollan anhaa dooraad.

Hariyaa goggoc’c’uwaan sha"a asaa wod’aad» yaageedda.

17 Haasayiyaawaa wursseeddawaappe guyyiyaan, bare oyk’k’eedda goggoc’c’uwaa kushiyaappe oliide he sa’aa Raamaati-Leeha*15:17 Raamaati-Leeha: Ha suntsaa biletsay Ibraaweetsuwaan, «Goggoc’c’uwaa deriyaa» giyaawaa. yaagiide suntseedda.

18 Hewaappe guyyiyaan, Samssooni loytsi saamettiide, Med’inaa Godaw waassiidde, «Neeni hawaa mala wolk’k’aama s’oonuwaa taw ne k’oomaw immaadda. Yaatina, taani ha"i saamuwaan hayk’k’oo? K’ay ha k’as’s’arettibeennawanttu kushiyan kunddoo?» yaagiide waasseedda. 19 Yaagina S’oossay Leehan de’iyaa gadiyaa p’alk’k’ina, aappe haatsay kesseedda. Samssooni he haatsaappe ushiidde aleeda diraw, aw shemppu simmeedda. Yaatina, he sa’aa Ayni-Hak’k’oore*15:19 Ayni-Hak’k’oore: Ha suntsaa biletsay, «Waassiyaawaa pulttuwaa» giyaawaa. yaagiide suntseedda. Hewe hachche gakkanaw Leehan de’ee.

20 Piliss’s’eema Asay gadiyaa mooddeedda wode, Samssooni Israa’eelan laatamu laytsaw pirddiyaa daanna gideedda.