1 Itti gallassi Samssooni Gaaza geetettiyaa Piliss’s’eematuwaa katamaa beedda; yaan itti sharmus’a mishiratto be’iide, izina ak’anaw I golliyaa geleedda. 2 Gaaza kataman de’iyaa Asay Samssooni unttunttu katamaa yeeddawaa sisiide, katamaa yuuyyi aad’d’iide, k’ammaa ubbaa katamaa penggiyaa naagiidde ak’eeda; «Sa’ay wonttanaw naagiide, nuuni Aa wod’ana» yaagiide k’ammaa ubbaa c’o"u geeddino. 3 Shin Samssooni yaan giseeddawe bilahe gakkanaw s’alala. Bilahe denddiide, katamaa dirssaa penggiyaa oykkiide, sank’k’aa, gubaniyaa, mak’aaniyaanne gorddiyaa shikaalatuwaa shoddeedda. He ubbaakka hashiyaan tookkiide, Kebroonappe sintsa baggana de’iyaa deriyaa huup’iyaa keseedda.

4 Hewaappe guyyiyaan, Samssooni Soreek’a giyaa zanggaaraan de’iyaa itti Daliilo giyaa mishiratto siik’eedda. 5 Yaatina, Piliss’s’eematuwaa kaappatuu iikko yiide, «Neeni Aa c’immaade, he wolk’k’aa ubbaa ayaappe I demmeedenttonne k’ay nuuni Aa wooti s’ooniide k’achchanaw danddayintto oochcha. Ittuu ittuu nuuni new itti sha"anne itti s’eetu s’agaraa biraa immana» yaageeddino.

6 Daliila Samssoona, «Hawaa keeshshaa wolk’k’aa neeni hak’appe demmaadintto, hayyanaa taw odaarikkii! Itti Asay neena k’achchiide, wootiide ne wolk’k’aa daaburssanaw danddayii?» yaagaaddu.

7 Samssooni, «Taana laappun irs’s’a dafotuwaan Asay k’achchooppe, daaburaade, hara asaadan hanana» yaagiide zaareedda.

8 Hewaappe guyyiyaan, Piliss’s’eematuwaa kaappatuu Daliiliw laappun irs’s’a dafotuwaa ahina Aa Samssoona k’achchaaddu. 9 Bare k’ol"on asaa k’osa wotsaade, «Samssoonaa, Piliss’s’eematuu yikichcheeddino» gaade s’eesaaddu. Shin shaluu tamay oyk’k’ina duus’erettiyaawaadan, dafotuwaa duuseretsi yegeedda. Yaatina, I waan wolk’k’aamintto s’uuray erettibeenna.

10 Yaatina, Daliila Samssoona, «Hekko neeni taanan kaa’aasa; neeni taw wordduwaa odaadda. Ha"ikka neeni k’ashettanawe ayaanentto, hayyanaa taw odaarikkii!» yaagaaddu.

11 I izo, «Asay go’ettibeenna ooratsa wodoruwaan taana k’achchooppe, daaburaade, hara asaadan hanana» yaageedda.

12 Daliila ooratsa wodoruwaa akkaade, Samssoona k’achchaaddu. K’aykka bare k’ol"on asaa k’osa wotsaade, «Samssoona, Piliss’s’eematuu yikichcheeddino» yaagaaddu. Shin I wodoruwaa k’esiyaappe shaluwaadan duuseretsi yegeedda.

13 Yaatina, Daliila Samssoona, «Ha"i gakkanaw neeni taanan kaa’aadda; neeni taw wordduwaa odaadda. Ha"ikka neeni k’ashettanawe ayaanentto hayyanaa taw odaarikkii!» yaagaaddu.

Hewaappe guyye I izo, «Ta huup’iyaa laappun datsa binnaanaa k’ac’inaanna gatsaade, harbban walakkaade, mukuukkaa s’ongga s’onggaade daddooppe, taani daaburaade, hara asaadan hanana» yaageedda.

14 Hewaappe guyyiyaan, Samssooni gem"ishishin, Daliila Aa huup’iyaa laappun datsa binnaanaananne k’ac’inaanna gatsa walakkaade daddaaddu. Hewaappe guyyiyaan, «Samssoonaa, Piliss’s’eematuu yikichcheeddino» yaagaaddu. Hewaappe guyye I gem"ishuwaappe beegottiide, bare binnaanaa dadetteedda mayuwaappenne harbbaappe shod akkeedda.

15 Yaatina Aa, «Ne wozanay taananna de’ennaan, ‹Taani neena siik’ay› waataade gay? Taanan hawaana heezzu gede kaa’aadda. Neeni ha wolk’k’aa ayaappe demmaadintto, taw odabaakka» yaagaaddu. 16 Hachche hachche zaara zaara oochchaade waayissina, haniyaabaa d’ayeedda.

17 Yaatina, «Ta aati uluwaappe doommina, taani S’oossaw dummateedda Naaziraawe asaa gideedda diraw, ta huup’iyaa binnaanay meedetti erenna. Ta binnaanay meedettooppe, ta wolk’k’ay taappe d’ayina, taani daaburaade, hara asaadan hanana» yaagiide, bare wozanaan de’iyaawaa ubbaa iziw odeedda.

18 Bare wozanaan de’iyaawaa ubbaa I odeeddawaa Daliila be’eedda wode, «Bare wozanaan de’iyaawaa ubbaa taw odeedda diraw, ane itti gede simmiide yiite» yaagaadde Piliss’s’eematuwaa kaappatoo kiitaa yeddaaddu. Unttunttu biraa akkiide, iikko yeeddino. 19 Daliila Samssoona bare kiwuwaan gem"ishisaaddu; itti asaa s’eesina yiide, Aa huup’iyaa laappun datsa binnaanaa meedeedda; Aa wolk’k’ay aappe d’ayeedda. Hewaappe guyyiyaan, Aa waayissiyaawaa doommaaddu; 20 «Samssoona, Piliss’s’eematuu yikichcheeddino!» yaagaaddu.

Gem"ishuwaappe beegottiide, kasewaadan duusereetsaade baana yaagiide k’oppeedda; shin Med’inaa Goday aappe shaaketti kichcheeddawaa I eribeenna.

21 Piliss’s’eematuu Aa oyk’k’eeddawaappe guyyiyaan, Aa laa"u ayfetuwaa wooc’i kessiide, Gaaza katamaa afeedino. Hewaappe kaala nahaasiyaa sanssalatan k’achcheeddinno; k’asho gollen de’iyaa wos’aan katsaa gaac’c’anaadan ootseeddino. 22 Unttunttu Aa huup’iyaa binnaanaa meedeeddawaappe guyyiyaan, binnaanay simmiide doluwaa doommeedda.

23 Piliss’s’eematuwaa kaappatuu, «Nu s’oossay nu morkkiyaa Samssoona nu kushiyan aatsiide immeedda» yaagiide barenttu s’oossaa Daagoonaw wolk’k’aama yarshshuwaa yarshshanawunne nashettanaw ittippe shiik’eeddino.

24 Asay ubbay Aa be’eedda wode, «Nu gadiyaa bayzzeedda, nu asaappe daruwaa wod’eedda nu morkkiyaa nu s’oossay nu kushiyan aatsiide immeedda» yaagiide barenttu s’oossaa galateeddino. 25 Unttunttu loytsi nashetteedda diraw, «Kaa’iide nuuna nashshechchana mala, Samssoona s’eesite» yaageeddino. Hewaappe guyye Samssoona k’asho golliyaappe s’eesiide ahina, I unttunttu sintsan kaa’eedda; kaa’eeddawaappe guyyiyaan, tuussatuwaappe gidduwaan esseeddino.

26 Samssooni Aa kushiyaa oyk’k’iide kaaletsiyaa na’aa, «Taani unttunttun zemppaade ek’k’ana mala, golliyaa tookkeedda tuussatuwaa taana boshissa» yaageedda. 27 Golliyaa gidduwaan attuma asatuunne mac’c’a asatuu kumi utteeddino; k’ay hewan Piliss’s’eematuwaa kaappatuu ubbatuukka de’iino. Samssooni kaa’ishin, golliyaa bollan dembbayiide kees’s’eedda sa’aan uttiide, heezzu sha"a gidiyaa attuma asatuunne mac’c’a asatuu be’iino.

28 He wode Samssooni Med’inaa Godaa woossiidde, «Abeet Ubbaa Mooddiyaa Med’inaa Godaw, hay taana hassayaarkkii! Abeet S’oossaw, Piliss’s’eematuu ta laa"u ayfetuwaa kesseeddawaa, haluwaa taani kessanaadan, hay taana itti gede mintsetsaarkkii!» yaageedda. 29 Samssooni golliyaa tookkeedda giddo tuussatuwaa laa"uwaakka oyk’k’eedda. Ushechcha kushiyan ittuwaa, haddirssa kushiyan ittuwaa oyk’k’eeddawaappe guyyiyaan, 30 «Ane taani Piliss’s’eematuwaanna ittippe hayk’k’ay!» yaagiide waasseedda. Barew de’iyaa wolk’k’aa ubbaan sugina, keetsay kaappatuu bollanne gidduwaan de’iyaa asaa ubbaa bolla kunddeedda. Samssooni hayk’k’iidde wod’eedda asay, I pas’a de’iidde wod’eedda asaappe dareedda.

31 Yaatina, Aa ishatuunne Aa dabbotuu ubbay yiide, Aa anhaa afeedino; S’or"a katamaappenne Eshttaa’oola katamaappe gidduwaan, Aa aawuwaa Maanuhe duufuwaan moogeeddino. Samssooni Israa’eelan laatamu laytsaa daannatiide pirddeedda.