1 Ta na’aw, neeni ta giyaawaa akkooppe, ta azazuwaakka ne giddon minjjooppe, 2 aad’d’eedda eratetsaa hayzzooppe, ne wozanaappe akeekooppe, 3 eratetsaa s’eesooppe, akeekaakka d’ok’k’u ootsaade s’eesa. 4 Asay biraa woy k’oseedda miishshaa koyiyaawaadan, neeni eratetsaa koyya. 5 He wode neeni Med’inaa Godaw yayyee giyaawe ayentto akeekana; S’oossaakka loytsaade erana. 6 Ayaw gooppe, Med’inaa Goday aad’d’eedda eratetsaa immee; aappe eratetsaynne akeekay beettee. 7 I suuretoo maaddiyaa zoriyaa minjjee; tooshii bayinnan hamettiyaawanttookka I gonddalliyaa. 8 Tumuwaa pirddaa ogiyaa naagee; barew ammanettiyaawanttu ogiyaakka naagee.

9 He wode neeni s’illotetsaa, suure pirddaa, suuretetsaanne lo"o oosuwaa ubbaa erana. 10 Ayaw gooppe, aad’d’eedda eratetsay ne wozanaa gelana; eratetsaykka ne shemppoo nashshechcha gidana. 11 Neena adussi k’oppiyaawe naagana; akeekayikka neena naagana. 12 Aad’d’eeda eratetsay neena iita asatuwaa ogiyaappe naagana; geellabaa haasayiyaawanttuppe ashshana. 13 Unttunttu nagaraa d’uman de’anaw, s’illotetsaa ogiyaa aggiino. 14 Iitaa ootsiyaawaan nashettiino; geellaban hashshu giino. 15 Unttunttu ootsiyaawe mirk’k’etsaa; unttunttu de’uukka geella.

16 Aad’d’eeda eratetsay woshumiyaa mishiratippenne sheleeshshiyaa k’aalan haasayiyaa laggetsattippe neena ashshana. 17 Iza bare na’atetsaa asinaa aggaw; bare S’oossaa sintsan c’aak’k’eteedda c’aak’uwaakka dogaw. 18 Izi golle biyaawe hayk’k’anaw biyaawaa; izi ogii hayk’k’oo kaaletsee. 19 Iikko biyaa oonikka guyye simmenna; de’uwaa ogiyaakka demmenna. 20 Hewaa aggade, neeni lo"o asatuwaa leemisuwaa kaala; s’illo asatuwaa de’uwaakka k’ulla. 21 Ayaw gooppe, suure asatuunne tooshii bayinna asatuu biittan gam"iide de’ana. 22 Shin iitatuu biittaappe d’ok’ollettana; ammanttennawanttukka shodettiide d’ayana.