1 K'amma kumentsaa ta hiis'an gisaade,

ta siik'uwaa demmanaw amottaad; minisaade koyaad;

shin demmanaw danddayabeykke.

2 Katamaa giddon de'iyaa aakonne s'untsa ogetuwaa ubbaan yuuyyaad;

ta siik'uwaa demmanaw koyaad; minisaade koyaad;

shin demmanaw danddayabeykke.

3 Katamaa yuuyyi naagiyaawanttu taana demmeeddino;

taanikka, Ta siik'uwaa be'eeditee? yaagaade unttuntta oochchaad.

4 Unttunttuppe yaa aad'anne ta siik'uwaa demma aggaad.

I taappe kessi akkenaadan, minisaade oyk'k'aad;

ta daayi golle akka afaad; ta yeletteedda kifiliyaa gelissaad.

5 Hinttenoo Yerusaalame yalaga mac'c'a asaw,

siik'uu barew dosiide denddana gakkanaw,

Aa hintte beegotsena mala,

taani hinttena gen"etuwaaninne bazzuwaa dogetuwaan c'allay yaagaaddu.

6 Hawe bazzuwaana yiyaawe, c'uwaa tuussaa malatiyaawe,

peenuukka zal"anchchaa is'aanaadaaninne kawaraadan,

sawiyaawe I oonee?

7 Hewaa be'ite, Solomona paraa gaarii yee;

he paraa gaarii Israa'eeliyaappe dooretteedda wolk'k'aamatuu,

usuppun tammu tooranchchatuu ajabeedino.

8 Unttunttu ubbaykka mashshaa oyk'k'etsaa meezeteeddawanttanne,

olankka paac'etteeddawantta.

K'amman gakkana metuwaa ek'ettanaw,

unttunttu ittuu ittuu mashshaa gis's'iide giigeeddawantta.

9 Kaatiyaa Solomon paraa gaariyaa giddon,

barew uttiyaa kawutetsaa araataa giigisseedda.

I araataa Liibaanoosa asaappe aheedda mitsaappe oosisseedda.

10 Araataa tuussatuu biran sheeshetteeddino;

gedii work'k'aan alleek'k'etteedda;

uttiyaasay Yerusaalame wodoratuu ochchaa teeraa malatiyaa k'ac'inan,

siik'uwaan daddeedda afilaan kameteedda yaageeddino.

11 Hinttenoo, S'iyoone wodoratoo, Kaatiyaa Solomona be'anaw haayite!

I loytsi nashetteedda, Aa bullachchaa gallassi Aa aata Aa huup'iyaan,

wotseedda kallachchaa wotsiide utteedda yaagaaddu.