1 Kaatiyaa naattidan lo"iyaanee!

Ne gedetuu neeni nas'alaa c'aammaa wotsi de'ishshin be'iyaa wode,

ayaa lo"iino! Ne sheechchii eranchcha wogaac'ii k'os's'iide,

loytsi alleek'k'isseeda ink'k'uwaa malatee.

2 Ne gul"ay woyniyaa eessay kumeedda birilliyaa malatee;

ne s'eessaa yuushshuu c'iishshan k'ashetteedda zarggaa mirk'k'iyaa malatee.

3 Ne d'antsatuu manttiyaa yeletteedda, gen"ati maratuwaa malatiino.

4 Ne k'ood'ii danggarssaa zaaliyaan alleek'k'etteedda adussa gimbbiyaa mala.

Ne ayifii wolk'k'aama Haseboona katamaa penggiyaa matan de'iyaa,

zeeruwaa haatsaa malatee.

Ne siid'ii Damask'k'o s'eelissiide gimbbeedda Liibaanoosa gimbbiyaa malatee.

5 Ne huup'ii K'armmeloosa asaa malatee;

ne olassa binnaanay k'ac'inaa s'aatsaa malatee;

kaatiyaakka ne huup'iyaa datsay nashechcheedda.

6 Ta siik'k'atee, ne ayaa lo"ay! Ne ayaa malanchchatii!

Ne siik'uu taana ayaa nashechchii!

7 Ne geesay zambbaa geesaa malatee.

Ne d'antsay zambbaa ayifiyaa wurc'c'uwaa malatee.

8 Taani, Ha zambbaa gi"ana; Aa maratuwaa oyk'k'ana yaagaad.

Ne d'antsay woyniyaa teeraa wurc'c'uwaa mala;

k'ay ne siid'iyaanna kesiyaa peenuu appiliyaa ayifiyaadan sawee.

9 Ne yeruu mettershshatuwaappenne achchaappe gidduwaana,

walalattiidde geliyaa woyniyaa mala.

Ubbaappe aad'd'iide mal"iyaa

woyniyaa eessaa mala yaageedda.

10 Taani ta al"o siik'uwaanno; ikka taana amottee.

11 Ta siik'ow, haaya; laa"uu katamaappe kesiide biide,

gas'ariyan ak'oytte; k'ammaa laa"uu hewan aatsana.

12 Wontta guuran ane woyniyaa turaa giddo boytte;

woyniyaa turay c'iisheeddentto, c'iishshiide ayifiyaa dors's'os's'eedenttonne,

k'ay roomaaniikka ayifeeddentto ane be'oytte.

Taani ta siik'uwaa neena hewan bessana.

13 Inkkoyiyaa ayifiyaa sawuunne hara nashechchiyaa ataakilttiyaa ayifii,

nu karen besseedda; ta siik'oo!

Ha ayifetuwaappe teereeddawanttanne ooratsa mas'eeddawantta,

new ashsha wotsaad.