Sofonaasa 2

Nagaraa Paas’ussaa

1 Hinttenoo, yeellay bayinna asatoo, ane ittippe shiik’ite; 2 C’arkkuu punniide afiyaa suullaadan beennan de’iidde, yashshiyaa Med’inaa Godaa hank’k’uu hintte bolla wod’d’ennaan de’ishshin, Med’inaa Godaa hank’k’uwaa suuluwaa gallassaykka hintte bollan gakkennan de’ishshin, med’inaa Godaakko simmite. 3 Hinttenoo, gadiyaan de’iyaa ashkketoonne Aa azazuwaa ootsiyaa ubbaa gede, Med’inaa Godaa koyite; s’illotetsaa koyite; k’ay ashkketetsaakka koyite. Yaatooppe, ooni erii, Med’inaa Godaa hank’k’uwaa gallassi hinttena k’osiide ashshanenttonne.

Israa’eeliyaa Yuushshuwaan De’iyaa Kawutetsatuwaa Kunddetsaa

4 Gaaza katamay onana; Ask’k’aloona katamaykka mela gidanawaa; Ashddooda katamaa Asay seeta gallassi goodettana; Ek’iroona katamaykka d’ok’k’olettanawaa.✝2:4 Isa. 14:29-31; Erm. 47:1-7; Hiz. 25:15-17; Iyu. 3:4-8; Amo. 1:6-8; Zak. 9:5-7 5 Hinttenoo, abbaa doonaan de’iyaa Piliss’s’eema asatoo, hinttenttoo aayye ana! Neenoo, Piliss’s’eematuu de’iyaa Kanaane biittaw, Med’inaa Godaa pirdday ne bollan yee. Taani neena d’ayissana; neenan itti asaynne attena. 6 Abbaa doonaan de’iyaa hintte biittay mehiyaa heemmiyaa saa, hentsanchchatuu de’iyaasaanne mehiyaa wudiyaa balluwaa gidanawaa. 7 Abbaa doonay Yihudaa asaappe atteedawanttoo laata gidanawaa; hewan unttunttu heemettana. Sa’ay k’ammiyaa wode unttunttu Ask’k’aloona kataman de’iyaa golletuwaan ak’ana; ayaw gooppe, Med’inaa Goday unttunttu S’oossay unttunttuwaa k’oppana; I unttuntta zaariide ishalissana.

8 Ubbaappe Wolk’k’aama Med’inaa Goday, Israa’eeliyaa S’oossay, hawaadan yaagee; «Taani Moo’aaba asaa k’iliic’uwaanne Amoona asaa boriyaa sisaad. Unttunttu ta asaa k’illiic’c’eeddino; unttunttu biittaa bollankka otoretteeddino.✝2:8-11 Isa. 15:1—16:14; 25:10-12; Erm. 48:1—49:6; Hiz. 21:28-32; 25:1-11; Amo. 1:13-15 9 Hewaa diraw, ta de’uwaa suntsan c’aak’k’ay, Moo’aabe Sodoomadan hanana; Amoona asaykka Gamoora asaadan hanana. Unttunttu med’inaw mas’iniyaa bookkiyaa ollaanne aguntsay mayyeedda bazzuwaa gidanawaa. Ta asaappe atteedawaanttu unttunttu duretaa bonk’k’anawantta; unttunttu biittaakka laattanawantta» yaagee.✝2:9 Dom. 19:24

10 Amoonanne Moo’aabe Asay Ubbaappe Wolk’k’aama Med’inaa Godaa asaa bolla k’iliic’iiddinne otorettiide haasayeedda diraw, unttunttu bolla ha metuu gakkanawaa. 11 Med’inaa Goday unttunttun yayetteeddawaa gidanawaa; biittan de’iyaa s’oossatuwaa ubbaa I d’ayissana; k’ay sa’aan de’iyaa kawutetsatuwaan de’iyaa Asay ubbay bare de’iyaa saan de’iyaa saan aw goyinnana.

12 Hinttenoo, Toop’p’iyaa asatoo, hinttekka ta mashshaan hayk’k’ana.✝2:12 Isa. 18:1-7

13 Med’inaa Goday bare kushiyaa huup’issa bagga zaariide yeddana; Asoore biittaa d’ayissana. K’ay Nanawe katamaakka mela bazzuwaadan, mela sa’aa ootsana.✝2:13-15 Isa. 10:5-34; 14:24-27; Nah. 1:1—3:19 14 Wudiinne do’atuu ubbay Aa giddon allas’s’ana; guttuunne k’us’arssay Aa koletteedda gimbbetuwaa giddon de’ana; unttunttu kooshshay maskkootiyaananne penggiyaanna sisettana. Golletuu kees’etteedda zigay kallottana. 15 Ha katamay, «Taana! Taappe attina, haray baawa» yaagiide otorettiidde de’eeddawaa; shin I ha"i do’atuu geessuu mela sa’aa gideedda. Aa miyiyaanna aad’d’iyaa ubbay daroppe maalalettiide, barenttu kushiyaa s’orssiidde, «barchche!» gaana.