यहोवा–भगवान तक पुगनेन रस्तु
1 "तुमरो मन व्याकुल नी होय; यहोवा–भगवान पर विश्वास राखु आरू मखे पर भी विश्वास राखु। 2 मार बासन घर मा घोणा रवनेन जागु छे, यदि जागु नी रोवतु ते हाव तुमूक कय देतु; काहकि हाव तुमरे करता जागु तयार करने जतु छे। 3 आरू यदि हाव जाईन तुमरे करता जागु तयार करो, ते पछु आवीन तुमूक आपने चाँ जाईस कि जा हाव रवु चाँ तुमू भी रवु। 4 आरू जा हाव जातु छे तु चा वाट जानतु छे।" 5 थोमा उका कयो, "हे पोरबु, हामु नी जानता कि तु क जाय रयु छे; ते वाट कोसो जाने?" 6 ईशु उका कयो, "मार्ग आरू सच्चाई आरू जीवन हाव छे; बिना मार द्वारा कोय बास जु नी पुछ सकतु। 7 यदि तुमू मखे जान्या हता, ते मार बास काजे भी जानता; आरू हिमी जानता छे, आरू उका देख्या भी छे।"
8 फिलिप्पुस उका कयो, "हे पोरबु, बास काजे हामुक देखाड़ दे, यो हामरे करता खुब छे।" 9 ईशु उका कयो, "हे फिलिप्पुस, हाव इतरा दाहाड़ान तुमरे साथे छे, आरू काय तु मखे नी जानतु?" जु मखे नी देख्यु छे त्यो बास काजे नी देख्यु छे। तु काँ कयतु छे कि बास काजे हामु देख्या? 10 काय तु विश्वास नी करे कि हाव बास मा छे आरू बास मार मा छे? यी वात जी हाव तुमूक कयतु छे, आपसी तरफ रईन नी कयतु, पुन बास मखे मा रवीन आपसा काम करता छे। 11 मार विश्वास करू कि हाव बास मा छे आरू बास मखे मा छे; नी ते कामोन कारण मार विश्वास करू। 12 "हाव तुमूक से सच सच कयतु छे, कि जु मार पर विश्वास राखतु छे, यो काम जो हाव करतु छे त्यो भी करसे, वरना ओको रईन भी मोटो काम करसे, काहकि हाव बासन जु जातु छे। 13 जो काहय तु मार नाव रईन मांगसे, चो हाव करसु कि पोर्या द्वारा बासन महिमा होय। 14 यदि तुमू मखे मार नाव रईन काहय मांगसे, ते हाव उका करसु।
चुखलो आत्मान प्रतिज्ञा
15 "यदि तुमू मखे पर मोंग राखता छे, ते मार हुकुम काजे मानसे। 16 हाव बास काजे विनती करी, आरू त्यो तुमूक एक आरू मदतगार आपसे कि त्यो जलोम तुमरे साथे रवसे। 17 मतलब सच्चाई आत्मा, जीनाक संसार नी मान्य कर सके, काहकि त्यो उका देखतु छे आरू नी उका जानतु छे; तुमू उका जानता छे, काहकि त्यो तुमरे साथे रोवतु छे, आरू त्यो तुमूक मा छे।
18 "हाव तुमूक विखाळो नी सुड़ो; हाव तुमरे जु वापस आव रयु छे। 19 आरू थुड़ीक वार रया गय छे कि पछु संसार मखे नी देखसे, पुन तुमू मखे देखसु; एरकरीन कि हाव जीवतु छे, तुमूक भी जीवता रवसे। 20 उका दाहाड़े तुमू जानसु कि हाव आपसा बास मा छे, आरू तुमू मखे मा छे, आरू हाव तुमू मा छे। 21 जीनान जु मार हुकुम छे आरू त्यो हेको मानतु छे, त्यो मखे पर मोंग राखतु छे; आरू जु मके पर मोंग राखतु छे ओकामा मार बास मोंग राखतु छे, आरू हाव उकासे मोंग राखी आरू आपने आपसु उका पर प्रकट करी।" 22 त्यो यहूदा जु इस्करियोती नी हतु, हेके कयो, "हे पोरबु, काय हुयो कि तु आपने आपसु हामु पर प्रकट करने चाहतु छे आरू संसार पर नी?" 23 ईशु उका जवाब देदु, "यदि कोय मखे पर मोंग राखछे ते त्यो मार वचन काजे मानछे, आरू मार बास ओकामा मोंग राखछे, आरू हामु उका पास आवसु आरू उका साथे वास करसु।" 24 जु मखे उपर मोंग नी राखता, चाँ मार वचन नी मानता; आरू जो वचन तुमू सोंब्या छे चो मारो नी वरना बासन छे, जु मखे मोकल्यु। 25 "यी वात हाव तुमरे साथे रोवतु तवन कयलु।" 26 पुन मदतगार मतलब चुखलो आत्मा जीनाक बास मार नाव करीन मुकलसे, त्यो तुमूक सब वातु सिकाड़से, आरू जो काहय हाव तुमूक कयो छे, चो तुमूक सब याद करावसे। 27 हाव तुमूक शांती आपीन जाय रयु छे, आपसी शांती तुमूक आप रयु छे; जोसो संसार आपे छे, हाव तुमूक नी आपे: तुमरो मन व्याकुल नी हुयो आरू नी डरे। 28 तुमू सोंब्या कि हाव तुमूक कयो, "हाव जातु छे, आरू तुमरे जु पछु आवीस। यदि तुमू मखेमा मोंग राखता ते ओको वात पर खुश हता कि हाव बासन जु जातु छे, काहकि बास मार रईन मोटु छे।" 29 आरू हाव हिमी यी वात होयनेन पेहल तुमूक कय देदु छे, कि जव ची वात होय जाये, ते तुमू विश्वास करू। 30 हाव हिमी तुमरे साथे आरू खुब वातु नी करसु, काहकि इना संसारन सरदार आवतु छे। मखे पर हेरेन कोय हक नी छे; 31 पुन यो एरकरीन हतलो छे कि संसार जाने कि हाव बास साथे मोंग राखतु छे, आरू जोसो बास मखे हुकुम देदु हाव तोसोज करतु छे। उठु या रईन चालु।