1 "सच्ची दाखलता हाव छे, आरू मारू बास किसान छे। 2 जी झाड़कान डाव मखे मा छे आरू नी फवती, उका त्यो काट नाखे छे; आरू जी फवती छे, उका त्यो छाटो देतु छे काहकि आरू फवे।" 3 तु ते तीन वचन क कारण जो हाव तुमूक कयो छे, चुखो हुयो। 4 तु मखे मा बवना रवु, आरू हाव तुमूक मा। जोसो डाव जेतार दाखलता मा बवनी नी रवे, ते आपने आपसेमा नी फव सके, तोसाच तुमू भी मखे मा बवना नी रवे ते नी फव सकता। 5 हाव दाखलता छे: तुमू झाड़कान डाव छे। जु मखेमा बवनु रोवतु छे आरू हाव ओकामा, चाँ बैस फव फवता छे, काहकि मखे रईन अलग होईन तु काहय नी कर सके। 6 यदि कोय मखेमा बवना नी रवे, ते ओका सी डावन सारखा नाख देता छे, आरू सुख जातु छे; आरू मानसे हेको उचलीन आगठा मा नाख देता छे, आरू चाँ सिलगी जाती छे। 7 यदि तुमू मखे मा बवना रवु आरू मारो वचन तुमू मा बवनो रवे, ते जो चाहे चो मांगु आरू चो तुमरे करता होय जाछे। 8 मार बासन महिमा एर रईन हतली छे कि तुमू बैस फवे लावु, तव तुमू मारा चेला ठरहत। 9 जोसो बास मारमा मोंग राख्यु, तोसोज हाव तुमूक पर मोंग राखतु छे; मार मोंग मा बवना रवु। 10 यदि तुमू मार हुकुम मानता छे, ते मार मोंग मा बवना रवसे; जोसो कि हाव आपसा बासन हुकुम काजे मानला छे, आरू हेरेन मोंग मा बवना रवता छे। 11 हाव यी वात तुखे एरकरीन कयो छे, कि मार खुशी तुमूक मा बवना रवे, आरू तुमरो खुशी पुरो होय जाये।

12 ✝ 15:12 यहुन्ना 13:34; 15:17; 1 यहुन्ना 3:23; 2 यहुन्ना 1:5 "मार हुकुम यी छे, कि जोसो हाव तुमू पर मोंग राख्या, तोसोज तुमू भी एक दिसरा साथे मोंग राखु।" 13 एर रईन मोटो मोंग काहनान नी कि कोय आपसा दोस्तन करता आपनु जीव आपदेय। 14 जी हुकुम हाव तुमूक देतु छे, यदि उका माने ते तु मार दोस्त छे। 15 हिमी रईन हाव तुमूक दास नी कयो, काहकि दास नी जानतु कि हेरेन पोरबु काय कयतु छे; पुन हाव तुमूक दोस्त कयो छे, काहकि हाव जी वातु आपसा बास जु सोंब्यु, ची सब तुमूक कय देदु। 16 तुमू मखे नी निवाड़्या पुन हाव तुखे निवाड़या छे आरू तुमूक नियुक्त कर्‍यु कि तु जाईन फव लावु आरू तुमूरो फव बवनु रवे, कि तु मार नाव से जो काहय बास पर मांग्यु, त्यो तुमूक आपे। 17 ओको वातन हुकुम हाव तुमूक एरकरीन देतु छे कि तुमू एक दिसरा मोंग राखु।

18 "यदि संसार तुमक रईन बैर राखता छे, ते तुमू जानता छे कि त्यो तुमूक रईन पेहल मखे रईन बैर राख्या।" 19 यदि तु संसारन रोवतु, ते संसार आपसा तोसु मोंग राखतु, पुन इना कारण कि तुमू संसारन नी छे, वरना हाव तुमूक संसार मा रईन निवाड़ लेदु छे, ओको करता संसार तुमूक से बैर राखतु छे। 20 ✝15:20 मत्ती 10:24; लूका 6:40; यहुन्ना 13:16जी वात हाव तुखे कयो हतु, "दास आपसा भगवान रईन मोटु नी होतलु" उका याद राखु। यदि चाँ मखे विताड्या, ते तुमूक भी विताड़छे; यदि चाँ मार वात मान्या, ते तुमरी भी मानछे। 21 पुन यो सब काहय चाँ मार नावन कारण तुमरे साथे करसे, काहकि चाँ मारा मोकलनेवाला नी जानता। 22 यदि हाव नी आवतु आरू उकासे वात नी करता, ते त्यो पापी नी ठरतु; पुन हिमी हेको हेरेन पापन कारण कोय बहानो नी जुवे। 23 जु मार छे बैर राखतु छे, त्यो मार बास छे बैर राखतु छे। 24 यदि हाव ओका चो काम नी करे जो आरू कोय नी कर्‍यु, ते चाँ पापी नी कहवाये; पुन हिमी ते चाँ मखे आरू मार बासक दुय काजे देख्या आरू दुयो से बैर कर्‍या। 25 यो एरकरीन हुयो कि चो वचन पुरो होय, जो ओका व्यवस्था मा लिख्यो छे, "चाँ मखे से व्यर्थ बैर कर्‍या।" 26 पुन त्यो मदतगार आवसे, जिनाक हाव तुमरे जु बासन तरफ रईन मोकलसु, मतलब सच्चाई आत्मा जी बासन तरफ से निकलती छे, ते त्यो मार गवाय देसे; 27 आरू तुमू भी मार गवाय छे काहकि सोरू रईन तुमू मार साथे रोवला छे।