João 21

तिबिरियुस नदीन काट पर चेला प्रकट होयनु

1 इनी वात न ओळतेन ईशु आपसा क तिबिरियुस बन्धा न धोड़े चेलाक नेळतालाक देखाङ्यों आरू इनी रीति रईन देखाय पड़्यो। 2 शमौन पतरस आरू थोमा जु दिदुमुस कहवतो छे, आरू गलीलन काना शहरो न नतनएल आरू जबदी ना पोर्‍या, आरू हेका चेला नेळताळा मा एक आरू जन भैळा हुतो। 3 शमौन पतरस हेन क कयो, "हां माछा धरने क जाम" त्या हेके कयो,

"हामु भी तारे पुठी आवजे" एका करता त्या निकळीन नाळ पर चढ़ीया, पर तीनि रात त्या काहय नी धोर्‍या। 4 भोळभाको होयतात ईशु धोङ मा ऊबो हुयो; ओळतेन भी नेळताळा हेको नी उळखिया कि यो ईशु छे। 5 तव ईशु तीनुक कयो, "ए नानला पोर्‍या, काय तुमरे जुळ खाने करिन काहय माछली छे?"

त्या ईशु क जवाब दिदा, "नी होय"

6 ✝ 21:6 लूका 5:6 ईशु उन लोगहन क कयो, "डोंगा न जेवड़ा तरफ जाळ नाखो, ती तुमूक जोड़से।" तव त्या जाळ नाख्या, आरू हाय माछा घोण ढेरका आय ज्या तेर सी जाळ नी हापकनेन शक्ति नी हती।

7 "एरकरीन त्यो नेळताळो जिना सी ईशु मोंग करतो होतो पतरस से कयो, यो ते पोरबु छे।" शमौन पतरस यो सोमळीन कि पोरबु छे, कमर मा कनाट्यो कसीन बांध लेदो, काहकि त्यो नांगरो होतो, आरू बांधा मा कुदी गयो। 8 बाकी आरू नेळताळा ढोंड्या पर माछा छे भरायली जाळ हापेकता जाईन आश, काहकि त्या धोड़े छे घोणा दूर नीहि, पर काय दूय सौ हात दूर हुता। 9 जव डोंगा धोड़े उतरिया, ती त्या कुयला न आगठी, आरू उका पर माछली मेकला रोटा देख्या। 10 ईशु तीनुक कयो, "जो मासा तुमू हाय धोरला छे, तीनाम से थुड़ाक लावु।"

11 शमौन पतरस डांगा पर चढ़ीन एक सौ न तिरपन मासा से भरायली जाळ धोड़े हापक्या, आरू हतरा मासा हुयने पर भी जाळ नीहि फाटी।