1 दुई दाहड़ा क बाद फसह आरू अखमीरी रोटा क पर्व हुयने वावा हुता। डाहला पुजारा आरू शास्त्री इन वात की खोज मा हुत की ईशु क कोसो छल छे धर कर मार नाखने; 2 पुन कये हुते, "पर्व क दाहडू नी, कयी ओसो नी होय की मानसे मा बलवा मच्या।"

3 ✝जव ईशु बैतनिया मा शमौन कुड़ावा क घर खाने क बट्या हुया हुता, तव एक बायर संगमरमर क ठाहरा मा जटामासी क मोहंगलो चुखो इत्र लीन आवी: आरू पात्र तुड़ीन इत्र क ओको मुनक पर नाखीन। 4 पुन काही आपने मन मा रिसियाने कयनो लाग्या, "इन इत्र क काय सच्चाईानाश कर्‍या गया? 5 काहकि यो इत्र तो तीन सौ सोनान सिक्‍का सवटो मूल्य मा वेचिया जाय कर गरीब मा वाट्या जाय सकता हुता।" आरू वो ओको झाटकने लाग्या। बाटली मा इस्तरन तेल

6 ईशु ने कयो, "उको छुड़ी दो; उको काय सताते होय? उना ने तो मारे साथे भलाई करी छे। 7 गरीब तुमरे साथ मा जलोम रहवे, आरू तुमू जब जुवे तव उनछे भलाई कर सकते होय; पर हाव तुमरे साथे जलोम नी रहवे। 8 जो काय वो कर सकी, त्यो कर्‍यो; त्यो मारे गाड़ने जाने की तीयारी मा पेहले छे मारी देह पर इत्र लागाड़ी छे। 9 हाव तुमू छे सच कयता छे की सब धरतीम मा वा कयी खुश खबर कर्‍या जाछे, वाँ ओका इनीये काम की चर्चा भी ओको फोम की जाछे।"

10 तव यहूदा इस्करियोती जो बारा चेला मा रयन एक हुता, डाहला पुजारा क साथे गया की ईशु क ओको हात धरीन देय। 11 वो यो सोमवीन खुश हुयो; आरू ओको पोशा आपने वायदो कर्‍यो; आरू वो मेखे हेरने लाग्या की ओको काही प्रकार धरीन देय।

12 अखमीरी रोटा क पर्व क पेहले दाहडु, जिनमा वो फसह क बलिदान करता हुते, ईशु क चेला ने उको पुछा, "तु कयो जुवे छे की हामु जाईन तारे करता फसह खाने की तीयारी कर्‍या?"

13 त्यो ओका चेला मा सी दुय क यो कयीन मुकल्यो, "नगर मा जावु, आरू एक मानुस पानी क हाण्डो हाकलीन हुया तुमू मीवछे, ओका पछव होय लेन: 14 आरू वो जिना घर मा जाय, उना घर क भगवान छे कयनो, ‘गुरू कयता छे की मारी पाहंनतराय शाला जिनमा आपसा चेला क साथे फसह खावु कयो छे?’ 15 वो तुमू एक सजी–सजावळी, आरू तीयार करी हुयी मोटी कमरो देखाय देसे, वो हामरे करता तीयार करू।"

16 चेला निकवीन नगर मा आश, आरू जोसो त्यो उनछे कयो हुता, वोसो ही देख्या; आरू फसह तीयार कर्‍या।

17 जव शाम हुयी, तो वो बारा क साथे आयु। 18 जव वो बठ्या खाने क रया हुते, तो ईशु ने कयो, "हाव तुमू छे सच कयता छे की तुमू मा छे एक, जो मारे साथे खाने क रया छे मखे धरावछे।"

19 चेला उदास होय गयो आरू एक करीन ओको पुछने लाग्या, "काय चु हाव ते नी छे?"

20 त्यो उनछे कयो, "वो बारा मा छे एक छे, जो मारे साथे थावी मा हात नाखता छे। 21 काहकि मानुस क पोर्‍या मतलब मखे तो जोसो ओको विषय मा लिख्या छे, जाता ही छे; पुन उना मानुस पर हाय ओका द्वारा मानुस क पोर्‍या मतलब मखे धराया जाय छे! यदि उना मानुस क जनम नी हुता तो ओको करता भलो होयतो।"

22 जव वो खाय ही रया हुते, ईशु ने रोटा लीन, आरू सय बरकत मांगीन तुड़ी तीनुक दी, आरू कयो, "ले, यो मारी देह छे।"

23 पछु त्यो वाटको लीन धन्यवाद कर्‍या, आरू तीनुक दिया; आरू उन सब ने उको छे पीया। 24 आरू त्यो कयो, "यो भोनु की मारो लुहूय यो छे, जो खुप क करता वयाड़े जा छे। 25 हाव तुमू छे सच कयता छे की अंगुर क रस उना दाहड़े तक पछु कदी नी पीस, जव तक यहोवा–भगवान क राज्य मा नयो नी पीस।"

26 पछु वो भजन गावीन बाहरता जैतुन क बयड़ा पर गया।

27 तव ईशु ने उनछे कयो, "तुमू सब ठुकर खासे, काहकि लिख्या छे: ‘हाव गुवाळ क मारीस, आरू गाडरा इदीर तितर–बितर होय जाछे।’ 28 ✝पुन हाव म्हार जीव उठने क बाद मा तुमरे सी पेहल गलील मा जाईस।"

29 पतरस ने ओको कयो, "यदि सब ठुकर खाय तो खाय, पर हाव ठुकर नी खाम।"

30 ईशु पतरस सी कयो, "हाव तुखे छे सच कयता छे की आज ही इनी रात क कुकड़ा क दुई कावा वाषने देने छे पेहले, तु तीन कावा मखे छे मुकर जाछे।"

31 पर त्यो आरू भी जो सी दीन कयो, "यदि मखे तारे साथे मरना भी पड़े तीभी तारे मना कदी नी करीस।"

इनी प्रकार आरू सब ने भी कयो।

32 पछु वो गतसमनी नावन एक धरती मा आश, आरू ईशु ने आपसा चेला छे कयो, "याहा बठ्या रयो, जव तक हाव प्रार्थना करीस।" 33 आरू वो पतरस आरू याकूब आरू यहुन्ना क आपने साथे लेय गया; आरू खुप ही कमजोर आरू घबरायने हुयने लाग्या, 34 आरू त्यो कयो, "मारो मन खुप नराज छे याहा तक कि हाव मरना पर छे: तुमू याहा तक रूकु आरू जागता रयो।"

35 पछु वो थुड़ा अगळ ओगस आरू धरती पर टेकीन प्रार्थना करने लाग्यो की यदि होय सके तो यो घड़ी मखे पर छे टल जाय, 36 आरू कयो, "हे बाप, मखे छे सब काय होय सकता छे; इनीये वाटका क मारे साथे छे हटाय लेय: तव जोसो हाव जुवता छे वोसो नी, पर जो तु जुवता छे चो होय।"

37 पछु वो आश आरू तीनुक सुवता देखीन पतरस छे कयो, "हे शमौन, तु सुई रया छे? काय तु एक घड़ी भी नी जाग सके? 38 जागता आरू प्रार्थना करता रयो की तुमू परीक्षा मा नी पडु। आत्मा तो तीयार छे, पर शरीर दुर्बल छे।"

39 आरू वो पछु चालीन गया आरू तीनुक ओवाज मा प्रार्थना करी। 40 पछु आवीन तीनुक सुवता देख्या, काहकि ओकी डुवा नींद छे भर्‍या हुता; आरू नी जानता हुते की ओको काय जवाब देय।

41 पछु तीसरी बार आवीन उनछे कयो, "हिमी सुवता रयो आरू आराम करो, बस घड़ी आय पुच्या; देखो मानुस क पोर्‍या मतलब मखे क पापी क हात धराया जाता छे। 42 उठु चालु! देखो, मखे धरावने वावा नाट आय गयो छे।"

43 ईशु यो कय ही रया हुता की यहूदा जो बारा मा छे एक हुता, आपने साथे डाहला पुजारा आरू शास्त्री आरू पुरनियो की आरू छे एक मोटी गर्दी लीन तत्काल आय पुच्या, जो तलवार आरू ड़ेगा लीन हुता। 44 ओको धरावने वावा ने तीनुक यो पता दीया हुता की जिनाक हाव गुवू चो छे, उको धरीन यत्न छे ली जाने।

45 वो आश, आरू तत्काल ओको साथे जाईन कयो, "हे गुरू!" आरू ओको घोणा चूमा। 46 तव लोगहन ईशु पर हात नाखीन आरू उको धर लेदा। 47 उन मा छे जो साथे उबो हुतो एक ने तलवार हापक कर पुजारा क दास पर चालाड़ी, आरू ओका कांटो तुड़ देदो। 48 ईशु ने उनछे कयो, "काय तुमू डाकू जानीन मखे धरने क करता तलवार आरू ड़ेगा लीन निकव्या होय? 49 ✝हाव तो हर दाहड़े मंदिर मा तुमरे साथे रयन खबर दिया करतो हुतो, आरू तव तुमू ने मखे नी दरिया: पुन यो एरकरीन हुयो छे की चुखलो शास्त्र की वात पुरी होयछे।"

50 इनीये पर सब चेला ओको छुड़ीन ढास गया।

51 एक जुवान आपसी उघाड़ा डील पर चादर पांगरी हुयो ओको पछव होय लेदा; आरू मानसे ने ओको दरिया। 52 पर वो चादर छुड़ीन उघाड़ा ढ़ास गया।

53 पछु वो ईशु क डाहला पुजारा क साथे ली गया; आरू सब प्रधान पुजारा आरू पुरनिय आरू शास्त्री ओका याहा एखठा होय गया। 54 पतरस दुर ही दुर ओको पोछव–पछव डाहला पुजारा क आंगना मा माहाय तक गया, आरू प्यादो साथे बठीन आगठी तापने लाग्या। 55 मुखी पुजारा आरू सारी महासभा ईशु क मार नाखने क करता ओको विरोध मा गवा की खोज मा हुते, पर नी मिवी। 56 काहकि घोणा छे ओको विरोध मा झुठ गवा दे रया हुते, पर ओकान गवा एक ओसी नी हुती।

57 तव काय मानसे ने उठीन ओको क विरोध यो झुठ गवा देदी, 58 ✝"हामु इना ओसो कये सोमव्या छे, हाव इन हाथ क बनायू होय मंदिर क उदार दीस, आरू तीन दहाड़ा मा दिसरा बनाय दिस, जो हाथ छे नी बने होय।" 59 इनीये पर भी उनकी गवा एक ओसी नी निकवी।

60 तव डाहला पुजारा ने वीच मा उबो हईन ईशु छे पुछा, "तु काही जवाब नी देतो?"

61 पुन वो चुप रियो, आरू काय जवाब नी दिया। डाहला पुजारा ने ओका सी पछु पुछा, "काय तु उना सयाळा धन्य क पोर्‍यो मसीह छे?"

62 ईशु ने कयो, "हाव छे: आरू तुमू मानुस क पोर्‍यो क ताकत वाळा यहोवा–भगवानन क जेवड़े तरफ बठ्या, आरू वादळा साथे आवता देखछे।"

63 तव डाहला पुजारा आपसा छिंदरा फाड़ीन कयो, "हिमी हामु गवा क आरू काय योजना छे?"

64 तुमू ने यो निन्दा सोमवीन। तुमरी काय राय छे? 65 तव काही तो ओका पर थुप्या, आरू काही ओका मुय ढांकने आरू उको धुमाट्या,

आरू ओको कयनो लाग्या, "भविष्यव्दाणी कर!" आरू पौलुसने ओको धरीन थापुड़ मारा।

66 जव पतरस नेचो आंगना मा हुता, तो डाहला पुजारा की दासीयो मा छे एक वाँ आवी, 67 आरू पतरस क आगठो तापता देख्या उको टकटकी लागाड़ ़ी देख्या आरू कयनो लाग्या, "तु भी तो उना नासरत ईशु क साथे हुता।"

68 वो मुकर गया, आरू कयो, "हाव नी जानता आरू नी समझता छे कि तु काय कय रयी छे।" पछु वो बाहरता डेवढ़ी मा गया; आरू कुकड़ा वाषा।

69 वो दासी उको देखीन उनछे जो साथे उबो हुतो, पछु कयनो लागी, "यो उनमा छे एक छे।"

70 पुन वो पछु मुकर गया। थुड़ी वार बाद त्या जो साथे उबो हुत पछु पतरस छे कयो, "छाचो तु उनमा छे एक छे: काहकि तु गलीली भी छे।"

71 तव वो धिक्‍कारने आरू शपथ खाने लाग्या, "हाव उना मानुस क जेरी तुमू चर्चा करता होय, ओखे नी जानता।"

72 "तव तत्काल दूसरी बार कुकड़ो वाषो।" पतरस क वो वात जो ईशु ने ओका सी कयी हुती फोम आवी: "कुकड़ा दुई कावा वाषा ने छे पेहले तु तीन कावा मना करीस।" आरू वो इन वात क सुचीन रड़णे लाग्या।