1 जव आराम क दाहडु वीत गयो तो मरीयम मगदलीनी, आरू याकूब की माय मरियम, आरू सलोमी ने सुगन्ध इत्र समान मुवे लीन की आवीन ईशु क डील पर लागाड़या। 2 हापतान क पेहलो दाहडु मोटो सदारे जव दाहडु निकव्यु ही हुती, वो मोड़वाट्या पर आवी, 3 आरू आपस मा कयती हुती, "हामरे करता मोळवट्याम क झपला पर छे दगडू कुन धकल्यो?" 4 जव त्या डुवा उघाडीन, तो देख्या की दगडू धकल्यो हुया छे वो खुप ही मोटा हुता। 5 मोड़वाट्या क माहीय जाईन त्या एक जुवान क धव्व्या डोगला पेहरीन हुयो जेवड़ा तरफ बठ्या देख्या, आरू खुप भोंगलाय हुयी।

6 त्यो उनछे कयो, "चकित मत होय, तुमू ईशु नासरत क, जो कुरूस पर चढ़ाया गया हुता, हेरती होय। वो जीव उठ्यो छे, याहा नी छे; देख, यी वो स्थान छे, वा त्या ओको राख्या हुता।" 7 ✝"पुन तुमू जायन, आरू ओका चेला आरू पतरस छे कयो की वो तुमू छे पेहल गलील क जाछे। जोसो ओका तुमु क कयो हतो, तुमु चाँ ओका हेरजु।"

8 आरू ची मोळवट्याम बाहरते निकलीन ढास गयो; काहकि कापती आरू घाबराई उका पर छा गयो; आरू त्या कुदाक काहय नी कयी काहकि ची बीहिती हुती।

9 यो आयते जुनला नियम नी देखाय गयी हापतान क पेहल दाहडु सदारे होते ही ईशु जीवीन उठीन पेहल मरियम मगदलीनी क जिनमा छे त्यो सात साहळा निकावी हुती, देखाय दिया। 10 त्यो जाईन ईशु क साथी क शोक मा डूबे हुयो हुते आरू रड़ रयो हुते, खबर देदो। 11 त्या यो सोमवीन की वो जीवतो छे आरू त्यो देख्या छे, काहकि त्या पर ओका विश्वास नी हता।

12 ओका बाद ईशु दिसरा रूप मा उनमा छे दुई क जव वो गाव की आरू जाय रया हुता, देखाय दीया। 13 त्या भी जाईन दिसरा क खबर दीया, पुन त्या उनकी भी भुरसो नी करी।

14 पछव ईशु उन ज्यारे क भी, जव वो रोटा खाने बठ्या हुता देखाय दीया, आरू उन लोगहन क विनभुरसा आरू मन की वातड़ो हुयने पर उलाहना दीया, काहकि जिन्होने ओको जीव उठने क बाद ओको देख्या हुता, या उनकी भुरसो नी करी हुती। 15 ✝आरू त्यो ओका कयो, "तुमू सब जगमा जाईन सब धरती पर मानसक क यी खुश खबर सोमवाड़ु। 16 जो विश्वास करसे आरू बपतिस्मा लेछे तीनी क उध्दार होयछे, पुन जो विश्वास नी करसे वो दोषी ठहराय जाछे; 17 जो विश्वास करनेवावा मा यो सहलानी होयछे की वो मारे नाव छे साहळा क निकावछे नोवली भाषा बुलछे, 18 घड़सा क उठाय लेछे, आरू यदि वो प्राणनाशक समान भी पी जाय तीभी उनकी काय हानी नी होयछे; वो बीमार पर हात राखछे, आरू वो वारू होय जाछे।"

19 ✝पोरबु ईशु ओका सी वात करने क बाद सोरग पर उठाय लेदो गयो, आरू यहोवा–भगवान की जेवड़े; तरफ बठ् गयो।

20 आरू त्या निकवीन हर जागु खबर कर्‍या, आरू पोरबु ओको साथे काम करता रया, आरू उनी सहलानी क लारे वो जो साथ हुयती हुती, वचन क हेरता रया। आमेन)