सांतीनराज्य4:1 यसा, 2:2-4
1 आखरी दाहड़ा मा असो हुयसे की योहोवान मन्दीर असो नी हुये की योहोवा न मन्दीर क बयड़ो सब बयड़ा मा मोटो बनायो जाय, आरु त्यो बयड़ान उपर रयसे, हर जाती न लोगहन हेका भेणी जाणे लाग जाय। 2 त्या आवीन यो कयसे, आवु हामु योहोवा न बयड़ा पर चढ़जे, याकुबन परमेश्वर न मन्दीर मा जाजे, की त्यो हामुक आपसी वाटन सिकापन आपे, आरु हामु हेकेत वाट्ये चालजे, सीयोनन बयड़ा सी नीयम उजेन्ता अहुयसे, योरुसालेम देस सी पोरबु न बुल समळाय पड़से। 3 त्यो घणा देसन लोगहन क नीयाव करसे, आरु ताकत वाळी जाती न झगड़ान क मिटाड़से अतरान करीन त्या आपसी तलवारन क पजावीन हळन कुसला आरु भालान दातऴा बनवाड़से; एक राज्य दीसरा राज्यन वीरुध मा ओळी लड़ाय नी करे। 4 आरु ओळते लोगहन लड़ाय लड़नो नी सिखसे। पुन त्या आपसा ओंगुर आरु अंजीरन झाड़का तळे बठ्या करसे, आरु कोय हेनको नी बीहवाड़े; योहोवा भगवान यो आपसुत् बुल कय आपलो छे। 5 सब राजरन लोगहन आपसा देवी देवता न नाम पर चाले; पुन हामु जलोम हामरा पोरबु परमेश्वरन नाव पर चालसु।
बन्दवाय सी इसराएल न छुटीन आवनो
6 योहोवान यो बुल छे, उना टेम मा मानसो लेंगड़ा लुलान क एखटा करीस, आरु जीनुक हांव दु:ख दीदलो छे हेनु सबन क एखटा करीस; 7 आरु लेंगड़ा लुलान क हांव वाचाड़ीन राखीस, आरु दुर हुयलान क एक ताकत वाळी जाती बनावीस; आरु योहोवा हेनु पर सीयोन बयड़ान उपर रयीन जलोम राज करतो रयसे। 8 ए एदर न कीला आरु सीयोनन बयड़ा, पेहलो हक आरु योरुसालेमन राज तुको जड़से। 9 हाय तु काहको आयड़ी रयी? काय तारे मा कोय राजा नी रयो काय? काय थारी योजना बनावने वाळो नास हुय गयो, जीना सी भारपाय बायन सारको तुको पीड़ा हये? 10 ए सीयोनन परजा भारपाय बायरीन सारको तु पीड़ाक झेल; काहकी हाय तु कीला मा रयीन नीकळीन खयड़ा मा रोवनो पोड़से, आरु बेबीलोन तक जाईस, वाहन पोरबु तुको छुड़ावसे, थरा वेरीन हाथ सी तुको योहोवा छुड़आय लेसे। 11 हेमी घोना मुलुकोम तारे वीरुध एकठा होय्न तार वाराम वार कोवसे, सीयोन पुराय काजे वीटोळ कोरजे, आरु हामु आपसा डुळा वेस हेनुक नास होयता देखसु। 12 पुन त्या योहोवा युजनाक नी जाने, नी हेनकी युजना सोमजे की त्यो हेनुक ओसो एकठो कोर देसे जोसो खेतो मा पुळा काजे एकठा कोरे। 13 ए सीयोन उठ आरु मोस, हांव तारा सिगड़ाक लुहड़ान आरु तारा खुर्या पीतळोन बोनाय दीस; आरु बेसका राज्य काजे चुर चुर कोरीस, आरु हेन्दरी कोमाय योहोवाक आरु हेन्दरा माल धोन धोरतीन मालीक काजे चोड़ावसे।