1 हे मारा भाईस, हामरा महिमायुक्त पोरबु ईशु मसीह पर तुमरो विश्वास भेदभाव क साथे नी होय। 2 काहकि जेतार एक मानुस सोनो छल्लो आरू घाटळो लुगड़ा पेहर्‍या होया तुमरी सभा आश, आरू एक गरीब भी किटायला, कुचवायला लुगड़ा पेहर्‍या होया आश। 3 आरू तुमू ओको घाटळो लुगड़ा क मुय देखीन कोवु, "वाँ वारली धरतीम बठ्या" आरू उना गरीब छे कोवु, "तु याहा उबा रोव" या मारा पाय क साथे बठ्या। 4 तो काय तुमू ने आपस मा संका नी कर्‍या आरू बुरे विचार छे न्याय करनेवावा नी ठराय?

5 हे मारा मोंगावु भाईस, सोमवु। काय यहोवा–भगवान ने इनीये धरती क गरीब क नी निवाड़या कि विश्वास मा धनी आरू ओको राज्य क हक होय, जेरी प्रतिज्ञा ओको ने उनछे करी छे जो ओका सी मोंग राखता छे? 6 पुन तुमू ने ओको गरीब क विजुत कर्‍या। काय धनी मानसे तुमू पर वेला नी पाड़े आरू काय वो ही तुमूक कचहरियो मा घसड़ी–घसड़ीन नी ली जाय? 7 काय वो ओको वारलो नाव की निन्दा नी करता जिनाक तुमू कोवायता छे?

8 तौभी तुमू पवित्रशास्त्र इनीये वचन क लारे कि "तु आपसा धड़ेवावा छे आपने समान मोंग राख" सचमुच ओको राज व्यवस्था पूरी करता होय, तो वारला ही करता होय। 9 पर यदि तुमू भेदभाव करता होय तो पाप क दोषी होय; आरू व्यवस्था तुमूक गुणेगार ठेरायती छे। 10 काहकि जो काही सारी व्यवस्था क पालन करता छे पुन एक ही वात मा चूक जाय तो वो सब वात मा दोषी ठराय त्योकी छे। 11 अतरान करीन कि जो यो कयो, "तु व्यभिचार नी करने" तीनी ने यो भी कयो, "हत्या नी करने" एरकरीन यदि तु व्यभिचार तो नी कर्‍या पर हत्या की तौभी तु व्यवस्था क तुड़नो करनेवावा ठेराया। 12 तुमू उन मानसे क समान वचन बुले आरू काम भी करू जिनका न्याय स्वतंत्रता की व्यवस्था क लारे होयछे। 13 काहकि जो दया नी करी, ओको न्याय विना दया क होयछे: निर्दयी, न्याय पर जयवन्त होयती छे।

14 हे मा भाईस यदि काही कये कि मखे विश्वास छे पर वो काम करता होय, तो इनासे काय लाभ? काय ओसो विश्वास कदी ओको उध्दार कर सकता छे? 15 यदि काही भाईस आरू बहिनीस नांगरला उघाड़ला होय आरू हर दाहडु भोजन की घटी होय। 16 आरू तुमू मा छे काही उनछे कये, "कुशल छे जावु, तुमू गरम रवु आरू तृप्त रवु" पर जो समान डील क करता छाची छे वो इनुक नी देय तो काय लाभ? 17 वोसो ही विश्वास भी, यदि काम सहित नी होय तो आपसा स्वभाव मा मरला हुयो छे।

18 वरना काही कय सकता छे, "तुखे विश्वास छे आरू हाव काम करता छे।" आपसा विश्वास मखे काम बिना तो देखाय; आरू हाव आपसा विश्वास आपने कामो क द्वारा तुखे आपाड़ीस। 19 काय तुखे विश्वास छे कि एक ही यहोवा–भगवान छे; तु वारलो करता छे। साहळा भी विश्वास राखता, आरू थरथराता छे। 20 पर हे निकम्मी मानुस काय तु यो भी नी जानता कि काम बिना विश्वास व्यर्थ छे। 21 जव हामरा बास अब्राहम ने आपनो पोर्‍य इसहाक क वेदी पर चढ़ाया, तो काय वो कामो छे न्यायी नी ठेराया हुता? 22 शेवली कावा तु ने देख लेदा कि विश्वास ने ओका काम छे विश्वास सिध्द होया। 23 आरू चुखलो शास्त्र क यो वचन पूरो होया: "अब्राहम ने यहोवा–भगवान क विश्वास कर्‍या, आरू यो ओका करता न्यायी गिना गया" आरू वो यहोवा–भगवान क दोस्त कोवायता। 24 इनीये प्रकार ने देख लेदा कि मानुस केवल विश्वास छे ही नी, वरना कामो छे भी न्यायी ठेरायता छे।

25 वोसो ही राहाब वेश्या भी, जव त्यो क आपने घर मा उतरीया आरू दीसर मार्ग छे विदा कर्‍या, तो काय कामो छे न्यायी नी ठराय।

26 शेवली कावा जोसो देह आत्मा विना मरी होयी छे, वोसी ही विश्वास भी काम विना मर्‍या होया छे।