योहोसु 13

बाद मा जीगता गया राज्य

1 योहोसु डाहलो आरु बैस उमोर होय गयो हतो; आरु योहोवा ओकाह कयो, "तु डाहलो आरु बैस उमोर होय गयो छे, आरु बैस देश रय गया छे, जा इस्राएलक हक मा हिमी तक नी आया। 2 या देश रय गया छे, मतलब पोलिस्तीयाक सब प्रान्त, आरु सब गशुरी 3 (मिसरन ओगव शीहोर सी लीन उत्तरन तरफ एक्रोनक सीमा तक जु कनानीया क भाग गिवनु जातु छे; आरु पलिश्तियाक पाँचु सरदार, मतलब अज्जा, अशदोद, अशकलोन, गत, आरु एक्रोनक लोगहन), आरु दक्षिणक तरफ अव्वी भी, 4 पछा अपेक आरु एमोरियाक सीमा तक कनानियाक सब देश, आरु सीदोनियाक मारा नावन देश, 5 पछु गवालियाक देश, आरु सुर्‌योदयक तरफ हेर्मोन बोयड़ाक नेड़ला बालगाद सी लीन हमातक घाटी तक सब लबानोन, 6 पछा लबानोन सी लीन मिसर मिस्रपोतमैम तक सीदोनियाक पहाड़ी देशक निवासी। इनुक हाव इसराएलीयाक सामने सी निकाळ दिस; ओतरो होय के तु मारा हुकुमोक अनसारे चिट्ठी न्हाख न्हाखिन उनाक देश इस्राएलक वाट दे। 7 एरकरता तु हिमी ओका देशक नोव गोत्रा आरु मनश्शेन आदा गोत्राक उनाक भाग होयने करता वाट दे।"

यरदनक पेहलो भागन बँटवारो

8 रुबेनिया आरु गादियाक ते चो भाग जोड़ चुक्यो हतो, जेका मुसु हेका यरदनक पुर्व दिशान तरफ देदो हतो, काहकी योहोवाक दास मुसु यो हेकाक आप देदु हतु, काहकी योहोवाक दास मुसु यो हेनाक आप देदु हतु, 9 मतलब अर्नोन नावन घाटीन किनाराक अरोएर सी लीन, आरु उका घाटीन वीच माहयलो नगरक छुड़ीन दीबोन तक मेदबाक जु सब चोरस देश; 10 आरु अम्मोनियाक सीमा तक हेशबोन मा बोठनेवाळा एमोरियाक राजा सीहोनक सब नगर; 11 आरु गिलाद देश, आरु गशुरिया आरु माकियावासियान सीमा, आरु सब हेर्मोन बोयड़ा, आरु सलका तक सब बासान, 12 पछु आशतारोत आरु एद्रेई मा बोठनेवाळा ओका ओगव क सब राज्या जा रपाया मा सी एखला वाच गया हता; काहकी बासानक मुसु मारीन उनाक प्रजाक तीना देशम रईन निकाळ देदा हता। 13 पुन इसराएलीया गशुरिया आरु माकियाक उनाक देश सी नी निकाळ्या; एरकरता गशुरी आरु माकी इसराएलीयाक वीचमा आज तक रयता छे। 14 आरु लेवीन गोत्रियाक ओको कोय भाग नी देदा; काहकी इस्राएलक परमेश्वर योहोवाक वचनक अनसारे ओकाक हव्य उनाक करता डास निकळ्या छे।

रुबेनक गोत्राक आपलो गयो भाग

15 मुसु रुबेनक गोत्राक उनाक कुलोक अनसारे आप्या, 16 मतलब अर्नोन नावन घाटीन धोड़े अरोएर सी लीन आरु ओकी घाटीक वीच माहयला नगरक छुड़ीन मेदबाक साथेवाळो सब चोरस देश; 17 पछु चोरस देश मा हेशबोन आरु ओकाक सब गाँव; पछा दीबोन, बामोतबाल, बेतबाल्मोन, 18 यहसा, कदेमोत, मेपात, 19 किरयातेम, सिबमा, आरु तराई मा पहाड़ पर बोठलो सेरेथश्सोहोर, 20 बेतपोर, पिसगाक ढलान आरु बेत्यशीमोत, 21 मतलब चोरस देश मा बोठला होया हेशबोन मा बोठनेवाळा एमोरियाक उका राजा सीहोनक राज्याक सब नगर जिनाक मुसु मार लेदु हतु। मुसु एवी, रेकेम, सुर, हुर, आरु रेबा नावन मिद्यानक प्रधानक भी मार न्हाख्या हता जो सीहोनक ठरायो होयो हाकिम आरु ओका देशक निवासी हता। 22 आरु इसराएलीया उनाक आरु मारे होयाक साथ बोरक पोर्‌यो ओगवायती वात कोवनेवाळा बिलामक भी तलवार सी मार न्हाख्या। 23 आरु रुबेनियाक सीमा यरदनक धोड़े उभी रयी। रुबेनियाक भाग उनाक कुलक अनसारे नगर आरु गावो समेत या रयी।

गादक गोत्राक आपलो गयो भाग

24 पछु मुसु गादक गोत्रियाक भी कुलक अनसारे उनाक भाग करिन वाट देदा। 25 तव यो ठर्‍यो, मतलब याजेर आदि गिलादक सब नगर, आरु रब्‍बाक सामनेन अरोएर तक अम्मोनियाक आदो देश, 26 आरु हेशबोन सी रामत मिस्पे आरु बोटोनीम तक, आरु महनेम सी दबीरक सीमा तक, 27 आरु तराई मा बेथारम, बेतनिम्रा, सुक्कोत, आरु सापोन, आरु हेशबोनक राजु सीहोनक राज्याक वाचला भाग, आरु किन्नेरेत नावन तालक सिरे तक, यरदनक पुर्वन तरफन चो देश जेरी सीमा यरदन छे। 28 गादियाक भाग उकान कुलक अनसारे नगर आरु गाव समेत या उबो रई।

मनश्शेक आदा गोत्राक आपला गयो भाग

29 पछु मुसु मनश्शेक आदा गोत्रियाक ओकान निज भाग करिन देदा; चो मनश्शेइयाक आदो गोत्राक निज ओकान कुलक अनसारे ठर्‍या। 30 हेनको जागान सेड़ो यो छे, मतलब महनेम सी लीन बासानक राजु ओगक राज्याक सब देश, आरु बासान मा बठली होई याईर क साठों बस्तिया, 31 आरु गिलादक आदो भाग, आरु अशतारोत, आरु एद्रेई, जो बासान मा ओगक राज्याक नगर हता, या मनश्शेक पोर्‌यो माकीरक ओवलियाद क, अनसारे ठहरे।

32 जा भाग मुसु मोआबक अराबामा योरीहोक जु यरदनक पेहल वाट देदा चा या छे। 33 पुन लेवीक गोत्राक मुसाक कुई भाग नी देदा; इस्राएलक परमेश्वर योहोवाज आपना वचनक अनसारे ओकान भाग ठरे।