योहोसु 9

गिबोनिया योहोसु धुको दीदा

1 यो सोमवीन हित्ती, एमोरी, कनानी, परिज्जी, हिब्बी, आरु यबुसी, जोतरा राजा यरदनक ओका पार पहाड़ी देश मा आरु नेड़ला देश मा, आरु लबानोनक सामनेक महासागरक काठ पर रयता हता, 2 चा एक मन होईन योहोसु इसराएलीया सी लड़नेक एकठा होया। 3 जव गिबोनक निवासिया सोमव्या कि योहोसु योरीहो आरु ऐ सी काय काय कर्‌या छे, 4 तव हेका छल कर्‌या, आरु राजदुतक भेष बनावीन आपना गदड़ा पर पुराना बोरे, आरु पुराना फाटला आरु जोड़ लागला होया मदिराक कप्पा लादीन 5 आपना पायो मा जुन्ली पैबन्द लागाड़ला खासड़ा, आरु डिल पर जुन्ला छिंदरा पेहरी, आरु आपना खानान करता नबनुखी आरु फफुँदी लागाड़ला रुटो ली लेदा। 6 तव चा गिलगाल क छावनी होई योहोसुक जु जाईन ओकाह आरु इसराएली मानसक कयने लाग्या, आमु दिसरा देशम सी आया छे; एरकरता हिमी तुमु आमुसी वाचा बाँधु। 7 ✝9:7 व्यवस्थाविवरण 7:2इसराएली मानसे उना हिब्बीया सी कया, काय जानु तुमु आमरा मध्य माज रयता होसे; पछा आमु तुमु सी वाचा कोसा बाँधजे? 8 हेका योहोसु ओकाह कयो, आमु तारा दास छे। तव योहोसु ओकाह कयो, तुमु कुन छे? आरु काह सी आया होसे? 9 हेका ओकाह कयो, तार दास बैस सेटला देश सी तारा परमेश्वरन योहोवाक नाव सोमवीन आया छे, काहकी आमु सब यो सोमव्या छे, मतलब ओकान कीर्ति आरु जो काहय ओको मिसर मा कर्‍यो, 10 आरु जो काहय ओको एमोरियान दुयु राजा कर्‌या जा यरदनक तीन पार रयता हता, मतलब हेश्बोनक राजु सीहोन सी, आरु बासानक राजु ओगळ सी जो अशतारोत मा हता। 11 एरकरता आमरे यान डाहला लोगहन आरु आमरा देशक सब निवासिया आमु सी कया, कि वाटक करता आपने जु भोजनक चीज लीन ओकाह मेळनेक जाऊ, आरु ओकाह कयनु, कि आमु तुमरा दास छे; एरकरता हिमी तुमु आमुसी वाचा बाँधु। 12 जिन दाहड़े हामु तुमरे जु चालने निकळे उके दाहड़े ते हामु आपने आपने घर सी रोटो तातलो आरु ताजी ली हती; पुन हिमी देखु, यो सुख गयो छे आरु इकामा बुर्थाय गईली छे। 13 पछा या जा मोंद हामु भर लेदा हता, तव ते नोवला हता, पुन देखु हिमी या लाम्बली जात्राक कारण जुन्ली होय गई छे। 14 तव उना लोगहन योहोवा सी नी पुछिया आरु उना माईन थुड़ंक खानो ली लीदा। 15 तव योहोसु उनाक मेळ करिन उनासी यी वाचा बाँधी कि तुमुक जीवता छुड़ु; आरु मण्डलीक प्रधाने उनाक शपथ खादी।

16 उनाक साथे वाचा बाँधनेक तीन दाहड़ाक बाद उनाक यो खबर मेळे, कि चा हामरे नाट रयनेवाळा लोगहन छे, आरु आमरेज वीच मा बोठला छे। 17 तव इसराएली कुच करिन तीसरे दाहड़े उनाक नगरक जिनान नाव गिबोन, कपीरा, बेरोत, आरु किर्यत्यारीम छे पुग गया, 18 आरु इसराएलीया उनाक नी देदा, काहकी मण्डलीक प्रधान उनाक साथे इस्राएलक परमेश्वर योहोवाक शपथ खादी हती। तव सब मण्डलीक लोगहन प्रधानक विरुद्ध कुड़कुड़ावने लाग्या। 19 तव सब प्रधान सब मण्डली सी कयो, आमु उनाक इस्राएलक परमेश्वर योहोवाक शपथ खादी छे, एरकरता हिमी उनाक हाथ नी लागाड़ सकता। 20 आमु उना सी यो करसु कि उका शपथक अनसारे आमु उनाक जीवता छुड़ देसु, नी ते आमरी खादली शपथक कारण आमु पर गुस्सु पड़से। 21 पछा प्राधाने उनाक कयो, चा जीवता छुड़े जाए। अत: प्रधानक ओका वचनक अनसारे चा सब मण्डलीक करता लकड़हारे आरु पाणी भरनेवाळा बनु।

22 पछु योहोसु उनाक बुलावीन कयो, तु ते हामरे वीच माज रयतु छे, पछु तु आमु सी यो कईन काह छल कर्‍यु छे, कि आमु तुमु सी बैस छेठा रयता छे? 23 एरकरता हिमी तुमु शापित होसे, आरु तुमु मा सी ओसा कुई नी रवसे जु दास, मतलब मारा परमेश्वरन भवनक करता लाकड़ा तुड़नेवाळो आरु भरनेवाळा नी होय। 24 हेका योहोसुक जवाब देदो, तार दासक यो नक्की कयो गयो हतो, कि तारा परमेश्वर योहोवा आपनो दास मुसाक आदेश देदी हती कि तुमुक चु सब देश आप देय, आरु ओकान सब निवासियाक तुमरे सामने सी सर्वनाश करे; एरकरता आमु लोगहनक तुमरे कारण सी आपना जियोन कोरता बीह गया। एरकरता आमु ओसो काम कर्‌या। 25 आरु हिमी हामु तारा वश मा छे, जोसो भुल चाल तुखे वारलो लागे आरु ठीक जान पड़े, तोसोज व्यवहार आमरे साथे कर। 26 तव ओको उनाक तोसोज कर्‌या, आरु हेका इसराएलीयाक हाथ सी ओसो बचाड्या, कि चा हेका घात करने नी जुवे। 27 पुन योहोसु उके दाहड़े ओकाह मण्डलीक करता, आरु योहोवा नेवाड़ ले उकामा ओकान वेदीक करता, लाकड़ा तुड़नारा आरु पानी भरनेवाळा नेवाड़ लेदा, जोसा आज तक छे।