1 Simon Petrus, Jesus Christus sien Kjnajcht un Apostel, aun dee, waut dänselwjen wieetvollen Gloowen jekjräajen haben met ons derch de Jerajchtichkjeit von ons Gott un Heilant Jesus Christus: 2 Mucht Jnod un Fräd bie junt toonämen en de Erkjantnis von Gott un von Jesus, ons Har!

3 Soo aus siene jettliche Krauft ons aules jeschonken haft, waut toom Läwen un de Jettlichkjeit deent, derch de Erkjantnis von däm, dee ons beroopen haft derch siene Harlichkjeit un Tugent*, 1Pe 2:9 4 wuaderch ons de jratste un wieetvolle Vespräakjungen jeschonken sent, om daut jie muchten derch dise Deelnäma sennen aun de jettliche Natua, endäm jie utjekleift sent von daut Vedoawen, waut en de Welt es, derch de Lost.

5 Un doawäajen, want aulen Fliet doaraun, flajcht bie junem Gloowen de Tugent bie un bie de Tugent de Erkjantnis Gal 5:6,22 6 un bie de Erkjantnis de Selfstbeharschunk un bie de Selfstbeharschunk de Jedult un bie de Jedult de Jettlichkjeit 7 un bie de Jettlichkjeit de Broodaleew un bie de Broodaleew de auljemeene Leew. Gal 6:10 8 Wiels wan dise Dinja en junt sent un toonämen, moaken dee junt, daut jie nich ful ooda onfruchtboa sent en de Erkjantnis von ons Har Jesus Christus. 9 Wiels wäa dise Dinja nich haft, dee es blint, kortsechtich un vejat von de Reinjunk von siene väaje Sinden. 1Joh 2:9,11 10 Doawäajen, Breeda, doot mea Fliet, junen Roop un Uterwälunk faust to moaken; wiels wan jie dit doonen, woa jie niemols faulen. 11 Wiels soo woat fa junt rikjlich een Engank hanjerieekjt woaren en daut eewje Rikj von ons Har un Heilant Jesus Christus.

12 Doawäajen well ekj nich noloten, junt emma aun dise Dinja to erinren, wan jie dee uk weeten un en de jäajenwuatje Woarheit jestoakjt sent. 13 Ekj acht daut rajcht, soolang aus ekj en dise Woninj sie, junt opp to wakjen derch daut Erinren; 2Kor 5:1 14 wiels ekj weet, daut boolt mott ekj dise Woninj auflajen, soo aus uk ons Har Jesus Christus mie daut kloa-jemoakt haft. Joh 21:18-19 15 Ekj well mie oba beflietjen, daut jie to aule Tiet no mienem Aufscheet, dise Dinja kjennen em Jedajchnis hoolen.

16 Wiels wie sent nich kluak utjedochte Foblen nojefolcht, aus wie junt de Macht un daut Komen von ons Har Jesus Christus to weeten deeden, oba wie wieren Uagenzeijen von siene Majestät. 17 Wiels Hee kjrieech von Gott, däm Voda, Iea un Harlichkjeit, derch soo eene Stemm, dee to Am passieed von de prachtvolle Harlichkjeit: "Dit es Mien leewa Sän, aun däm Ekj Wooljefaulen hab". Mat 17:5 18 Un dise Stemm hieed wie, dee vom Himmel kjeem, aus wie met Am opp däm heiljen Boajch wieren. 19 Wie haben een noch sechret profeetischet Wuat, daut jie goot doonen, junt doano to rechten, soo aus no een schienendet Licht en eene dunkle Städ, bat de Dach aunbrakjt un de Morjenstiern en june Hoaten oppjeit. Ps 119:105 20 Ieeschtens weet dit, daut kjeene Profezeiunk en* de Schreft ut eenem siene ieejne Utlajunk es. 21 Wiels de Profezeiunk kjeem to jane Tiet nich derch däm Mensch sien Wellen; oba heilje Menschen von Gott räden, jedräwen von däm Heiljen Jeist. 2Tim 3:16-17