1 Paulus, een Jefangna von Christus Jesus, un Timotäus, de Brooda, aun Filemon, dän Jeleewden un ons Metoabeida Efs 3:1 2 un Apfia, de Jeleewde un Archippus, ons Metstrieda un de Jemeent en dien Hus: Kol 4:17 3 Jnod met junt un Fräd von Gott, onsem Voda, un däm Harn Jesus Christus!

4 Ekj dank mienem Gott un erwän die emma en miene Jebäda, 5 wiels ekj von diene Leew un däm Gloowen hia, dän du aun dän Harn Jesus hast un to aul de Heilje, 6 om daut de Jemeenschoft von dienem Gloowen mucht wirkjsom woaren en de Aunerkjanunk von aul daut Goode, daut en junt es en Christus Jesus. Flp 1:9 7 Wiels wie haben groote Freid un Troost äwa diene Leew, wiels de Hoaten von de Heilje derch die, Brooda, oppjefrescht woaren. 2Kor 7:4

8 Doawäajen hab ekj väl Friemootichkjeit en Christus, die to jebeeden, waut sikj jeziemt, 9 soo well ekj die doch om de Leew haulwen leewa bedden, wiels ekj nu een soona sie, Paulus, de Oola, nu oba uk een Jefangna fa Jesus Christus. 10 Ekj bedd die om mienen Sän Onesimus, dän ekj jebuaren hab en miene Baunden, 1Kor 4:15; Gal 4:19; Kol 4:9 11 dee die eamols onnutzboa wia, nu oba die un mie nitzlich es, 12 dän ekj wada trigj-schekj; du oba, nemm am opp, daut es mien ieejnet Hoat; 13 dän wudd ekj haben wult bie mie behoolen, daut hee mie fa die wudd deenen en de Baunden vom Evangelium. Flp 2:30 14 Oba onen dienen Wellen wull ekj nuscht doonen, soo daut dien Goots-Doonen nich een Muss wia, oba friewellich. 2Kor 9:7 15 Wiels veleicht es hee doawäajen fa eene Tietlank von die veloten, daut du am fa emma kjrichst; 16 nu nich aus een Sklow, oba mea noch aus een Sklow, aus een jeleewda Brooda, besondasch fa mie, oba wooväl mea fa die, beides, em Fleesch un em Harn. 1Tim 6:2

17 Wan du mie nu fa eenen Poatna helst, dan nemm am opp, soo aus mie. 18 Wan hee die oba Schoden jedonen haft, ooda waut schuldich es, dan räakjen mie daut aun. 19 Ekj, Paulus, hab dit met miene ieejne Haunt jeschräwen, ekj well daut betolen; om die nich to sajen, daut du uk die selfst mie schuldich best. 20 Jo, Brooda, lot mie von die Nutzen haben em Harn; erfresch mien Hoat en Christus. 21 Wiels ekj opp dienen Jehuarsom vetru, hab ekj die jeschräwen un weet, daut du soogoa mea doonen woascht, aus waut ekj die saj. 22 Moak mie oba uk een Hus* reed, wiels ekj hop, derch june Jebäda, junt jeschonken to woaren. Flp 1:25; 2:24

23 Doa jreessen die Epafras, mien Met-Jefangna en Christus Jesus, Kol 1:7; 4:10-14 24 Markus, Aristarchus, Demas, Lukas, miene Metoabeida. 25 De Jnod von ons Har Jesus Christus sie met junem Jeist! Amen. Jeschräwen von Room no Filemon, derch Onesimus, een Deena.