1 Gott, dee en verhäaje Tieden maunchmol un opp veschiedne Wäaj jerät haft to de Vodasch derch de Profeeten, 2 haft en dise latste Doag to ons jerät derch sienen Sän, dän Hee jesat haft, Oaw to sennen äwa aules, derch dän Hee uk de Welten muak; Ps 2:8; Joh 1:3; Kol 1:16 3 woona de Utstrolunk von siene Harlichkjeit es un de Utdruck von sien Wäsent un drajcht aules derch daut Wuat von siene Krauft, un aus Hee onse Sinden-Reinjunk jemoakjt haud derch sikj selfst, haft Hee sikj doljesat aun de rajchte Haunt vonne Majestät em Huagen Mrk 16:19; 2Kor 4:4; Kol 1:15; Heb 9:14,26 4 un es väl bäta jeworden aus de Enjel, endäm Hee eenen sooväl hechren Nomen jeorwen haft aus dee. Flp 2:9; 1Pe 3:22

5 Wiels to woonem von de Enjel haft Hee jeemols jesajcht: "Du best mien Sän, vondoag hab Ekj Die jebuaren"? Un wada: "Ekj woa fa Am een Voda sennen, un Hee woat fa Mie een Sän sennen"? 2Sa 7:14; Ps 2:7 6 Un wada, aus Hee dän Ieeschtjebuarnen enne Welt nenbrocht, säd Hee: "Un aul Gott siene Enjel sellen Am aunbäden". Ps 97:7; Ree 8:29 7 Un von de Enjel sajcht Hee: "Hee moakt siene Enjel to Jeista un siene Deena to ne Fiaflaum", Ps 104:4 8 oba to däm Sän: "Dien Troon, Oo Gott, blift fa emma un emma; een Zepta von Opprechtichkjeit es daut Zepta von dien Rikj. Ps 45:6-7 9 Du hast Jerajchtichkjeit jeleeft un Jesazloosichkjeit jehaust; doawäajen haft Gott, dien Gott, Die jesaulft met Freideneelj bowa diene Jesalschoft". 10 Un: "Du, Har, hast em Aunfank de Ieed jejrint, un de Himmels sent Woakjen von diene Henj. Ps 102:25-27 11 Dee woaren vegonen, oba Du blifst. Un dee aula woaren oolt soo aus een Kjleet; 12 un soo aus een Mauntel woascht Du äant tooprollen, un dee woaren ve-endat. Du oba best deeselwja, un diene Joaren woaren nich opphieren". 13 Oba to woonem von de Enjel haft Hee jeemols jesajcht: "Sat die to miene rajchte Haunt, bat Ekj diene Fiend fa diene Feet to eene Footbenkj hanlaj"? Ps 110:1 14 Sent dee nich aula deenstboare Jeista, rutjeschekjt, dee toom Deenst, waut de Seelichkjeit oawen woaren? Ps 34:7; 91:11-12