1 Wiels daut Jesaz, daut eenen Schauten von goode komende Dinja haft, un nich daut Bilt selfst von de Dinja, kaun kjeenmol de Naunkomende vollkomen moaken met deeselwje Opfasch, waut see emma jieda Joa opfren. Heb 8:5 2 Wudden see nich sest met opfren oppjehieet haben, wan dee, dee dän Gottesdeenst deeden, eenmol jereinicht, nich mea Jewessen hauden von Sinden? 3 Oba en jane es jieda Joa eene Erinnerunk aun de Sinden. 3Mo 16:34 4 Wiels daut es onmäajlich, daut daut Bloot von Bolles un Kosenbakj Sinden wajchnemt. 5 Doawäajen, aus Hee en de Welt nenkjeem, sajcht Hee: "Schlachtopfa un Opfa wust Du nich; oba eenen Kjarpa hast Du Mie reedjemoakt. Ps 40:6-8 6 Brauntopfasch un Opfasch fa Sind jefaulen Die nich. 7 Dan säd Ekj: Kjikj, Ekj kom, (en de Buakroll es von Mie jeschräwen,) dienen Wellen, Oo Gott, to doonen."

8 Aus Hee bowen* säd: "Schlachtopfa un Opfa, Brauntopfasch un Opfasch fa Sind hast Du nich jewult, hast uk nich Jefaulen doaraun", woone nom Jesaz no jeopfat woaren; 9 dan säd Hee: "Kjikj, Ekj kom, dienen Wellen, Oo Gott, to doonen." Hee nemt daut ieeschte wajch, om daut tweede opp to rechten. 10 En disem Wellen sent wie opp eenmol jeheilicht derch daut Opfa von Jesus Christus sien Kjarpa. Joh 17:19 11 Un jieda Priesta steit däachlich, dän Deenst to verechten un foaken deeselwje Opfasch to opfren, waut niemols kjennen Sinden wajchnämen. 2Mo 29:38 12 Hee oba, aus Hee een Opfa jeopfat haud fa de Sinden fa emma, sad sikj dol aun Gott siene rajchte Haunt; 13 von hia wieda luat Hee, bat siene Fiend aus Footbenkj fa siene Feet hanjelajcht woaren. Ps 110:1 14 Wiels derch een Opfa haft Hee de Jeheilichte vollkomen jemoakt fa emma. 15 Daut bezeicht ons uk de Heilja Jeist. Wiels nodäm Hee jesajcht haud: Jer 31:33-34 16 "Dit es de Bunt, dän Ekj met äant moaken woa no dise Doag", sajcht de Har: "Ekj woa miene Jesazen en äare Hoaten jäwen un en äaren Senn woa Ekj dee schriewen; Heb 8:10 17 un äare Sinden un Jesazloosichkjeiten woa Ekj nich mea aun denkjen." 18 Wua oba Vejäwunk von dise es, doa es nich mea Opfa fa Sind. Heb 8:12

19 Wiels wie nu Friemoot haben, leewe Breeda, toom Engank en daut Heilichste derch Jesus sien Bloot, Mat 27:51; Ree 5:2 20 derch eenen nieen un läwendjen Wajch, woonen Hee fa ons enjeweit haft, derch de Gardien, daut es sien Fleesch, Heb 9:8 21 un haben eenen Huagenpriesta äwa Gott sien Hus; 22 lot ons dan met een woarhauftjet Hoat naunkomen en volle Gloowens-Jewesheit, de Hoaten bespretzt von een beeset Jewessen, un de Kjarpasch jewoschen met reinet Wota. Efs 5:26; 1Pe 3:21 23 Lot ons daut Bekjantnis vonne Hopninj fausthoolen onen wanken; (wiels Hee es tru, dee daut vesproaken haft;) Heb 4:14 24 un lot ons eena dän aundren achten, om ons to de Leew un to goode Woakjen to reizen, 25 nich onse Vesaumlunk veloten, soo aus eenje de Jewanheit haben, oba unjarenaunda ermootjen, un daut soo väl mea, wan jie dän Dach aunkomen seenen. Ree 13:11-12; Heb 13:3

26 Wiels wan wie mootwellich sindjen, nodäm wie de Erkjantnis von de Woarheit jekjräajen haben, dan blift kjeen Opfa mea fa de Sinden, Heb 6:4-8; 4Mo 15:30 27 oba een jewesset furchtboaret Luaren no daut Jerecht un een Fia-Iewa, daut de Jäajna oppfräten woat. 28 Wäaemma Moses sien Jesaz ve-acht, must onen Erboarmunk stoawen derch twee ooda dree Zeijen. 5Mo 17:6 29 Wooväl oajre Strof, denkj jie, woat dee wieet je-acht woaren, dee Gott sien Sän veklunjt un daut Bloot von däm Bunt onrein talt, wuamet hee jeheilicht wia, un dän Jeist vonne Jnod beleidicht? Heb 2:3; 12:25 30 Wiels wie kjanen dän, dee doa säd: "De Rach es miene; Ekj woa trigjtolen, sajcht de Har". Un wada: "De Har woat sien Volkj rechten." 5Mo 32:35-36; Ps 94:1-2 31 Schrakjlich es et, en däm läwendjen Gott siene Henj to faulen. Heb 12:29

32 Oba denkjt aun de väaje Doag, en woone jie, nodäm jie Licht jekjräajen hauden, jie eenen grooten Liedens-Kaumf dulden; 33 dit, aus jie toom Deel en Schaund un Triebsaul to een Spikjtoakel jemoakt worden un toom Deel, wiels jie Poatna wieren met dee, waut et soo jegonen haft. 1Kor 4:9 34 Wiels uk jie hauden Metlieden met mie en miene Kjäden, un dän Raup von june Jieta neem jie met Freid aun, wiels jie wisten, daut jie em Himmel een bätret un een bliewendet Hab-un-Goot haben. Mat 6:20; 19:21,29 35 Schmiet jun Vetruen dan nich wajch, woont eene groote Beloonunk haft. 36 Wiels Jedult es junt nootwendich, soo daut, nodäm jie Gott sien Wellen jedonen haben, de Vespräakjunk kjrieen. Luk 21:19; Jak 5:7 37 Wiels, noch een kortet Stootje, un de Komenda woat komen un woat nich siemen. 38 De Jerajchta oba woat derch dän Gloowen läwen; un, wan hee sikj trigj-trakjt, woat miene Seel kjeen Jefaulen aun am haben. Heb 2:3-4; Ree 1:17 39 Wie oba sent nich von dee, waut sikj trigj-trakjen no daut Vedoawen, oba von dee, waut jleewen fa de Radunk von de Seel. 1Tess 3:3