1 De Hauptsach, von waut wie räden, es dit: Wie haben eenen soonen Huagenpriesta, waut sikj dolsad aun de rajchte Haunt vom Troon von de Majestät en de Himmels, Heb 4:14 2 een Deena von daut Heilichtum un daut woarhauftje Zelt, woont de Har oppjerecht haft, un nich een Mensch.

3 Wiels jieda Huagapriesta woat enjesat, to opfren beides, Gowen un Opfasch. Doawäajen es daut needich, daut uk disa waut haft, daut Hee mucht opfren. 4 Wiels wan Hee nu oppe Ieed wia, wudd Hee nich een Priesta sennen, wiels doa Priesta sent, waut no daut Jesaz no Gowen opfren, 5 woone daut Väabilt un däm Schauten deenen von daut Himlische, doano aus Moses eene jettliche Aunwiesunk kjrieech, aus hee daut Zelt verechten sull: "See doano" säd Hee, "daut du aules moakst no daut Mosta, waut die opp däm Boajch jewäsen wia." 2Mo 25:40; 26:30; Kol 2:17 6 Oba nu haft Hee eenen väl bätren Deenst jekjräajen, wiels Hee uk een Vemedla es von eenem bätren Bunt, woona opp bätre Vespräakjungen steit. Heb 7:22

7 Wiels wan jan ieeschta fälaloos jewast wia, wudd nich Rum jesocht woaren fa eenen tweeden. 8 Wiels Hee äant dodelt, sajcht Hee: "Kjikj, doa komen Doag, sajcht de Har, daut Ekj äwa daut Hus Israel un äwa daut Hus Juda eenen nieen Bunt moaken woa. Jer 31:31-34; Heb 10:16-17 9 Nich no däm Bunt, dän Ekj met äare Vodasch muak, aum Dach aus Ekj äare Haunt neem, äant ut daut Launt Ägipten to leiden; wäajens see nich en mienem Bunt bleewen, un Ekj hab äant nich je-acht*, sajcht de Har. 2Mo 19:5-6; Jer 3:14 10 Wäajens dit es de Bunt, dän Ekj met daut Hus Israel moaken woa no dise Doag, sajcht de Har: Ekj woa miene Jesazen en äaren Senn jäwen, un en äare Hoaten woa Ekj dee schriewen un woa fa äant een Gott sennen, un see sellen fa Mie een Volkj sennen. 11 Un see woaren nich een jiedra sienen Noba un een jiedra sienen Brooda lieren un sajen: Erkjan dän Harn! Wäajens see aula sellen Mie kjanen, von däm Kjlansten bat däm Jratsten. 12 Wäajens Ekj woa äare Ojjerajchtichkjeiten jnädich sennen, un äare Sinden un äare Jesazloosichkjeiten woa Ekj nich mea behoolen." 13 En däm Hee sajcht: "Eenen Nieen", haft Hee dän Ieeschten oolt jemoakjt. Waut nu veellat un oolt woat, es aum Veschwinjen. Ree 10:4