1 De Gloowen es de Vesechrunk von Dinja, opp dee wie hopen, eene Äwazeijunk von Dinja, dee nich to seenen sent. 2Kor 5:7 2 Wiels en disem haben de Väavodasch een goodet Zeichnis jekjräajen. 3 Derch dän Gloowen vesto wie, daut de Welten wieren derch Gott sien Wuat foadich jemoakt, soo daut de Dinja, dee to seenen sent, jeworden sent von Onsechtboaret. 1Mo 1:1-2,4

4 Derch dän Gloowen brocht Abel Gott een bätret Opfa aus Kain, wuaderch von am jezeicht wort, daut hee jerajcht wia; Gott zeijd von siene Gowen; un doaderch rät hee noch, wan hee uk aul jestorwen es. 1Mo 4:3-4

5 Derch dän Gloowen wort Henoch wajchjenomen, soo daut hee dän Doot nich sach un wort nich jefungen, wäajens Gott am wajchjenomen haud; wiels ver sien Wajchnämen haud hee dit Zeichnis, daut hee bie Gott een Jefaulen haud. 1Mo 5:24 6 Oba onen Gloowen es daut onmäajlich, Am to jefaulen; wiels wäa sikj Gott nodat, mott jleewen, daut Hee es un een Beloona es fa dee, waut Am sieekjen.

7 Derch dän Gloowen wort Noah, aus hee eene jettliche Aunwiesunk jekjräajen haud von Dinja, dee noch nich to seenen wieren, ut Forcht bewäajcht, de Arche reed to moaken, fa de Radunk fa sien Hus; wuaderch hee de Welt vedaumd un wort Oaw aun de Jerajchtichkjeit, dee derch dän Gloowen kjemt. 1Mo 6:8-9,13-22

8 Derch dän Gloowen jehorcht Abraham, aus hee jeroopt wort, rut to gonen no eene Städ, woone hee kjrieen sull aus Oafgoot; un hee jinkj rut un wist nich, wua hee hanjinkj. 1Mo 12:1-20 9 Derch dän Gloowen wond hee en daut Launt vonne Vespräakjunk, aus en een Framdet, un wond en Zelten met Isaak un Jakob, de Metoawen von deeselwje Vespräakjunk; 10 wiels hee luad* no eene Staut, dee eenen Grunt haft, dee äa Bumeista un Schepfa Gott es. 11 Derch dän Gloowen kjrieech uk Sara selfst Krauft, schwanga to woaren, aus see aul äwaellat wia un jeef Jeburt; wiels see tald dän tru, dee daut vesproaken haud. 12 Doawäajen sent uk von eenem, un daut aus von eenem Jestorwnen, sooväl jebuaren aus de Stierns aum Himmel, un soo aus de Saunt aum Mäa-Eewa, ontalboa.

13 Dise aula sent em Gloowen jestorwen un haben de Vespräakjungen nich jekjräajen, oba haben dee von wietauf jeseenen un wieren äwazeicht un bejreesten dee un bekjanden, daut see Framdlinja un Utlenda wieren oppe Ieed. 1Mo 23:4; 47:9; 1Chr 29:15 14 Wiels dee, waut soont sajen, jäwen to vestonen, daut see een Vodalaunt sieekjen. 15 Un wan see werkjlich aun jant jedocht hauden, von wua see rutkjeemen, hauden see Tiet jehaut, trigj to trakjen. 16 Nu oba velangen see no een Bätret, daut es, een Himlischet; doawäajen schämt Gott sikj nich met äant, äa Gott to heeten; wiels Hee haft fa äant eene Staut reedjemoakt.

17 Derch dän Gloowen opfad Abraham Isaak, aus am jeprooft* wort, un hee, dee de Vespräakjungen aunneem, opfad sienen Eenjebuarnen, 1Mo 22:1-19; Jak 2:21 18 von wäm jesajcht wia: "En Isaak saul die de Nokomen jenant woaren" 1Mo 21:12 19 un tald doaraun, daut Gott am uk kunn von ut de Doodje opperwakjen, von wua hee am uk wada biltlich kjrieech.

20 Derch dän Gloowen säajend Isaak dän Jakob un dän Esau äwa komende Dinja. 1Mo 27:1-40; 48:1-20; 50:24-26

21 Derch dän Gloowen säajend Jakob, aus hee aum Stoawen wia, Josef siene beid Säns, un deed aunbäden, aus hee sikj oppem Enj aun sien Gonstock länd. 1Mo 47:31 22 Derch dän Gloowen räd Josef, aus hee storf, von de Kjinja Israel äa Ruttrakjen un jeef Befäl äwa siene Knoakes.

23 Derch dän Gloowen wort Moses, aus hee jebuaren wia, dree Moonat vestoaken von siene Elren, wäajens see sagen, daut hee een schmocket Kjint wia; un see ferchten däm Kjennich sien Jeboot nich. 2Mo 2:1-15; 12:21-23; 14:13-31 24 Derch dän Gloowen, aus Moses groot jeworden wia, säd hee daut auf, Farao siene Dochta äa Sän jenant to woaren; 25 un wäld väl leewa, met Gott sien Volkj Ojjemak to lieden, aus de tietliche Freid von de Sind to haben; 26 hee acht de Schaund von Christus aus eenen jratren Rikjtum aus de ägiptische Schaza; wiels hee kjikjt no de Beloonunk. 27 Derch dän Gloowen veleet hee Ägipten un fercht nich däm Kjennich sien Oaja; wiels hee bleef däm Onsechtboaren staunthauft, soo aus wan hee Am sach. 28 Derch dän Gloowen hilt hee daut Passa un daut Bloot-Besprenjen, daut de Venichta von de Ieeschtjebuarne äant nich sull aunschieren.

29 Derch dän Gloowen jinjen see derch daut Roode Mäa soo aus derch drieejet Launt, waut de Ägipta uk vesochten to doonen un vesoopen. 30 Derch dän Gloowen follen de Wenj von Jericho, nodäm see säwen Doag doa romjegonen wieren. Jos 2:1-24; 6:1-25

31 Derch dän Gloowen vekjeem Rahab, de Hua, nich met de Onjleewende, wiels see haud de Spionen frädlich oppjenomen. Jak 2:25

32 Un waut sull ekj mea sajen? Wiels de Tiet wudd mie too kort sennen, om to vetalen äwa Gideon un Barak un uk Simson un Jefta, David un uk Samuel un von de Profeeten, Rech 4:4-24; 6:11-8:32; 11:1-12; 13:1-16:31; 1Sa 17:12-54; Dan 6:2-28 33 woone derch dän Gloowen Kjennichrikjs bedwungen, Jerajchtichkjeit wirkjten, Vespräakjungen erlangden, Leiws-Fräten toohilden, 34 daut Fia siene Krauft utlaschten, von de Schwieet-Kaunt jefloagen sent, Krauft kjrieejen ut de Schwakheit, worden Stoakje em Kjrich, framde Armeeen batem Ranen brochten. 35 Frues haben derch de Opparstonunk äare Doodje* wada jekjräajen. Un oba aundre worden dootjeschloagen un haben kjeene Erleesunk aunjenomen, om daut see muchten eene bätre Opparstonunk kjrieen. 1Kje 17:17-24; 2Kje 4:8-37 36 Un aundre worden em Spott un derch daut Vewippen jeprooft un uk en Spaunsels un Jefenkjnis; 1Kje 22:27; Jer 20:1-3; 37:11-16 37 see worden jesteenicht, tweijesoacht, met daut Schwieet dootjemoakt; see sent omhäa jegonen en Schopsfal un en Kosenfal, en Mangel, Triebsaul, Meshaundlunk, 2Chr 24:21 38 (fa woone de Welt nich wieet wia,) see waundaden en Wiltnissen un Boaj un Heelen un en Ieedlajcha.

39 Un aul dise kjrieejen Zeichnis derch dän Gloowen un haben de Vespräakjunk nich jekjräajen, Heb 11:5 40 wiels Gott haft waut Bätret veseenen fa ons, om daut dee nich onen ons vollkomen jemoakt worden.