1 Doawäajen sell wie daut väl iernsta nämen, waut wie jehieet haben, daut wie nich daut vebiegonen loten. 2 Wiels wan daut, derch Enjel jerädne Wuat, faust es un jieda Äwaträdunk un Onjehuarsom sienen rajchten Loon kjrieech; Apj 7:52; Gal 3:19 3 woo sell wie utkleiwen, wan wie soone groote Radunk nich achten? Woone ieeschtens vom Harn selfst jeprädicht wort un to ons bestädicht wia derch dee, waut Am hieeden; Heb 10:29; 12:25 4 Gott zeijd met äant toop, beides, met Tieekjens un Wunda un veschiedne Kjraften un met de Utdeelungen von däm Heiljen Jeist no sienem Wellen. Mrk 16:20; Apj 2:1-13; 10:44-45; 1Kor 12:4-11; 2Kor 12:12

5 Wiels Hee haft nich de Enjel de komende Welt unjadon jemoakjt, wuavon wie räden. 6 Oba eena, opp eene jewesse Städ, zeijd: "Waut es de Mensch, daut Du aun am denkjst, ooda de Menschensän, daut Du am besieekjst? Ps 8:4-6 7 Du muakst am een beskje läaja aus de Enjel; met Harlichkjeit un Iea hast Du am jekjreent un hast am äwa de Woakjen von diene Henj jesat; 8 Du hast aules unja siene Feet unjadon jemoakjt." Wiels Hee aules am unjadon jemoakjt haft, haft Hee nuscht jeloten, daut am nich unjadon es; nu oba see wie, daut am noch nich aules unjadon es. 9 Wie oba seenen Jesus, dee een Stootje läaja wia aus de Enjel, derch daut Lieden vom Doot, met Harlichkjeit un Iea jekjreent, soo daut Hee derch Gott siene Jnod mucht dän Doot schmakjen fa aulem. Flp 2:8-9 10 Wiels Am ziemd sikj daut, om wäms haulwen aule Dinja sent un derch wäm aule Dinja sent, aus Hee väle Säns enne Harlichkjeit brocht, dän Väajenja von äare Radunk derch Lieden vollkomen to moaken. Heb 12:2 11 Wiels soogoot, dee waut heilicht un dee waut jeheilicht woaren, sent aula von eenem. Doawäajen schämt Hee sikj nich, äant Breeda to nanen Mrk 3:34-35 12 un sajcht: "Ekj woa dienen Nomen to miene Breeda vekjindjen; medden enne Jemeent woa Ekj Die low-sinjen." Ps 22:22 13 Un wada: "Ekj woa mien Vetruen opp Am saten." Un wada: "Kjikj, Ekj un de Kjinja, woone Gott Mie jejäft haft." Jes 8:17,18

14 Wiels nu de Kjinja aum Fleesch un Bloot deelhauftich sent, haft uk Hee deel-jenomen aun dautselwje, soo daut Hee derch dän Doot dän venicht, dee de Macht vom Doot haud, daut es dän Diewel, 2Tim 1:10; 1Joh 3:8 15 un deejanje friemoakt, woone derch Forcht vom Doot äa gaunzet Läwen de Kjnajchtschoft unjadon wieren. 16 Wiels werkjlich neem Hee sikj nich de Enjel aun, oba Abraham sien Nokomen neem Hee sikj aun. 17 Doawäajen must Hee siene Breeda en aule Dinja jlikj woaren, daut Hee een erboarmenda un trua Huagapriesta sennen mucht ver Gott, om daut Volkj äare Sinden to veseenen. Flp 2:7 18 Wiels wuarenn Hee selfst jeläden haft un vesocht wort, kaun Hee dee halpen, dee vesocht woaren. Heb 4:15