1 De ieeschta Bunt haud werkjlich uk Gottesdeenst-Ordnungen un daut irdische Heilichtum. 2 Wiels doa wia een Zelt reedjemoakt: Daut Väaschte, doabennen wieren de Laumpenhoola un de Desch un de Schaubrood, un dit wort daut Heilichtum jenant. 2Mo 25:31 3 Hinja de tweede Gardien wia daut Zelt, waut daut Aulaheilichste jenant woat; 2Mo 26:33 4 daut haud daut goldne Ruakjefäss un de met Golt betrokne Bundes-Kjist, un doabennen de goldne Kruck met Manna un Aaron sien Stock, dee utjeloten haud, un de Toflen von däm Bunt. 2Mo 16:33; 25:10-22; 4Mo 17:6-10 5 Un doa bowenäwa de Harlichkjeits-Cherubim, dee daut Veseenungs-Dakjsel äwaschauten deeden; von woone Dinja wie nu nich oppoat räden kjennen. 6 Aus nu dit soo reedjemoakt wia, jinjen de Priesta emma en daut väaschte vom Zelt nenn un verechten dän Gottesdeenst; 4Mo 18:3-4 7 oba en daut tweede, eenmol daut Joa, de Huagapriesta auleen, nich onen Bloot, daut hee opfad fa sikj selfst un fa de Menschen äare Fäla. 2Mo 30:10; 3Mo 17:2,14-15 8 De heilja Jeist died dit, daut de Wajch en daut Heilichste nenn noch nich openboa wia, soolang aus daut ieeschte Zelt eene Städ haud, Heb 10:20 9 woont een Jlikjnis es en de jäajenwuatje Tiet, en woone jeopfat woaren beides, Gowen un Opfasch, waut nich kjennen däm sien Jewessen vollkomen moaken, dee dän Gottesdeenst deit, Heb 7:19; 10:1-2 10 dee bloos en Äten un Drinkjen un veschiedne Wauschungen un Fleesch-Ordnungen wia, dee bat de Trajchtstalungs-Tiet oppjelajcht wia. 3Mo 11:1-47; 4Mo 19:1-22

11 Christus oba es jekomen, een Huagapriesta to sennen von goode komende Dinja, derch een jratret un vollkomenret Zelt, nich daut von Henj jemoakte, daut es, nich von dise Schepfunk, 12 uk nich derch daut Bloot von Kosenbakj un Kjalwa, oba derch sien ieejnet Bloot es Hee eenmol en daut Heilje nenjegonen un haft eene eewje Erleesunk veschauft. 13 Wiels wan daut Bespretzen, met Bloot von Bolles un Kosenbakj un daut Ausch von eene Stoakj, de Onreine heilicht to daut Fleesch siene Reinjunk, 4Mo 19:2,9,17 14 wooväl mea woat Christus sien Bloot, dee derch dän eewjen Jeist sikj selfst onen Fäla to Gott opfad, ons Jewessen reinjen von de doodje Woakjen, om däm läwendjen Gott to deenen? Heb 1:3; 1Pe 1:18-19; 1Joh 1:7; Opb 1:5

15 Un doawäajen es Hee een Vemedla von daut niee Testament, daut derch dän Doot, waut jeworden es to de Erleesunk von de Äwaträdungen, dee unja daut ieeschte Testament wieren, daut de Beroopne muchten de Vespräakjunk von daut eewje Oafgoot kjrieen. Heb 12:24; 1Tim 2:5 16 Wiels wua een Testament es, doa mott de Doot passieren von däm, waut daut muak. 17 Wiels een Testament woat met däm Doot faust, wiels daut kjeene Krauft haft, wan dee, waut daut jemoakt haft, noch läft. 18 Doawäajen es uk nich daut Ieeschte onen Bloot enjeweit worden. 19 Wiels aus Moses jieda Jeboot jerät haud to aule Menschen nom Jesaz, neem hee daut Bloot von Kjalwa un Kosenbakj, met Wota un blootroode Woll un Iessopp, un bespretzt beides, daut Buak un aule Menschen, 4Mo 19:6 20 un säd: "Dit es daut Bloot vom Testament, waut Gott junt jeboden haft." 2Mo 24:8 21 Un soo uk bespretzt hee met Bloot, beides, daut Zelt un aule Deenst-Jefässa. 3Mo 8:15 22 Un meist aules woat nom Jesaz no jereinicht met Bloot; un onen Bloot-vejeeten passieet kjeene Vejäwunk. 3Mo 17:11

23 Soo musten nu de Nobilda von de Dinja en de Himmels met dise jereinicht woaren; oba de himlische Dinja selfst met bätre Opfasch aus dise. 24 Wiels Christus es nich en de met Henj jemoakte Heilichtums nenjegonen, woone Nobilda sent von daut Woarhauftje, oba en dän Himmel selfst, nu sikj väa to stalen ver Gott sien Aunjesecht fa ons; Heb 7:25; 1Joh 2:1 25 uk nich, daut Hee sikj sull foaken opfren, soo aus de Huagapriesta aule Joa en daut Heilichtum nenjeit met framde* Bloot; 26 wiels dan haud Hee foaken must lieden von de Welt-Gruntlajunk aun. Nu oba, opp daut Welt-Enj, es Hee eenmol erschienen, de Sind ut to strikjen derch daut Opfa von sikj selfst. 1Kor 10:11; Gal 4:4; Heb 1:3 27 Un soo aus de Menschen daut jesat es, eenmol to stoawen, oba no dit daut Jerecht, 1Mo 3:19 28 aulsoo es Christus eenmol jeopfat worden, om väle äare Sinden to droagen; toom tweedemol woat Hee jeseenen woaren onen Sind von dee, waut no Am luaren to de Seelichkjeit. Heb 10:10,12,14