1 Dan lot ons nu ferchten, daut nich veleicht ne Vespräakjunk hinjaloten es, nenn to komen en siene Ru, un eenje von junt sullen schienen kort to komen. 2 Wiels uk ons es daut Evangelium vekjindicht worden, krakjt soo aus jane; oba daut Wuat von de Prädicht nutzt jane nuscht, wiels daut bie de Hierende nich met Gloowen vemischt wia. 3 Wiels wie, dee wie jejleeft haben, gonen en de Ru nenn, soo aus Hee säd: "Soo schwua Ekj en mienem Oaja: See woaren nich en miene Ru nenkomen", wan uk de Woakjen von de Welt-Gruntlajunk foadich wieren. Ps 95:11; Heb 3:11 4 Wiels Hee räd irjentwua von däm säwenden Dach soo: "Un Gott rud von aul siene Woakjen aum säwenden Dach." 1Mo 2:2 5 Un en dise Städ wada: "See woaren nich en miene Ru nenkomen." 6 Wan dan daut blift, daut atelje en ar nenkomen sellen, un dee, to wäm daut ieescht vekjindicht wia, kjeemen nich nenn wäajens Ongloowen, 7 bestemt Hee wada eenen jewessen Dach no soone lange Tiet un sajcht derch David: "Vondoag", soo aus jesajcht es, "Vondoag, wan jie siene Stemm hieren, vehoat june Hoaten nich." Heb 3:7 8 Wiels wan Jesus* äant Ru jejäft haud, wudd Hee nich nohäa von eenem aundren Dach jerät haben. 5Mo 31:7; Jos 22:4 9 Aulsoo blift dan eene Sabatru fa Gott sien Volkj. 10 Wiels wäa en siene Ru nenjegonen es, dee rut uk von siene ieejne Woakjen, krakjt soo aus Gott von siene. Opb 14:13

11 Wie sullen nu Fliet aunwanden, nenn to gonen en dee Ru, daut nich jeemaunt faulen sull no dautselwje Biespell von däm Ongloowen. Heb 3:16-19 12 Wiels Gott sien Wuat es läwendich un kjraftich un schoapa aus jieda dobbelt-schniedjet Schwieet, un jeit derch, bat daut Deelen von Seel un Jeist, uk Jläda un Moakj, un es een Rechta vonne Jedanken un Hoatens-Jesennungen. Jer 23:29; Opb 2:12 13 Un kjeene Kjreatua es ver Am onsechtboa, oba aules es noaktich un opjedakjt ver de Uagen von däm, met wäm wie to doonen haben.

14 Wiels wie eenen grooten Huagenpriesta haben, Jesus, Gott sien Sän, dee derch de Himmels jegonen es, sull wie ons Bekjantnis fausthoolen. Heb 3:1; 9:11-12; 10:23 15 Wiels wie haben nich eenen Huagenpriesta, waut nich metlieden kaun met onse Schwakheiten, oba es vesocht worden en aules, krakjt soo aus wie, doch onen Sind. Joh 8:46; Heb 2:18 16 Lot ons dan met Friemoot komen ver däm Jnodentroon, daut wie muchten Erboarmunk kjrieen un Jnod finjen fa Help, en de Tiet von Noot. Ree 3:25; 5:2