Daut Biespell von Hagar un Sara
21 Sajcht mie, dee jie unja daut Jesaz sennen wellen: Hia jie daut Jesaz nich? 22 Wiels daut steit jeschräwen, daut Abraham twee Säns haud, eenen von de Sklowenfru, dän aundren von de Friee. 23 Oba dee von de Sklowenfru es nom Fleesch jebuaren, oba dee von de Friee es derch de Vespräakjunk. 24 Daut haft eene biltliche Bediedunk. Daut sent de twee Bintnissen; daut eene von däm Sinai-Boajch, brinjt de Sklowarie to Welt, daut es de Hagar. 25 Wiels Hagar bediet de Sinai-Boajch en Arabien un kjemt äwareen met daut vondoagsche Jerusalem, daut met äare Kjinja en de Sklowarie es. 26 Oba daut Jerusalem bowen es de Friee, daut fa ons aula onse Mutta es.