१ कोरिन्थी 1

22 यी बात यहूदिनहे मूर्खता भरल बा कना हस लग्थिन, काकरेकी ओइने यी बात सच्चा बा कना साबित करक लग स्वर्गमेसे एकथो चिन्हा मंग्थाँ। और गैर-यहूदिनके फेन मानविय ज्ञानके खोजिमे बताँ। 23 पर हम्रे ते ख्रीष्ट हम्रिहिन्हे हमार पापमेसे बँचाइक लग क्रूसमे मुलाँ कहिके प्रचार कर्थी, और यी यहूदिनके लग ठेस*1:23 ठेस काकरेकी यहूदी मनै सोचिँत कि ख्रीष्ट कबु नै मुहीँ, तबेकमारे येशूए ख्रीष्ट हुइताँ कहिके ओइने विश्वास करे नै सेक्लाँ। लग्ना बात होगिलिन, और गैर-यहूदिनके लग मूर्खता भरल बात होगिल।

24 पर जोन मनैनहे परमेश्वर अपन मनै बनाइक लग बलैले बताँ, ओइने चाहे यहूदि हुइँत या गैर-यहूदी हुइँत। ओइन्के लग यहे परमेश्वरके शक्ति और परमेश्वरके ज्ञान ख्रीष्ट हुइतिन।