1 हे मोरिक विश्वासी भैयो, हम्रिहिन्हे अपन प्रभु येशू ख्रीष्टके फिर्ता अइना बारेमे और उ समयक बारेमे तुहुरिन्से कुछु कना बा, जब हम्रे एक्के संग हुँकिन्से भेँटा हुइबी। 2 यदि तुहुरे सुन्थो कि प्रभुक दिन पैलेहेँ आसेकल बा कलेसे अपन विचारमे महा सहजिलसे घब्रा ना जैहो। काकरेकी केऊ असिन एकथो अगमवाणीक रुपमे या एकथो सन्देशके रुपमे या एकथो कौनो चिट्ठीमे असिक कहे सेकत जसिके कि ऊ हमार थेनसे आइल बा। 3 उ सक्कु गलत बातमे विश्वास ना करो, जोन बातके बारेमे मनै तुहुरिन्हे बताइतताँ। काकरेकी प्रभु येशूक फिर्ता अइनासे पहिले एकथो असिन समय आई। जब बहुत्ते मनै परमेश्वरके विरोधमे विद्रोह करहीँ। और उ दुष्ट मनैया देखा परी, जिहिहे परमेश्वर पक्कै नरकमे नाश करहीँ। 4 उ दुष्ट मनैया परमेश्वरके विरोध करी, और दोसुर सक्कु चिजके फेन विरोध करी, जेनके मनै आराधना करथाँ, और परमेश्वरके रुपमे मन्थाँ। और ऊ अपनहे यी सक्कुहुनसे भारी मानी। और उ दुष्ट मनैया परमेश्वरके मन्दिरमे बैठी। और ऊ मनैनके थेन अपनहे परमेश्वर हुइतुँ कहिके कही। 5 पक्कै फेन तुहुरिन्हे याद हुई, कि जब मै तुहुरिन्के संग रहुँ, तब कैयोचो मै तुहुरिन्हे बताइल रहुँ। 6 और तुहुरे जन्थो कि उहिहे के रोक्ले बा। काकरेकी ऊ तब प्रकट हुई सेकी, जब ओकर समय अइहिस। 7 काकरेकी उ दुष्ट मनैयक शक्ति पैलेहेँसे गुप्त रुपसे यी संसारमे काम करतिस। पर एकथो बा, जे उ शक्तिहे रोक्ले बावै। और जबसम उ दुष्ट मनैया डगरमेसे नै हट्जाई, तबसम यिहिहे ऊ रोक्ले पलिरहिहीँ। 8 यकरपाछे, उ दुष्ट मनैया आई। पर ओकरपाछे जब प्रभु येशू अइहीँ, तब् ऊ अपन मुहेमसे निकर्लक आदेशसे और अपन अइलक महिमासे उ दुष्ट मनैयाहे मुवादिहीँ। 9 उ दुष्ट मनैयक संग शैतानके शक्ति रहिहिस। ऊ सक्कु मेरके झूटा चमत्कार, चिन्हा और अचम्मक काम करी। और जिहिसे मनै सोच्हीँ कि यी परमेश्वर करतताँ। 10 ऊ हरेक मेरके खराब कामके प्रयोग करी, जोन काम उ मनैनहे धोखा दि जोन मनै सदाकालके विनाशके डगरमे बताँ। काकरेकी उ मनै उ सच्चाइमे विश्वास करनासे अस्वीकार करथाँ, जोन सच्चाई ओइन्हे बँचाई सेक्थिन। 11 तबेकमारे परमेश्वर उ मनैनहे धोखा खाइक लग छोरदेथिन, जेकर कारण ओइने सच्चाइसे दूर होजिथाँ, ताकि ओइने झूँटा बातमे विश्वास करे सेकिँत। 12 परमेश्वर उ सक्कु मनैनके न्याय करहीँ, जेने येशू ख्रीष्टके बारेमे सच्चा सन्देशमे विश्वास नै करथाँ, और दुष्ट तरिकासे प्रेम करथाँ।

13 हे मोरिक विश्वासी भैयो, तुहुरिन्के लग हम्रिहिन्हे हरदम परमेश्वरहे धन्यवाद देहे परत। काकरेकी प्रभु तुहुरिन्हे प्रेम करथाँ। और यी कारणसे कि परमेश्वर तुहुरिन्हे सृष्टि हुइनासे पैलेहेँ चुनलेलाँ, ताकि तुहुरिन्हे ऊ बँचाई सेकिँत। पवित्र आत्मक उ कामके माध्यमसे जोन तुहुरिन्हे पवित्र बनाइत। और प्रभु येशूक सच्चा सन्देशमे तुहुरिन्के विश्वास कर्लक कारण ऊ तुहुरिन्हे बँचैथाँ। 14 ऊ तुहुरिन्हे बँचाइक लग उ खुशीक खबरके माध्यमसे बलैलाँ, जोन खुशीक खबर हम्रे तुहुरिन्के बिच्चेम प्रचार करल रही। ताकि तुहुरे उ महिमामे शामिल हुई सेको, जोन महिमा परमेश्वर हमार प्रभु येशू ख्रीष्टहे देले बताँ। 15 तबेकमारे हे मोरिक विश्वासी भैयो, उ बातमे तुहुरे पक्कासे विश्वास कर्ती रहो, जोन बात हम्रे तुहुरिन्हे सिखाइल रही, या जब हम्रे चिट्ठी पठाइल रही। 16 हम्रे प्राथना कर्थी कि हमार प्रभु येशू ख्रीष्ट अप्निहीँ और हमार बाबा परमेश्वर जे हम्रिहिन्हे प्रेम करत। और जे अपन अनुग्रहसे हम्रिहिन्हे सदाकालके उत्साहा और पक्का आशा देले बा। 17 मै प्राथना करतुँ कि ऊ तुहुरिन्हे हौसाइँत। और बल्गर बनाइँत, ताकि तुहुरे जोन चिज मजा बा, उ सक्कु चिज कती और कर्ती रहे सेको।