1 मै पावल यी चिट्ठीहे लिखतुँ, मै ख्रीष्ट येशूक निउतरह्या हुइक लग परमेश्वरके इच्छासे रोजगिल बतुँ। मै यहाँ हमार विश्वासी संघरिया सोस्थेनेसके संग बतुँ, जे महिन्हे सहयोग करता। 2 मै यी चिट्ठी कोरिन्थ शहरमे रहल मण्डलीक विश्वासीनहे लिखतुँ, जेनहे परमेश्वर येशूक संग एकतामे करके अपन मनैनके रुपमे अल्गैले बताँ, और ऊ तुहुरिन्हे अपन पवित्र मनै बनाइक लग बलैले बताँ। ऊ तुहुरिन्हे ओस्तेहेँके पवित्र कर्ले बताँ, जसिके ऊ हरेक ठाउँमे सक्कु मनैनहे कर्ले बताँ, जेने हमार प्रभु येशू ख्रीष्टसे प्राथना करथाँ। 3 मै प्राथना करतुँ कि हमार परमेश्वर बाबा और प्रभु येशू ख्रीष्ट तुहुरिन्हे अनुग्रह करिँत, और तुहुरिन्हे शान्तिक अनुभव कराँइत।

4 काकरेकी परमेश्वर तुहुरिन्हे ख्रीष्ट येशूक संग मिलाके अपन अनुग्रहसे बहुत्ते मजा चिज देले बताँ। तबेकमारे तुहुरिन्के लग मै जबफेन परमेश्वरहे धन्यवाद देथुँ। 5 काकरेकी हरेक बातमे तुहुरे बहुत्ते आशिष भेटैले बतो, काकरेकी तुहुरे ख्रीष्टके संग एक हुइल बतो। उ आशिष यी हो कि परमेश्वर तुहुरिन्हे अपन वचन बोल्ना और बुझ्ना सक्कु मेरके विशेष क्षमता देले बताँ। 6 अस्तेके परमेश्वर तुहुरिन्के थेन साबित करलाँ कि ख्रीष्टके बारेमे रहल सन्देश सच्चा बा। 7 असिके यी समयमे जब तुहुरे हमार प्रभु येशू ख्रीष्टके प्रकट हुइना महा उत्सुकतासे आसरा हेरतो कलेसे तुहुरिन्केमे पवित्र आत्मक कौनो फेन आत्मिक वरदानके कमि नै हो। 8 हमार प्रभु येशू ख्रीष्टके अइना दिनमे तुहुरे निर्दोष रहो कहिके अन्त्यसम परमेश्वर तुहुरिन्हे अपन विश्वासमे बल्गर बनैले रहिहीँ। 9 परमेश्वर तुहुरिन्हे अपन छावा प्रभु येशू ख्रीष्टके संग एकजुट हुइक लग रोज्ले बताँ, और परमेश्वर अपन कर्लक वाचाहे विश्वासयोग्यसे पूरा करथाँ।

10 हे मोरिक विश्वासी भैयो, हमार प्रभु येशू ख्रीष्टके अधिकारसे मै तुहुरिन्हे अनुरोध करतुँ, कि तुहुरे सक्कु जाने सहमत होजाऊ। और अलग-अलग समूहमे विभाजन ना होऊ। पर एक्के मन और एक्के उद्देश्य धारके एकदोसर जहनसे मिलजुलके रहो। 11 काकरेकी मोरिक विश्वासी भैयन, क्लोएक परिवारके कौनो मनै महिन्हे बतैलाँ कि तुहुरिन्के बिच्चेम झगरा चलता। 12 मोरिक कहे खोज्लक मतलब का हो कलेसे तुहुरे केऊ, "मै पावलके चेला हुइतुँ," केऊ, "मै अपोल्लोसके चेला हुइतुँ," केऊ, "मै केफासके चेला हुइतुँ" और केऊ, "मै ख्रीष्टके चेला हुइतुँ" कहिके कथो हुँ। 13 पर तुहुरे असिके ज्या करतो, यी ठिक नै हो। काकरेकी ख्रीष्टहे समूह-समूहमे नै बाँटगिल हो। तुहुरिन्हे मुक्ति देहक लग क्रूसमे मुउइया मै पावल नै हुइतुँ। अथवा का तुहुरे मोरिक चेला बनक लग डुब्कि लेलो? 14 परमेश्वरहे धन्यवाद होए, कि मै दुनु भैयन क्रिस्पस और गायसहे बाहेक औरे किहुहे फेन मै डुब्कि नै देनु। 15 तबेकमारे तुहुरे मोरिक नाउँमे डुब्कि लेलो कहिके केऊ फेन ना कहे। 16 और हाँ, महिन्हे याद आइल कि स्तिफनसके परिवारहे फेन डुब्कि देनु। यी बाहेक मै औरे किहुहे फेन डुब्कि नै देहल हुइतुँ कना महिन्हे पता बा। 17 काकरेकी ख्रीष्ट महिन्हे डुब्कि देहक लग नै होके खुशीक खबर प्रचार करक लग नियुक्त कर्ले बताँ। खुशीक खबर प्रचार करेबेर मै मनैनके ज्ञान अनुसार नै कर्नु, नै ते मनै मोरिक मानवीय बुद्धिक कारणसे मोरिकमे विश्वास करहीँ। और ओइने क्रूसमे रहल ख्रीष्टके बलिदानके शक्ति पता नै पैहीँ।

18 ख्रीष्ट क्रूसमे मुलाँ कना सन्देश यी परमेश्वरके वहे तरिका हो, जसिके परमेश्वर अपन शक्तिसे मनैनहे बँचैथाँ। बहुत मनै कथाँ कि यी सन्देश बिनाकामक बा। असिके सोँचुइया मनै वहे हुइँत, जेने नरक ओहोँर जाइतताँ। पर हमार लग जे उ सन्देशमे विश्वास करल, यी परमेश्वरके वहे तरिका हो, जसिके परमेश्वर अपन शक्तिसे मनैनहे बँचैथाँ। 19 काकरेकी पवित्र शास्त्रमे परमेश्वर असिके कले बताँ,

"मै देखैम कि उ मनैनके विचार जात्तिकमे मूर्ख बतिन, जोन मनैनहे यी संसारके मनै बुद्धिमान मन्थाँ।

मै साबित करम कि ओइने जात्तिके बुद्धिमान नै हुइँत।"

20 कलेसे यी संसारमे जोन मनै ज्ञानी बताँ, और जेने यहूदी कानुनके गुरु हुइँत, और जेने सिपारसे बोले जन्थाँ, ओइन्के कौनो महत्त्व नै हुइतिन। काकरेकी परमेश्वर पैलेहेँ देखादेले बताँ कि ओइन्के संसारिक ज्ञानके कौनो मूल्य नै हुइतिन। 21 मै असिके यी कारणसे कहतुँ, काकरेकी परमेश्वर अपन बुद्धिसे यी निर्णय लेलाँ कि यी संसारके मनै अपन ज्ञानसे परमेश्वरहे चिन्हे नै सेक्हीँ। तबेकमारे परमेश्वर उ मनैनहे बँचैना सोँच बनैलाँ जोन मनै हमार सुनैलक खुशीक खबरमे विश्वास करथाँ। पर जोन मनै विश्वास नै करथाँ ओइने कथाँ कि हमार प्रचार कर्लक कौनो फाइदा नै हो।

22 यी बात यहूदिनहे मूर्खता भरल बा कना हस लग्थिन, काकरेकी ओइने यी बात सच्चा बा कना साबित करक लग स्वर्गमेसे एकथो चिन्हा मंग्थाँ। और गैर-यहूदिनके फेन मानविय ज्ञानके खोजिमे बताँ। 23 पर हम्रे ते ख्रीष्ट हम्रिहिन्हे हमार पापमेसे बँचाइक लग क्रूसमे मुलाँ कहिके प्रचार कर्थी, और यी यहूदिनके लग ठेस* लग्ना बात होगिलिन, और गैर-यहूदिनके लग मूर्खता भरल बात होगिल।

24 पर जोन मनैनहे परमेश्वर अपन मनै बनाइक लग बलैले बताँ, ओइने चाहे यहूदि हुइँत या गैर-यहूदी हुइँत। ओइन्के लग यहे परमेश्वरके शक्ति और परमेश्वरके ज्ञान ख्रीष्ट हुइतिन। 25 काकरेकी ज्या चिज परमेश्वरके मूर्खता हस लागत, उ चिज मनैनके ज्ञानसे भारी बतिन। और ज्या चिज परमेश्वरके कमजोरी हस लागत, उ चिज मनैनके बलसे फेन धेउर शक्तिशाली बतिन।

26 हे मोरिक विश्वासी भैयो, यी विषयमे तुहुरे सोँचो कि जब परमेश्वर तुहुरिन्हे बलैले रहिँत। तब उ समयमे तुहुरिन्के अवस्था कसिन रहे। संसारके स्तर अनुसार तुहुरे धेउर बुद्धिमान नै रहो। और तुहुरिन्मेसे बहुत्ते जाने अगुवा नै रहो। और तुहुरिन्मेसे बहुत्ते जहनके पुर्खन ना ते खानदानी रहिँत। 27-29 पर परमेश्वर असिन मनैनहे रोज्लाँ, जेनहे संसारके मनै मूर्ख मानिँत। ताकि परमेश्वर उ मनैनके लाज कराई सेकिँत जेने सोच्थाँ कि हम्रे जन्नाहाँसुन्नाहाँ बती। और परमेश्वर असिन मनैनहे रोज्लाँ, जेने कमजोर बताँ ताकि परमेश्वर बल्गर मनैनके लाज कराई सेकिँत। और जेनहे संसारके मनै एकदम खास मन्थाँ, ओइन्हे नाश करक लग परमेश्वर असिन मनैनहे रोज्लाँ, जेनहे संसारके मनै हेल्हा करथाँ। और असिन मनैनहे रोज्लाँ, जेनहे संसारके मनै कुच्छु फेन नै हो कहिके मन्थाँ। परमेश्वर असिके यहे कारणसे करलाँ ताकि कौनो फेन मनैया परमेश्वरके आघे घमण्ड करे ना सेके। 30 पर परमेश्वर तुहुरिन्हे येशू ख्रीष्टके संग एकजुट करैले बताँ, और ख्रीष्टके माध्यमसे परमेश्वर हम्रिहिन्हे अपन ज्ञान देथाँ। परमेश्वर हम्रिहिन्हे अपन नजरमे धर्मी ठहरैथाँ। ख्रीष्टके माध्यमसे हम्रे पवित्र बनागिल बती, और परमेश्वर हम्रिहिन्हे पापसे स्वतन्त्र करवैथाँ।

31 काकरेकी ख्रीष्ट हमार लग सक्कु चिज हुइताँ, तबेकमारे पवित्र शास्त्र जसिके कले बा तुहुरे ओस्तेहेँ करो। जसिके पवित्र शास्त्रमे लिखल बा, "यदि केऊ घमण्ड करे चाहत कलेसे ऊ परमेश्वरके कर्लक कामेमे घमण्ड करे।"