1 आब यरुशलेम शहरमे पवित्र मनैनके बारेमे गलातिया प्रदेशके मण्डलीनके लग मोरिक आदेश अनुसार तुहुरे दान जमा करहो। 2 प्रत्येक अँतवार तुहुरिन्मेसे सक्कु जाने अपन-अपन कमाही अनुसार कुछ रकम अल्गाके धर्ले रहहो, ताकि मै अइम ते अल्गेसे तुहुरिन्हे भेटी जमा करे ना परे।

3 और जब मै वहाँ रहम ते मै उ मनैनहे पठैम, जेनहे तुहुरे विश्वासयोग्य मनैनके रुपमे चुनल रहो। ओइनेहेँ उ जमा करल रकम यरुशलेम शहरमे लेके जैहीँ। मै ओइन्के संग एकथो चिट्ठी फेन पठादेहम ताकि वहाँक विश्वासीनसे ओइन्के परिचय करवाई सेकुँ। 4 यदि मोरिक जैना फेन ठिक लागी कलेसे ओइने मोरिके संग जैहीँ।

5-7 यदि प्रभुक इच्छा हुई कलेसे मै तुहुरिन्के संग नम्मा समयसम रहे सेक्थुँ कना आशा बा। मै माकेडोनिया प्रदेश ओहोँर जाइतुँ, तबेकमारे मै आब थोरचुन समयक लग किल तुहुरिन्के थेन नै रुकम। वहाँ जाके सेकम ते मै तुहुरिन्के थेन फेनदोस्रे अइम। तब मै नम्मा समयक लग तुहुरिन्के थेन रहम या ते पूरा जार छेँक फेन मै तुहुरिन्के संग रहे सेक्थुँ। ओकर पाछे मै चाहे जोन ठाउँ गैलेसे फेन तुहुरे मोरिक यात्रक लग बन्दोबस्त मिलाई सेक्थो। 8 पर पेन्तिकोसके तिहुवारसम मै एफिसस शहरमे रहम। 9 काकरेकी मोरिक थेन प्रभावशाली रुपमे काम करना एकथो बरवार मौका बा, पर यहाँ मोरिक विरोध करुइयन फेन बहुत बताँ।

10 यदि तिमोथी तुहुरिन्के थेन कोरिन्थ शहरमे आइल कलेसे उहिहे तुहुरे मजासे स्वागत करहो; काकरेकी ऊ मोरिके हस प्रभुक काम करत। 11 तबेकमारे केऊ उहिहे हेल्हा ना करिँत। पर ओकर यात्रक लग चहना हरेक चिज शान्तिसे देके पठाइँत, और ऊ मोरिक थेन आजाए; मै उहिहे दोसुर विश्वासीनके संग आई कहिके ओकर आसरा हेरतुँ। 12 और विश्वासी भैया अपोल्लोसहे मै बहुत अनुरोध कर्ले रहुँ, कि तुहुरिन्से भेँटा करे अउइया औरे विश्वासी भैयनके संग ऊ फेन भेँटा करे आजाए; पर यी समयमे भेँटा करे अइना ओकर एक्को मन नै हुइलिस। पर सही समय भेटाई ते ऊ जरुर आई।

13 चौँकस रहो, विश्वासमे स्थिर पलिरहो। साहसी मनै बनो, विश्वासमे बल्गर होऊ। 14 तुहुरे ज्या चिज फेन करथो, उ सक्कु चिज प्रेमसे करो। 15 हे मोरिक विश्वासी भैयो, तुहुरे स्तिफनसहे और ओकर परिवारहे जन्थो, कि ओइने अखैया प्रदेशके सुरुक विश्वासीन हुइताँ। और ओइने पवित्र मनैनके लग अपन करे सेक्ना हरेक सहयोग करलाँ। 16 तबेकमारे मै तुहुरिन्हे अनुरोध करतुँ कि तुहुरे अस्तेहेँ मनैनके और अस्तेहेँ मेहनत करुइया मनैनके अधिनमे रहो।

17 और स्तिफनस, फोर्टुनाटस और अखाईकस मोरिक थेन अइलाँ ते मै बहुत आनन्दित बतुँ। काकरेकी मोरिक लग ज्या चिज तुहुरे करे नै सेक्लो, उ चिज ओइने करके देखैलाँ। 18 और जसिके यने महिन्हे उत्साहा देले बताँ, ओस्तेहेँके यने तुहुरिन्के लग फेन करहीँ, जब यने तुहुरिन्के थेन जैहीँ। तबेकमारे यनहे तुहुरे सम्मान करहो।

19 एशिया प्रदेशके मण्डलीक विश्वासीन तुहुरिन्हे नमस्कार पठैले बताँ। अकिलास और ओकर जन्नी प्रिस्किला और ओइन्के घरेम जमा होउइया मण्डलीक विश्वासीन फेन प्रभुमे तुहुरिन्हे दिलसे नमस्कार पठैले बताँ। 20 यहाँसे सक्कु विश्वासी भैयन तुहुरिन्हे नमस्कार करतताँ: तुहुरे एकदोसर जहनहे ख्रीष्टके प्रेमसे नमस्कार करो।

21 मै पावल, अपने हाँथेलेके लिख्के तुहुरिन्हे यी नमस्कार पठाइतुँ। 22 यदि केऊ प्रभुहे प्रेम नै करत कलेसे ऊ श्रापित होए। हे हमार प्रभु, आऊ! 23 प्रभु येशू ख्रीष्टके अनुग्रह तुहुरिन्के संग पलिरहे। 24 ख्रीष्ट येशूमे एकतामे रहल सक्कु जहनहे मै प्रेम करथुँ। आमेन! (यकर मतलब हुइत, अस्तेहेँ होए।)