1 मै पावल यी चिट्ठीहे लिखतुँ। मै हमार मुक्तिदाता परमेश्वर और जेकरमे हम्रे आशा कर्थी, वहे येशू ख्रीष्टके अधिकारसे येशू ख्रीष्टके मै एकथो निउतरह्या हुइतुँ। 2 मै यी चिट्ठी तुँ, तिमोथीहे लिखतुँ। तुँ मोरिक सग्गे छावा हस हुइतो। काकरेकी तुँ फेन ख्रीष्टमे विश्वास करथो; मै प्राथना करतुँ कि परमेश्वर और हमार प्रभु येशू ख्रीष्ट तुहिन्हे अनुग्रह, दया और शान्ति देती रहिँत।

3 मै तुहिन्हे फेनदोस्रे बताइतुँ, कि एफिसस शहरहे छोरके माकेडोनिया प्रदेशमे जैनासे पहिले मै तुहिन्हे अनुरोध कर्ले रहुँ, कि झूँटा शिक्षा सिखुइयनहे आज्ञा देऊ। कि ओइने मनैनहे खुशीक खबरके बारेमे असिन बात सिखैना बन्द करिँत, जोन गलत बा। 4 और ओइने झूँटा कहानीमे और पुर्खनके नम्मा सूचिमे ध्यान देना बन्द करिँत। यी मेरिक वादविवाद किहुहे फेन परमेश्वरके काम करनामे सहायता नै करत। असिन काम तबे किल करे सेकजाई जब केऊ परमेश्वरकेमे विश्वास करत। 5 तुहुरिन्हे आज्ञा देनक मोरिक उद्देश्य यहे हो कि तुहुरे एकदोसुर जहनहे मजा मनसे, शुद्ध विवेकसे और बिना कपटके विश्वाससे प्रेम करो। 6 झूँटा गुरुनके यी सक्कु चिजहे छोरदेले बताँ, और बेकारके विषयमे किल बात बत्वैथाँ। 7 यी झूँटा गुरुनके यहूदी कानुनके उ गुरुनके हस बने चहथाँ, जेने मोशक नियम कानुनमे दक्ष बताँ। पर जात्तिकमे ओइने अप्निहीँ नै बुझ्थाँ कि ओइने दोसुर जहनहे का सिखैना कोशिस करतताँ, और अतरा बल्गर आत्मविश्वाससे का बोलतताँ। 8 हम्रे जन्थी कि मोशक नियम कानुन मजा बा, यदि मनै ठिक तरिकासे सिखैहीँ, जसिके सिखाइक परना हो। 9 हम्रे यी फेन जन्थी कि मोशक नियम कानुन धर्मी मनैनके लग नै हो। पर उ मनैनके लग हो, जेने मोशक नियम कानुनहे जानके फेन नै जानल हस करथाँ। और यकर आज्ञाहे पालन नै करथाँ। और ओइन्के लग हो, जेने परमेश्वरके आराधना नै करथाँ। और जेने हरदम पाप कर्ती रथाँ। और ओइन्के लग हो, जेने अपवित्र बताँ। और ओइन्के लग हो, जेने परमेश्वरहे आदर नै करथाँ। और ओइन्के लग हो, जेने अपन दाईबाबनके और दोसुर मनैनके हत्या करथाँ। 10 और यी मोशक नियम कानुन ओइन्के लग हो, जेने छिनार काम करथाँ। और जेने समलिंगी बताँ। और जेने दोसुर मनैनहे चोराके ओइन्हे गुलामके रुपमे बेँच्थाँ। और जेने झूँट बोल्थाँ। और जेने झूँटा कसम खैथाँ। और जोन काम सच्चा शिक्षा मनाही करत मनै उ सब चिज करथाँ। 11 यी शिक्षा उ खुशीक खबरमे आधारित बा, जोन खुशीक खबर उ महिमक बारेमे बा, जोन महिमा परमधन्य परमेश्वरसे सम्बन्धित बा। परमेश्वर महिन्हे उ खुशीक खबर दोसुर जहनहे बताइक लग देले बताँ।

12 मै हमार प्रभु येशू ख्रीष्टहे धन्यवाद देहतुँ, जे महिन्हे शक्ति देले बताँ कि ऊ महिन्हे विश्वासयोग्य समझके अपन सेवा करक लग महिन्हे योग्य मन्लाँ। 13 मै ते विश्वासी हुइनासे आघे ख्रीष्टके निन्दा करुँ। और विश्वासीनहे सताऊँ और ओइन्के बहुत नोकसान कर्नु। काकरेकी उ समयसम मै ख्रीष्टहे विश्वास नै कर्ले रहुँ। वहे कारणसे मै बुझे नै सेक्नु कि ज्या मै करतुहुँ, उ गलत रहे। तबेकमारे ख्रीष्ट मोरिकमे दया करलाँ। 14 हमार प्रभु हरदम मोरिकमे अपन प्रशस्त अनुग्रह देखैलाँ। ऊ महिन्हे विश्वास और प्रेम देलाँ। काकरेकी मै ख्रीष्ट येशूक संग एकजुट रहुँ। 15 यी कहकुट सही बा, और यम्ने विश्वास करे सेक्जाइत, कि येशू ख्रीष्ट हम्रे पापीनहे बँचाइक लग संसारमे अइलाँ। और ओइन्मेसे सक्कुहुनसे भारी पापी मै हुइतुँ। 16 मै ते सक्कुहुनसे धेउर पाप कर्ले बतुँ। तभुन फेन ख्रीष्ट येशू महिन्हे माफ करके मोरिक उप्पर दया देखैलाँ। ऊ महिन्हे माफ करके यी देखाई चाहतिहिँत कि ऊ कतरा सहनशील बताँ। ताकि मै उ मनैनके लग उदाहरण बने सेकुँ, जेने अइना समयमे विश्वास करहीँ। और ओइने सदाकालके जीवन भेटैहीँ। 17 आब उ रज्वा जे सदाकालके लग राज करत। जे सदाकालके लग जित्ती बा। जिहिहे केऊ फेन देखे नै सेकत। और जे एकथो किल और सच्चा परमेश्वर हो। उहिएहे सदासर्वदा आदर और महिमा मिल्ती रहे। आमेन! (यकर मतलब हुइत, अस्तेहेँ होए।) 18 हे मोरिक छावा तिमोथी, मै तुहिन्हे यी आज्ञा देहतुँ: मै तुहिन्हे उ बात सम्झे कहतुँ, जोन बात गैल समयमे अगमवक्तन कले रहिँत कि यी बात तोरिक संग रही। तुहिन्हे झूँटा शिक्षा सिखुइयनके विरोधमे बरह्यासे लरक लग उ शब्दहे एकथो हँथियार हस प्रयोग करे परी। 19 तुहिन्हे ख्रीष्टके उप्पर विश्वास कर्ले रहे परी, और तोहाँरमे एकथो स्वच्छ विवेक हुई परी। कौनो-कौनो मनै स्वच्छ विवेकहे छोरदेले बताँ। और ओइने ख्रीष्टकेमे विश्वास करना अपन योग्यताहे नाश करदेले बताँ। ठिक ओस्तेहेँके जसिके एकथो जहाज ठक्कर लागके नाश होजाइत। 20 ओइन्मेसे हुमेनियस और अलेक्जेन्डर हुइँत, जेनहे मै मण्डलीमेसे बाहेर करदेले बतुँ। और ओइन्हे शैतानके शक्तिमे सौँपदेले बतुँ, ताकि ओइने सिखिँत कि परमेश्वरके निन्दा नै करे परत।