1 सक्कुहुनसे पहिले मै तुहुरिन्हे यी बिन्ती करतुँ कि बिन्ती, प्राथना, निवेदन और धन्यवाद सक्कु मनैनके लग करो। 2 रज्वनके लग और उ सक्कु मनैनके लग प्राथना करो, जेनके थेन सरकारी अधिकार बतिन। ताकि ओइने हम्रिहिन्हे शान्ति और सुरक्षासे रहक लग सहायता करिँत। जिहिसे हम्रे परमेश्वरके आराधना करे सेकी। और दोसुर जहनहे हरदम मजा व्यवहार करे सेकी। 3 सक्कु मनैनके लग असिके प्राथना करना सही हो, और हमार मुक्तिदाता परमेश्वर यिहिहे स्वीकार फेन करथाँ। 4 ऊ चहथाँ कि सक्कु मनै बँचजाइत, और सच्चाइक ज्ञानहे जानित। 5 एक्केथो किल परमेश्वर बा और एक्केजाने किल बताँ, जे परमेश्वर और मनैनके बिच्चेम मेलमिलाप करवाई सेकत, उ येशू ख्रीष्ट हुइताँ जे एकथो मनैयक रुपमे जलम लेलाँ। 6 ख्रीष्ट पाप और मृत्युक शक्तिसे सक्कु मनैनहे छुटाइक लग अपनहे बलिदान करदेलाँ। हुँकार मुलक कारण परमेश्वर ठिक समयमे यी साबित करलाँ कि ऊ सक्कु मनैनहे बँचाई चहथाँ।

7 तबेकमारे परमेश्वर महिन्हे खुशीक खबरके प्रचारक और एकथो निउतरह्यक रुपमे चुन्लाँ। ऊ महिन्हे गैर-यहूदिनहे विश्वासके सच्चा सन्देश सिखाइक लग चुन्लाँ। मै नै थागथुइतुँ; मै जात्तिक कहतुँ। 8 मै चहथुँ कि जबफेन तुहुरे परमेश्वरके आराधना करक लग भेँटा हुइबो, तब उ थारु मनै जेने परमेश्वरके इच्छा अनुसार जीवन जिथाँ। ओइने बिना रिसके और बिना झगरक अपन हाँथ उठाके प्राथना करिँत। 9 ओस्तेहेँके मै चहथुँ कि विश्वासी जन्नी मनै फेन सोहैना लुग्गा घालिँत, असिन लुग्गा जोन प्रशंसा करना लायकके और जोन सभ्य और स्वीकार करना लायकके होए। दोसुर जहनके ध्यान अपन ओहोँर तानक लग अपन भुट्लाहे रहर लग्तिक झोँटी ना बनाऊ। और सोन, मोती और बहुत महिँगा लुग्गा लगाके दोसुर जहनके ध्यान अपन ओहोँर ना तानो। 10 बेन यकर सताहा उ स्त्रीनहे दोसुर जहनके लग मजा काम करके अपनहे सुग्घुर बनाई परत। काकरेकी परमेश्वरके भक्ति करुइया स्त्रीनके लग यहे सही हो। 11 जब थारु मनै विश्वासीनहे सिखाई भिरल रहिहीँ, तब सक्कु स्त्रीनहे चिमचाम और बहुत सम्मानसे सुने और सिखे परत। 12 स्त्रीहुँक्रे थारु मनैनहे शिक्षा देना या ओइन्केमे अधिकार जमैना अनुमति मै नै देहम। जब तुहुरे आराधना करक लग जमा हुइथो, तब स्त्रीनहे चिमचाम रहे परत। 13 मै असिके यहे कारणसे कहतुँ, काकरेकी परमेश्वर आघे आदम (थारु मनैया) हे बनैलाँ, और ओकर पाछे परमेश्वर हव्वा (जन्नी मनैया) हे बनैलाँ। 14 दोसुर कारण यी हो कि सँप्वा जन्नी मनैया हव्वाहे धोखा देहल आदमहे नै। असिके हव्वा (जन्नी मनैया) परमेश्वरके नियमहे टुरल। 15 पर परमेश्वर जन्नी मनैनहे ओइन्के लरका पाइबेर बँचालिहीन, जबसम ओइने ख्रीष्टमे विश्वास कर्ती रहिहीँ, और दोसुर जहनहे प्रेम कर्ती रहिहीँ, और पवित्र और सही तरिकासे व्यवहार करहीँ।