1 यी चिट्ठी पावल, सिलास और तिमोथीक ओहोँरसे हो। यी चिट्ठी थेसलोनिके शहरके मण्डलीहे लिखगिल बा, जोन मण्डली हमार बाबा परमेश्वर और प्रभु येशू ख्रीष्टसे सम्बन्धित बा। 2 हम्रे प्राथना कर्थी कि हमार बाबा परमेश्वर और प्रभु येशू ख्रीष्ट तुहुरिन्हे अनुग्रह और शान्ति दिँत।

3 हे मोरिक विश्वासी भैयो, तुहुरिन्के लग हम्रिहिन्हे हरदम परमेश्वरहे धन्यवाद देहे परत, असिक करना हमार लग उचित बा। काकरेकी प्रभु येशूमे तुहुरिन्के विश्वास आकुर धेउर बहरती जाइता, और तुहुरिन्के प्रेम फेन एकदोसुर जहनकेमे बहरती जाइता। 4 तबेकमारे हम्रे परमेश्वरके मण्डलीमे तुहुरिन्के बारेमे घमण्ड कर्थी। भले तुहुरे परीक्षा और दुःखके अनुभव करथो। तभुन फेन तुहुरे धिरजतासे सहती रथो, और तुहुरे अभिन फेन येशू ख्रीष्टमे विश्वास करथो। 5 तुहुरे दुःख उठाइतो, और यहे तुहुरिन्हे परमेश्वरके राजमे जैना योग्यक बनाइत। यी बातसे यी साबित हुइत कि परमेश्वर धार्मिकतासे न्याय करहीँ। 6 परमेश्वर हरदम धार्मिकतासे न्याय करथाँ। तबेकमारे परमेश्वर उ मनैनकेमे दुःख नन्हीँ, जेने तुहुरिन्हे दुःख देले बताँ। 7 तुहुरे जेने अब्बे दुःख उठाइतो, परमेश्वर तुहुरिन्हे दुखि रहे नै दिहीँ, ओस्तेहेँके हम्रिहिन्हे फेन दुखि रहे नै दिहीँ। और यी उ समयमे हुई जब प्रभु येशू शक्तिशाली स्वर्गदूतनके संग स्वर्गमेसे अइहीँ, और आगिक लहकसे घेरल रहिहीँ। 8 जेने परमेश्वरहे नै चिहिन्थाँ, और जेने हमार प्रभु येशूक बारेमे खुशीक खबरहे स्वीकार नै करथाँ, ओइन्हे परमेश्वर दण्ड दिहीँ। 9 ओइने सदाकालके लग प्रभुसे अल्गे होजिहीँ, और हुँकार महान शक्तिमे शामिल नै हुइहीँ, और परमेश्वर ओइन्हे सदाकालके विनाशके दण्ड दिहीँ। 10 यी बात तब हुई, जब प्रभु येशू पवित्र मनैनसे महिमा पाइक लग फिर्ता अइहीँ, जेनके सम्बन्ध हुँकार संग बतिन। और प्रभु उ मनैनसे सम्मानित हुइहीँ, जेने हुँकारमे विश्वास करथाँ। और उ दिन तुहुरे फेन ओइन्मेसे रबो, जेने हुँकार महिमा करहीँ। काकरेकी तुहुरे उ बातमे विश्वास कर्लो, जोन बात हम्रे हुँकार बारेमे तुहुरिन्हे बताइल रही। 11 तबेकमारे हम्रे हरदम तुहुरिन्के लग प्राथना कर्थी, ताकि परमेश्वर तुहुरिन्हे उ जीवनके योग्य बनादिँत, जोन जीवन जिअक लग ऊ तुहुरिन्हे बलैले बताँ। ऊ अपन शक्तिसे तुहुरिन्हे डगर देखाइँत, ताकि तुहुरिन्के सक्कु मजा इच्छा और ज्या चिज फेन तुहुरे विश्वाससे करतो, उ सक्कु पूरा होजाए। 12 हम्रे यी प्राथना कर्थी कि मनै तुहुरिन्के कारण प्रभु येशू ख्रीष्टके नाउँक महिमा करिँत, और तुहुरे फेन सम्मानित हुइबो। काकरेकी तुहुरिन्के सम्बन्ध हुँकार संग बा। असिके यी कारणसे हुई, काकरेकी हमार परमेश्वर और प्रभु येशू ख्रीष्टके अनुग्रह तुहुरिन्केमे बा।