1 यी बातमे विश्वास करे सेकजाइत कि यदि केऊ मण्डलीक अगुवा बने चाहत कलेसे उ मजै काम करना चाहत। 2 तबेकमारे, यी बात खास बा कि मण्डलीक अगुवनकेमे यी गुण हुई परना जरुरी बा: ओइन्केमे कौनो दोष ना होए। ओइन्के एक्केथो किल जन्नी रहिन्। ओइने एकथो शान्त तरिकासे व्यवहार करुइया हुई परत। ओइन्के विवेक शुद्ध हुई परत। और ओइने मनैनसे आदर भेटाई सेक्ना हुई परत। ओइने अपन घरेम आइल पहुननके स्वागत करनाहाँ हुई परत। परमेश्वरके वचन मजासे सिखैनामे ओइने सिपार हुई परत। 3 ओइने मडुवा या एकथो असिन मनैया नै हुई परत, जे हरदम झगरा खेल्ती रहत। ओइने दयालु, सँस्सा करे सेक्ना और शान्त स्वभावके मनै हुई परत। वादविवाद करनाहाँ नै हुई परत। और ना ते धनके लाल्ची हुई परत। 4 ओइने अपन परिवारहे डगर देखैनामे सिपार हुई परत। और ओइने अपन छाइछावनहे असिन सिखुइया हुई परत कि हरेक बातमे आदरसे ओइने ओकर आज्ञा पालन करिँत। 5 एकथो मनैया जे अपने परिवारके प्रबन्ध मिलाई नै जानत कलेसे ऊ पक्कै फेन यी नै जानथुई कि परमेश्वरके मनैनके रेखदेख कसिके करे परत। 6 उ मनैया लावा विश्वासी ना होए। नै ते ओकरमे घमण्ड आईसेक्थिस। और उहिहे वहे दण्ड मिल्हिस, जोन दण्ड शैतानहे मिलल रहिस।

7 मण्डलीक बाहेरके मनै फेन असिके कहिँत कि ऊ मजा मनैया बा, ताकि ओकर बदनाम ना होए, और ऊ शैतानके फन्दामे ना परे। 8 ओस्तेहेँके मण्डलीक सहायक अगुवन फेन असिन मनैया हुई परत, जेकर मनै सम्मान करथाँ। ऊ इमानदार हुई परत। ऊ जाँर-दारु नै पिनाहाँ हुई परत। और ऊ असिन मनैया नै हुई परत, जे धन भेटाइक लग ज्या फेन करत। 9 और ओइन्के थेन एकथो स्वच्छ विवेक हुई परत, जब ओइने यी बातमे विश्वास कर्ती रथाँ कि परमेश्वर जोन शिक्षा प्रकट कर्ले बताँ, उ शिक्षा सच्चा बताँ। 10 जब मण्डलीक सहायक अगुवा चुनजाजाइत कलेसे आघे ओइन्हे यी साबित करे देऊ कि ओइन्के थेन सही गुण बतिन। और यदि ओइन्केमे कौनो फेन दोष नै मिल्हिन कलेसे तबजाके ओइने मण्डलीक सहायक अगुवक रुपमे काम करिँत। 11 अस्तेहेँके मण्डलीक सहायक अगुवनके जन्नीन फेन सम्मान करना लायकके हुई परत। उ जन्नी मनै दोसुर जहनके निन्दा करनाहाँ ना रहिँत। पर दोसुर जहनहे शान्त तरिकासे व्यवहार करनाहाँ हुई परत। और पूरा रुपमे भरोसा करना लायकके हुई परत। 12 मण्डलीक सहायक अगुवनहे अपन जन्नीकमे बफादार हुई परत। ऊ अपन लर्कनके संगसंगे परिवारके दोसुर सक्कु सदस्यनके फेन अगुवाई करे सेक्ना हुई परत। और ओइन्के रेखदेख करे सेक्ना हुई परत। 13 काकरेकी जेने मण्डलीक सहायक अगुवनके काम मजासे करे सेक्थाँ, ओइने मनैनसे आदर भेटैथाँ। और ओइने ख्रीष्ट येशूमे अपन विश्वासके बारेमे महा साहससे बोले सेक्थाँ।

14 मै झत्तेहेँ आके तुहुरिन्से भेँटा करना आशा करतुँ। पर मै यी सक्कु बात यहे कारणसे लिखतुँ, 15 कि यदि मै अइनामे बेर करदेनु कलेसे हम्रे जेने जित्ती परमेश्वरके मण्डली हुइती, हम्रिहिन्हे परमेश्वरके परिवारके सदस्यनके रुपमे अपन जीवन कसिके जिए परत कहिके तुँ जानलेहो। जसिके घरक जग और खम्बा घरहे सहारा देथाँ, और उहिहे बल्गर बनैले रथाँ, ओस्तेहेँके मण्डलीक विश्वासीन सच्चा शिक्षाहे सहारा देथाँ और बल्गर बनैले रथाँ। 16 और बिना शंखक हम्रे कहे सेक्थी कि उ परमेश्वरके प्रकट कर्लक शिक्षा पूरा रुपमे सच्चा बा। अर्थात

ख्रीष्ट एकथो मनैयक रुपमे यी संसारमे अइलाँ।

हुँकिन्हे पवित्र आत्मा साबित कर्लिन कि ऊ परमेश्वरके छावा हुइँत।

स्वर्गदूतनके हुँकिन्हे देख्लाँ।

मनै हुँकार बारेम हर देशमे प्रचार करलाँ।

पूरा संसारके मनै हुँकारमे विश्वास करलाँ।

और परमेश्वर हुँकिन्हे उप्पर स्वर्गमे उठालेलिन।