1 पवित्र आत्मा फरछ्वारसे कहतताँ, कि अन्तिम दिनमे आकुर मनै ख्रीष्टके शिक्षामे विश्वास करना बन्द करदिहीँ। ओइने उ छली आत्मनके शिक्षाहे स्वीकार करहीँ, जोन शिक्षा ओइन्हे भरकैथिन। और ओइने उ झूँटा शिक्षामे विश्वास करहीँ, जोन शिक्षा भूत्वनके ओहोँरसे अइथिन। 2 गलत शिक्षा देहुइयन झूँटा रथाँ। जसिके तातुल लोहेलेके जरल छालाहे कुछु महसुस नै हुइथिस, ओस्तेहेँके ओइने यी बातहे नै जन्थाँ कि ओइने ठिक करतताँ कि गलत करतताँ। 3 असिन मनै सिखैथाँ कि भोज करना और कौनो-कौनो मेरके खानाहे खैना गलत हो। पर परमेश्वर सक्कु मेरिक खाना विश्वासीनके लग बनैले बताँ, जेने उ सच्चा शिक्षाहे जन्थाँ कि धन्यवाद देके सेकके खाना खाई सेकजाइत। 4 काकरेकी परमेश्वरके बनाइल हरेक चिज मजा बा, और कौनो फेन चिज अस्वीकार करना योग्यक नै हुइँत। पर परमेश्वरहे धन्यवाद देके उहिहे स्वीकार करे परत। 5 काकरेकी उ चिज परमेश्वरके वचन और प्राथनक माध्यमसे परमेश्वरके स्वीकार करना योग्यक होजाइत।

6 यदि तुँ विश्वासी भैयनहे यी बातहे सिखैती रबो कलेसे तुँ येशू ख्रीष्टके मजा सेबक ठहरबो। और परमेश्वर तुहिन्हे विश्वास और मजा शिक्षाके माध्यमसे तालिम दिहीँ, जोन शिक्षाहे तुँ पालन करल बतो। 7 पर तुँ झूँटा कहानीमे ध्यान ना देऊ, और जोन कहानी परमेश्वरहे सम्मान नै देहत, ओसिन मूर्खता भरल कहानीमे फेन ध्यान ना देऊ। पर तुहिन्हे परमेश्वरहे आदर देना जीवन जिअक लग अपनहे अप्निहीँ हरदम तालिम देहे परत। 8 काकरेकी शरीरहे तालिम देलेसे थोरचे फाइदा हुइत। पर परमेश्वरके भक्ति कर्लेसे सक्कु बातमे फाइदा हुइत। काकरेकी अब्बे और भविष्यमे तुँ उ जीवन भेटैबो, जेकर वाचा परमेश्वर कर्ले बताँ। 9 यी बातमे विश्वास करे सेकजाइत, और यी बात स्वीकार करना योग्यक बा। 10 हम्रे यी जीवनहे भेटाइक लग संघर्ष कर्थी, और कर्रा मेहनत कर्थी। काकरेकी हमार आशा जित्ती परमेश्वरकेमे बा, जे सक्कु मनैनके मुक्तिदाता हो, और विशेष करके ओइन्के जेने हुँकारमे विश्वास करथाँ। 11 विश्वासीनहे मोरिक लिखल और आज्ञा देहल सक्कु बात सिखाऊ, और उ शिक्षा ओइने पालन करिँत।

12 तुँ दोसुर जहनहे असिके व्यवहार करो कि केऊ फेन तुहिन्हे अनादर करे ना सेके, काकरेकी तुँ जवान बतो। तोहाँर बोल्लक बोलीमे, दोसुर जहन करना तोहाँर प्रेमसे, ख्रीष्टमे रहल तोहाँर विश्वाससे और तोहाँर निर्दोष जीवनसे तुहिन्हे एकथो बरह्या नमूना बने परी। ताकि विश्वासी मनै तोहाँर अनुशरण करे सेकिँत। 13 जबसम मै वहाँ नै पुगम तबसम तुँ विश्वासीनके लग पवित्र शास्त्रहे जोरसे पह्रक लग, उत्साहा देहक लग और पवित्र शास्त्रक मतलब बुझाइक लग समय निकारो। 14 उ बातहे याद करो जब मण्डलीक अगुवन अपन हाँथ तोहाँरिक उप्पर धारल रहिँत, और तुहिन्हे तोहाँर विशेष योग्यतक बारेमे बताइक लग परमेश्वर ओइन्हे सन्देश देले रहिँत। उ योग्यताहे नै देखल हस ना करो। 15 यी बातहे साबधानीसे अभ्यास करो, और अपनहे यी बातमे पूरा रुपमे समर्पित करदेऊ। ताकि हरेक जाने यी देखे सेकिँत कि तुँ विश्वासमे बह्रतो। 16 तुँ यी विषयमे सावधान रहो कि तुँ कसिके रथो, और का शिक्षा देथो। यी बातमे स्थिर रहो, काकरेकी यदि तुँ स्थिर पलिरबो कलेसे प्रतिफलके रुपमे तोहाँरिक माध्यमसे परमेश्वर अप्निहीँ तुहिन्हे और तोहाँर शिक्षा सुनुइयनहे फेन न्यायसे बँचैहीँ।