1 कौनो मनैयाहे अपमान करके जिन दाँतो, जे तुहिन्से भारी बा; पर उहिहे अपन सग्गे बाबाहे कहे हस अनुरोध करो। और जेने तुहिन्से छुटी बताँ, उ पुरुष मनैनहे तुँ अपन सग्गे भैयक हस सल्लाहा देऊ। 2 बुह्राइल जन्नी मनैनहे तुँ असिन सल्लाहा देऊ जसिके कि ऊ तोहाँर अपन सग्गे दाई हो। और अपनसे छुटी उमेरके महिलनहे अपन सग्गे बाबु हस व्यवहार करो। और असिके स्वच्छ मनसे करहो। 3 उ विधवनहे आदर करो, जेनके थेन ओइन्के जरुरी पूरा करक लग और ओइन्के रेखदेख करक लग केऊ नै हुइतिन। 4 और यदि कौनो विधवक छाईछावा या नत्या-नतिन्यन बताँ कलेसे सक्कुहुनसे आघे ओइने अपन निजी परिवारके सदस्यनके रेखदेख करके ईश्वरीय व्यवहार देखैना सिखिँत। और ओइने अपन दाईबाबा और बुदिबुदुनके रेखदेख करके ओइन्के लग कुछु करिँत। काकरेकी परमेश्वरहे यहे मजा लग्थिन। 5 जोन विधवनके थेन ओइन्के जरुरी पूरा करक लग और ओइन्के रेखदेख करक लग केऊ नै हुइतिन, ओइने परमेश्वरकेमे अपन आशा धरथाँ। और रातदिन ओइने बिन्ती और प्राथना करके परमेश्वरसे अपन लग सहायता मंग्थाँ। 6 उ विधवन जेने अपन सारा समय सुख सुबिधामे बितैथाँ, ओइने शरीरमे ते जित्ती बताँ, पर आत्मामे मुगिल बताँ। 7 यी शिक्षा विश्वासीनहे सिखाऊ, ताकि ओइन्हे केऊ फेन दोष लगाई ना सेके। 8 पर यदि केऊ अपने सग्गे नातपाँतनहे विशेष करके अपने परिवारहे रेखदेख नै करत कलेसे यिहिसे यी साबित हुइत कि जात्तिकमे ऊ ख्रीष्टहे विश्वास नै करत, और उ मनैया अविश्वासीनसे फेन खराब हो। 9 यदि कौनो विधवक उमेर साठी सालसे धेउर बतिस कलेसे तुँ उहिहे विधवनके सूचीमे धारे सेक्थो। और उहिहे किल जे अपन थरवकमे बफादार रहल रहे। 10 और उहिहे मनै मजा कामसे चिन्हल हुइँत। उदाहरणके लग ऊ अपन छाइछावनहे मजासे पालपोष करल होए। ऊ यात्रा करुइया विश्वासीनहे अपन घरेम स्वागत करल होए। नम्रतासे दोसुर जहनके सेवा करल होए। और ऊ ओसिन मनैनहे सहायता कर्लक होए, जेने दुःखमे जीवन बिताइतिहिँत। और ऊ सक्कु मेरिक मजा काम करक लग अपनहे समर्पित करल होए। 11 पर जवान विधवनके नाउँ भर विधवा सूचीमे ना लिख्हो। काकरेकी जब ओइन्के शारीरिक इच्छा उ वाचासे धेउर बल्गर होजिहीन, जोन वाचा ओइने विधवक रुपमे ख्रीष्टके सेवा करक लग कर्ले रहिँत कलेसे ओइने फेनदोस्रे भोज करे चहिहीँ। 12 फेनदोस्रे भोज करके ओइने अपनहे दोषी ठहरैहीँ। काकरेकी ऊ अपन सुरुक वाचा पूरा नै करल। 13 और यकर संगसंगे ऊ अल्छि फेन हुई लागत, घर-घर नेङ्नाहाँ होजाइत। और ऊ अल्छि किल नै रहिजाइत, पर दोसुर जहनके चिब्ली खैनाहाँ होजाइत। और दोसुर जहनके काममे हस्तक्षेप करनाहाँ होजाइत। और असिन बात बत्वाइत, जोन बात उहिहे नै बत्वाई परना हो। 14 तबेकमारे मै सल्लाहा देहे चहथुँ कि जवान विधवन भोज करलिँत, लरका पाइँत, घरबार सम्हारिँत और अपन विरोधिनहे निन्दा करना मौका ना दिँत। 15 काकरेकी कौनो-कौनो जवान विधवन पैलेहेँ परमेश्वरसे दूर होगिल बताँ, और ओकर कारण ओइने शैतानके अनुशरण करना सुरु करदेले बताँ। 16 यदि कौनो विश्वासी जन्नीक घरेम विधवन बताँ कलेसे ओइन्के सहायता ऊ अप्निहीँ करे। ताकि ओकर बोझ मण्डलीमे ना परे, और मण्डली उ विधवनके सहायता करे सेके, जोन विधवनहे जात्तिकमे ओकर जरुरी बतिन।

17 मण्डलीक कौनो फेन अगुवनहे उचित सम्मान देहे परत, जेने अपन कामहे मजासे करथाँ। और विशेष रुपमे ओइन्हे जेने परमेश्वरके सन्देशहे सिखाइक लग और प्रचार करक लग कर्रा मेहनत करथाँ। 18 काकरेकी पवित्र शास्त्रमे असिक कहिके लिखल बा, "दाँइबेर गोरुनहे अनाज खाइक डरे ओइन्के मुहेँम मोख्री ना लगैहो।" फेनदोस्रे पवित्र शास्त्रमे असिके लिखल बा "मजदूरहे अपन मजदूरी भेटैना ओकर हक रथिस।" तबेकमारे हम्रे जन्थी कि मण्डलीक मनै अगुवनहे सहयोग करे परत। 19 कौनो फेन मण्डलीक एकथो अगुवक विरोधमे पाप कर्लक आरोपहे तबसम ना सुन्हो, जबसम दुई या तीन जाने एक्केथो बातके लग ओकरमे आरोप ना लगाइँत। 20 जेने पाप करथाँ, उ मनैनहे तुँ सक्कु विश्वासीनके आघे दँत्हो, ताकि बाँकी विश्वासीन फेन डराँइत। 21 परमेश्वर, ख्रीष्ट येशू और चुनल स्वर्गदूतनके आघे मै तुहिन्हे आदेश देहतुँ, कि तुँ केक्रो फेन झत्ते न्याय ना करहो। कौनो फेन मनैनहे और कौनो फेन काममे कौनो मेरिक भेदभाव या पक्षपात बिना कर्ले तुँ यी सक्कु नियम पालन करो। 22 जबसम कौनो मनैया अपनहे ख्रीष्टमे विश्वासयोग्य साबित नै करी, तबसम ओकर उप्पर हाँथ धारके अगुवक रुपमे उहिहे नियुक्त ना करहो। यदि तुँ असिके कर्बो कलेसे ओकर पापके लग तुँ फेन जिम्मेवार हुइबो; अनैतिक बातसे अपनहे दूर धारो। 23 आबसे पानी किल ना पिओ, पर तोहाँर पेटके लग और घनिघनी बेमार हुइलक कारण तुँ थोर-थोर अंगुरके छिप्पल रस फेन पिओ। 24 मै तुहिन्हे कहतुँ कि मण्डलीक अगुवनके नियुक्ति हड्बडाके ना करहो, काकरेकी कौनो-कौनो मनै खुल्लमखुल्ला पाप करथाँ। यहाँसम कि न्याय हुइनासे आग्गिहीँ ओइने विश्वासीनके आघे फरछ्वार रुपमे दोषी बताँ। दोसुर जहनके पाप अतरा फरछ्वार नै रथिन, और पाछेजाके किल देखा पर्थिन। 25 ओस्तेहेँके जब मनै मजा काम करथाँ, तब दोसुर विश्वासीनसे यी फरछ्वारसे देखा परत। और यदि दोसुर विश्वासी ओइन्के काम फरछ्वारसे नै देख्लेसे फेन पाछेजाके ओइने ओइन्के कामहे पता पादर्हीँ।