1 का फेनदोस्रे हम्रे अपन तारिफ अप्निहीँ करे लागल बती? का यी असिके हुई, कि दोसुर मनैनके हस हम्रिहिन्हे फेन तुहुरिन्के थेन नाने या तुहुरिन्के थेनसे सिफारिशके चिट्ठी लैजाई परी? 2 तुहुरे अप्निहीँ हमार लग सिफारिश देना चिट्ठी हस हुइतो, जोन हमार मनमे लिखल बा, जिहिहे जे फेन पह्रे सेकत, और तुहुरिन्के बिच्चेम हमार मजा कामहे जाने सेक्थाँ। 3 यी फरछ्वार बा कि तुहुरिन्के बद्लल जीवन ख्रीष्टके लिखल एकथो चिट्ठी हस हो। यी चिट्ठी ऊ हमार सेवाके माध्यमसे लिखल रहिँत, यी चिट्ठी मसीलेके ढुंगक पाटीमे नै लिखगिलस। पर जित्ती परमेश्वरके आत्मक माध्यमसे मनैनके मनके पाटीमे लिख्लक हो।

4 ख्रीष्टके ओहोँरसे हमार आश्वासन परमेश्वरमे रलक कारण हम्रे असिन बात कथी। 5 कौनो फेन काम करे सेक्ना खुबी हमारमे बा कहिके हम्रे नै कथी। पर परमेश्वर हम्रिहिन्हे यी खुबी देथाँ।

6 लावा करारके सेबक हुइक लग ऊ हम्रिहिन्हे खुबी देलाँ, यी भर पवित्र आत्मक वाचा हो, मोशक नियम कानुनके जोर्लक वाचा नै हो। काकरेकी मोशक लिख्लक नियम कानुन नै मन्नक नतिजा मृत्यु हो, पर पवित्र आत्मा जीवन देहत।

7 जब मोशक नियम कानुन देगिलस, जोन ढुंगक पाटीमे लिखल रहे, वहे समयमे परमेश्वरके महिमा देखगिलिन। इजरायल देशके मनै बहुत्ते समयसम मोशक मुहाँर हेरे नै सेक्लाँ। काकरेकी ओकर मुहाँर चम्कतिहिस, पर ओकर उ चमक धेउर बेरसम नै रलिस। तबेकमारे यदि मोशक नियम कानुनके आधारसे कर्लक सेवा मृत्यु नानत, जेम्ने उ महिमा रहे कलेसे, 8 पवित्र आत्मक सेवाके काम आकुर धेउर महिमामय होजाई। 9 काकरेकी दोषी ठहरुइया मोशक नियम कानुन महिमामय रहे कलेसे, पक्कै फेन अपन मनैनहे धर्मी बनुइया लावा करार आकुर धेउर महिमामय हुई। 10 आब लावा करारमे अइलक महिमक कारण मोशक नियम कानुनके माध्यमसे रलक उ महिमक आबसे कौनो चमक नै हुइतिस।

11 काकरेकी यदि मोशक नियम कानुनमे असिन चमक रहिस, जोन थोरिक समयक लग किल बनल रहल कलेसे लावा करारमे कतरा धेउर महिमा रही, जोन सदादिनके लग पलिरहत!

12 तबेकमारे हमार असिन आशा हुइलक कारणसे हम्रे बहुत साहसी हुइल बती। 13 हम्रे मोशा हस नै हुइती, जे अपन मुहाँरमेसे घट्टीजैना और पाछे हेराजिना महिमा इजरायल देशके मनै ना देखिँत कहिके अपन मुहाँरमे घुर्घुत दारल रहे। 14 पर ओइन्के मन कठोर होगिल रहिन। काकरेकी आझिक दिनसम पुरान करार पह्रेबेर ओइन्के मनमे वहे घुर्घुत पलिरथिन; ख्रीष्टमे विश्वास करके किल उ घुर्घुत हटाजाइत। 15 आजसम फेन मोशक किताब पह्रेबेर ओइन्के मनमे घुर्घुत दारल पलिरथिन। तबेकमारे ओइने यिहिहे पूरा रुपमे बुझे नै सेक्थाँ। 16 पर जब कौनो मनैया प्रभु येशूकमे विश्वास करत, तब ओकरमेसे उ घुर्घुत हटाजैथिस। 17 प्रभु ते आत्मा हुइँत, और जहाँ प्रभुक आत्मा रथिन, वहाँ मोशक नियम कानुनसे स्वतन्त्रता रहत। 18 पर हम्रे सक्कु जाने एकथो ऐना हस घुर्घुत नै दारल अपन मुहाँरसे परमेश्वरके महिमाहे देखैथी। परमेश्वर हम्रिहिन्हे लगातार बहर्ती रना महिमामे धेउरसे धेउर अपन हस बनाइतताँ। यी प्रभुक काम हो, जे पवित्र आत्मा हुइँत।