1 तबेकमारे जब हमारमे असिन दया हुइल, कि हम्रिहिन्हे परमेश्वरके सन्देशहे घोषणा करना सेवकाई मिलल। यहे कारणसे हम्रे हरेस नै खैथी। 2 पर हम्रे लाजके काम और नुकछुपके करना काम नै कर्थी। हम्रे छल-कपट या परमेश्वरके वचनमे मिलावट करना काम नै कर्थी। पर हम्रे परमेश्वरके आघे सच्चाई किल सिखैथी, और हरेक मनै गवाही देहे सेक्थाँ कि यी सच्चा हो। 3 यदि हमार प्रचार करना खुशीक खबर मनै बुझे नै सेकल हुइँत कलेसे, यी नाश हुइना मनैनसे नुकल बतिन। 4 और यी संसारके ईश्वर शैतान उ अविश्वासीनके बुद्धिहे आँधर बनादेले बतिन। ताकि ओइने ख्रीष्टके महिमक बारेमे खुशीक खबरमेसे अइलक ओजरारहे देखे ना सेकिँत, जोन ओजरार परमेश्वर कसिन बताँ कहिके देखाइत। 5 काकरेकी हम्रे अपने प्रचार नै कर्थी, पर ख्रीष्ट येशूए प्रभु हुइँत कना बात प्रचार कर्थी। और हम्रे भर येशूक कारण तुहुरिन्के सेबक हुइती।

6 तबेकमारे परमेश्वर कलाँ, "अंधारमेसे ओजरार चम्के।" और वहे परमेश्वर हमार मनमे ओजरार हस हम्रिहिन्हे अक्किल देलाँ, ताकि हम्रे येशू ख्रीष्टकेमे देखगिलक परमेश्वरके महिमाहे देखाई सेकी।

7 और आब हमार मनमे हमार संग रलक यी ओजरार चम्कता, पर हम्रे अप्निहीँ बहुमूल्य धन भरल कमजोर माटिक भाँरा हस बती। यिहिसे यहे बुझे सेकजाइत कि यी महान शक्ति परमेश्वरके ओहोँरसे हो, हमार ओहोँरसे नै हो। 8 मनै हम्रिहिन्हे बहुत तरिकासे लगातार सतैती रथाँ, पर परमेश्वर येशू ख्रीष्टके सन्देशहे औरे जहनहे सिखैनामे रोक्ना अनुमति नै देलाँ। हम्रे खराब परस्थितिमे का करना हो कहिके नै जन्थी, पर हम्रे असिके कबु नै कथी कि परमेश्वर हम्रिहिन्हे छोरदेले बताँ। 9 हम्रे लगातार सटागिल बती, पर परमेश्वर हम्रिहिन्हे कब्बु नै एक्केली छोरलाँ। कबुकाल मनै हम्रिहिन्हे नै मजासे अरघताहा बनादेथाँ, पर परमेश्वर हम्रिहिन्हे मुए नै देथाँ। 10 हम्रे हरदम अपन शरीरमे येशूक मुलक यादहे महसुस कर्थी, ताकि जोन काम हम्रे कर्थी ओकर माध्यमसे मनै येशूक जीवनहे देखे सेकिँत।

11 काकरेकी हम्रे जित्ती रहलमे फेन येशूक लग सदादिन मृत्युक खतरामे बती, ताकि येशूक जीवन हमार मुना शरीरमे देखा परे। 12 तबेकमारे यकर मतलब यी हो कि हम्रे लगातार मृत्युक सामना करती। पर यकर नतिजा कलक तुहुरिन्हे सदाकालके जीवन मिलल हो।

13 पर हम्रे प्रचार कर्ती रथी, काकरेकी हम्रे फेन भजनके लेखक हस विश्वास कर्ले बती। जसिके पवित्र शास्त्रमे लिखल बा, "मै परमेश्वरकेमे विश्वास कर्नु, तबेकमारे मै बोल्नु।" अस्तेहेँके हम्रे फेन विश्वास कर्थी, तबेकमारे हम्रे बोल्थी। 14 काकरेकी हम्रे जन्थी, कि जे प्रभु येशूहे मुअलमेसे जित्ती करैलाँ, वहे हम्रिहिन्हे फेन येशूक संग हकदार हुइती कहिके जिवैहीँ। और अपन आघे ठरह्वाइक लग हम्रिहिन्हे तुहुरिन्के संग नन्हीँ। 15 काकरेकी हमार सहलक यी सक्कु कष्ट तुहुरिनेके लग हो, ताकि धेउरसे धेउर मनै जाने सेकिँत कि परमेश्वर कतरा दयालु बताँ। और परमेश्वरके महिमक लग बहुत्ते मनै हुँकिन्हे धन्यवाद दिँत। 16 तबेकमारे हम्रे हरेस नै खैथी। हमार बाहेरके शरीर नाश हुइती गैलेसे फेन हमार आत्मा भर दिनदिने लावा हुइती जाइत। 17 काकरेकी अब्बेक समयमे हमार दुःख थोरचे किल बताँ, और नम्मा समयसम नै रही। काकरेकी यकर नतिजा सदाकालके महिमा हुई, जोन महिमा हमार सोँचे सेक्नासे फेन धेउर रही। 18 और हम्रे देखल चिज नै हेर्थी, पर नै देखल चिजमे ध्यान देथी। काकरेकी देखल चिज थोरिक दिनके लग किल हुइँत, पर नै देखल चिज सदादिन पलिरहत।