1 हे मोरिक विश्वासी भैयो, परमेश्वर माकेडोनिया प्रदेशके मण्डलीक विश्वासीनमे कर्लक अनुग्रहक बारेमे हम्रे तुहुरिन्हे कहे चहथी। 2 जब ओइने बहुत्ते दुःखसे परीक्षामे परलाँ, तब ओइने बहुत आनन्दित हुइलाँ। और ओइने बहुत गरीब रलेसे फेन ओइने खुल्ला मनसे दोसुर विश्वासीनहे सहयोग करक लग धनसम्पति दान करलाँ। 3 काकरेकी मै गवाही देथुँ, कि ओइने अपन देहे सेक्ना क्षमता अनुसार और देहे सेक्ना क्षमतासे फेन धेउर ओइने अपन राजीखुशीसे देलाँ। 4 ओइने यरुशलेम शहरमे रहल पवित्र मनैनहे सहायता करक लग भाग लेना मौका भेटाई कहिके हम्रिहिन्हे अनुरोध करलाँ। 5 और ओइने हमार आशा करलसे फेन धेउर करलाँ। आघे ओइने प्रभुक सेवाके लग अपनहे समर्पण करदेलाँ। ओकरपाछे ओइने परमेश्वरके ईच्छासे हमार अनुशरण करक लग अपनहे समर्पित करदेलाँ।

6 तीतस तुहुरिन्हे मजा कामके सुरुवात करवाइल। तबेकमारे हम्रे उहिहे अनुरोध कर्ली कि तुहुरे ज्या सुरु कर्ले बतो, उहिहे ओरवाइक लग ऊ तुहुरिन्हे सहायता करे। 7 पर जसिके सक्कु बातमे तुहुरे बहर्तीगिल बतो, अथवा विश्वासमे, प्रचार करनामे अथवा सिखैनामे, ज्ञानमे, सक्कु जोशमे और हम्रिहिन्हे करना तुहुरिन्के प्रेममे, ओस्तेहेँके गरीब विश्वासीनहे दान देना यी काममे फेन बहर्ती जाऊ।

8 मै यी आज्ञक रुपमे नै कनु, पर दोसुर जहनके जोशके संग तुलना करके तुहुरिन्के प्रेम कतरा सच्चा बा कहिके पता लगाइक लग मै असिके कनु। 9 हमार प्रभु येशू ख्रीष्टके अनुग्रह तुहुरिन्हे पता बा, ऊ धनी रहिँत, तभुन फेन तुहुरिन्के कारण ऊ गरीब हुइलाँ। ताकि हुँकार गरीबीसे तुहुरे धनी हुई सेको।

10,11 पोर साल तुहुरे दान देना काममे किल सक्कुहुनसे आघे नै रहो, पर असिक करना इच्छामे फेन तुहुरे सक्कुहुनसे आघे रहो। तुहुरिन्के लग सक्कुहुनसे मजा ज्या बा, ओकर बारेमे मोरिक सल्लाहा यहे बा: आब तुहुरे ज्या सुरु कर्ले बतो, उहिहे पूरा करो। शायद तुहुरे फेन यिहिहे ओरवाइक लग ओत्रैहे हौसल बतो, जतरा हौसल तुहुरे यिहिहे सुरु करेबेर रहो। और आब तुहुरिन्के थेन ज्या बा, उहिएसे यिहिहे पूरा करो। 12 काकरेकी यदि तुहुरिन्के मनमे दोसुर जहनहे दान देना विचार बा कलेसे परमेश्वर तुहुरिन्के देना क्षमतासे धेउर दानके आशा नै करथाँ।

13 दोसुर मनैनके जीवनहे सहज बनाइक लग तुहुरिन्के जीवन कर्रा होए कना मै नै चहथुँ। पर सक्कुहुनके थेन बराबर हुई परत। 14 पर बराबरीक विचारसे यी अब्बे रहल समयमे तुहुरिन्के थेन रलक धेउरमेसे ओइन्के अभाव पूरा हुइन्। ताकि भविष्यमे ओइन्के थेन रलक धेउरमेसे तुहुरिन्के अभाव पूरा होजाए। असिके सक्कु चिज बराबर होजाई। 15 जसिके पवित्र शास्त्रमे लिखल बा, "बहुत्ते बिनुइयनके थेन धेउर नै हुइलिन, और थोरचे बिनुइयनहे कमि नै हुइलिन।"

16 मै परमेश्वरहे धन्यवाद देहतुँ, जे तीतसके मनमे तुहुरिन्के लग वहे चिन्ता धारदेलाँ, जोन चिन्ता महिन्हे तुहुरिन्के लग बा। 17 जब हम्रे उहिहे तुहुरिन्के थेन जाइक लग अनुरोध कर्ली ते ऊ हमार अनुरोधहे सम्मान करल। और महा जोरसे हौसाके ऊ अपने इच्छासे तुहुरिन्के थेन गैल बा। 18 और हम्रे ओकर संग एकथो दोसुर विश्वासी भैयाहे पठाइती, जे खुशीक खबर घोषणा करना कामके लग सक्कु मण्डलीक विश्वासीनमे नामी बा। 19 और अतरा किल नै हो, पर प्रभुक महिमक लग और यरुशलेम शहरके विश्वासीनहे हम्रे सहयोग करना एकदम हौसल बती कहिके देखाइक लग यरुशलेम शहरमे दान लैजिना काममे हमार संग यात्रा करक लग मण्डलीक ओहोँरसे ऊ चुनगिल बा। 20 हम्रे यी बातमे हौश्यार रथी, कि यी खुल्ला मनसे देलक यी दानके सेवक बारेमे केऊ हम्रिहिन्हे दोष ना लगाई सेके कहिके हम्रे तीतसके संग उ विश्वासी भैयाहे पठाइती। 21 काकरेकी हम्रे प्रभुक नजरमे किल नै हो, पर मनैनके नजरमे फेन ज्या आदरके योग्य बा, उ काम मजा तरिकासे करक लग हम्रे ध्यान देथी। 22 और हम्रे तीतस और उ दोसुर विश्वासी भैयक संग कौनो दोसुर जहनहे फेन पठाइती, जिहिहे हम्रे बहुतचो जाँचके बहुत्ते बातमे हौसल भेटाइल बती। पर ओकर तुहुरिन्केमे बहुत भरोसा बतिस। तबेकमारे ऊ आकुर धेउर हौसल बा। 23 तीतस भर मोरिक संघरिया हो, और तुहुरिन्के सेवा करनामे मोरिक सहकर्मी हो। और उ दोसुर दुईथो विश्वासी भैयन मण्डलीक ओहोँरसे पठागिल बताँ, और ओइन्के जीवन ख्रीष्टके महिमक लग हुइतिन। 24 तबेकमारे तुहुरे ओइन्हे अपन प्रेम देखाऊ। और मण्डलीक सक्कु विश्वासीनहे साबित करो कि हम्रे तुहुरिन्केमे कर्लक गर्व सही हो।