15 यकर बारेमे सोँचो, हमार प्रभु धैर्यवान बताँ, ऊ तुहुरिन्हे मुक्ति भेटैना और अइना न्यायसे बँच्ना मौका देहतताँ। हमार प्रिय विश्वासी भैया पावल फेन परमेश्वर उहिहे देना बुद्धिक प्रयोग करके यी बात तुहुरिन्हे एकथो चिट्ठीमे लिखल रहे। 16 ऊ विश्वासीनहे लिख्लक ओकर सक्कु चिट्ठीमे, ऊ वहे बात लिखल, जोन बात ऊ तुहुरिन्हे लिखल रहे। पर ओकर चिट्ठीमे लिख्लक कौनो-कौनो बात बुझ्ना कर्रा बा। जोन मनै पह्रललिखल नै हुइँत, और जेने विश्वासमे पक्का नै हुइँत। ओइने यी बातहे फेन ओस्तेहेँके गलत तरिकासे व्याख्या करथाँ, जसिके ओइने पवित्र शास्त्रमे रलक दोसुर खण्डहे व्याख्या करथाँ। असिके ओइने अप्निहीँ परमेश्वरसे नाश हुइना कारण बन्थाँ।