1 जब येशू ख्रीष्ट एकथो रज्वक रुपमे राज करक लग अइहीँ। तब येशू जित्ती और मुअल दुनु मेरिक मनैनके न्याय करहीँ। तबेकमारे परमेश्वर और ख्रीष्टहे साँखीक रुपमे धारके मै तुहिन्से विनम्रतासे आग्रह करतुँ, 2 कि तुँ परमेश्वरके वचन प्रचार करो। और चाहे परस्थिति मजा रहे, चाहे खराब रहे परमेश्वरके वचन प्रचार करक लग तुहिन्हे हर समय तयार रहे परी। तुँ मनैनके गल्तीहे बतादेऊ, और ओइने पाप कर्लक कारण ओइन्हे दाँतो। पर तुँ मनैनहे उत्साहा फेन देहे परी, और तुँ यी सक्कु चिज धिरजतासे करहो, और ध्यानसे सिखैहो। 3 काकरेकी एकथो असिन समय आई, जब मनै सच्चा शिक्षाहे स्वीकार नै करहीँ। पर ओइने अपन इच्छाहे किल पूरा करहीँ। और ओइने असिन गुरुनके खोजी करहीँ, जेने ओइन्से वहे बात किल बत्वैहीन, ज्या बात ओइने सुने चहिहीँ। 4 ओइने सच्चा बात नै सुन्हीँ, पर झूँटा और बनाइल कहानीहे सुन्हीँ। 5 पर तुहिन्हे ज्या होगिलेसे फेन तुहिन्हे शान्त रहे परी। और तुहिन्हे जतरा दुःख हुइलेसे फेन तुहिन्हे सहे परी। और परमेश्वरके सेबकके रुपमे तुहिन्हे उ सक्कु काम करे परी, जोन काम ऊ तुहिन्हे करक लग देले बताँ। 6 मै तुहिन्हे यी सक्कु आज्ञा देहतुँ, काकरेकी मोरिक जीवन और मोरिक जीवनके बलिदानमेसे हुइलक परमेश्वरके काम दुनु ओराई लागल बा। और मै जन्थुँ कि झत्तेहेँ मै मुजिम। 7 जसिके एकथो सिपाही युद्धमे कबु लरना नै छोरत, ओस्तेहेँके मै फेन ख्रीष्टके लग मेहनत करना नै छोर्नु। जोन काम ख्रीष्ट महिन्हे करक लग देले रहिँत, उ कामहे मै पूरा करदेले बतुँ। मै अन्तिम समयसम विश्वासयोग्य पलिरनु। 8 आब परमेश्वर स्वर्गमे मोरिक लग एकथो ईनाम धर्ले बताँ। काकरेकी मै असिन जीवन जिअल बतुँ, जसिन जीवन हुँकिन्हे मन पर्थिन। मै अपन जीवन धार्मिकतासे जिअल बतुँ। जोन दिन ऊ फिर्ता अइहीँ, वहे दिन उ ईनाम महिन्हे परमेश्वर दिहीँ, जे धर्मी न्यायधीश हुइँत। पर ऊ महिन्हे किल ईनाम नै दिहीँ, पर उ सक्कुहुनहे दिहीँ, जेने हुँकार फिर्ता अइना असरा हेरतताँ।

9 तुँ एकदम झत्तेहेँ मोरिक थेन अइना कोशिस करहो। 10 काकरेकी डेमास यी संसारके चिजहे प्रेम करल और महिन्हे छोरदेले बा। और ऊ थेसलोनिके शहरमे चलगिलस। और क्रेसेन्स भैया गलातिया प्रदेशमे चलगिल बा। और तीतस भर दलमातिया प्रदेशमे चलगिल बा। 11 लूका किल मोरिक संग बा। और जब तुँ अइबो ते तुँ मर्कूसहे फेन अपन संग लयन्हो। काकरेकी यहाँ मोरिक सेवक काममे महिन्हे ऊ सहयोग करे सेकी। 12 पर तुखिकसहे मै एफिसस शहरमे पठाइल बतुँ। 13 और जब तुँ फिर्ता अइबो कलेसे मोरिक कोट लेके अइहो, जोन मै त्रोआस शहरके कार्पसके घरेम छोरले बतुँ। मोरिक काम लग्ना कागजात फेन लयन्हो। विशेष करके उ कागजात जोन भेँरिक छालालेके बनल बा। 14 तामा, काँसक और लोहक भाँरा बनुइया अलेक्जेन्डर महिन्हे बहुत सतैले बा। प्रभु उहिहे ओकर खराब कामके दण्ड दिहिस। 15 तुँ फेन उहिसे सावधान रहहो। काकरेकी ऊ ख्रीष्टके बारेमे हमार शिक्षक खोबे विरोध कर्ले बा। 16 जब सुरुकचो मै अदालतमे अपन बात फरछ्वाई गैल रहुँ, तब महिन्हे केऊ फेन साथ नै देहल। पर सक्कु जाने महिन्हे छोरके चलगिलाँ। यी बातके लग परमेश्वर ओइन्हे दोषी ना ठहराइन। मै प्राथना करतुँ कि यी बातके लग परमेश्वर ओइन्हे माफ कर्दिन कि ओइने महिन्हे एक्केली छोरदेलाँ! 17 पर प्रभु मोरिक संग रहिँत और ऊ महिन्हे शक्ति देलाँ। ताकि महिन्से परमेश्वरके सन्देशके घोषणा पूरा रुपमे पूरा होजाए, और वहाँ रहल सक्कु गैर-यहूदी मनै यी प्रचारहे सुने सेकिँत। और भुँखाइल सिंहनके मुहेमेसे बँचाइल हस ऊ महिन्हे मुनासे बँचैला। 18 और प्रभु महिन्हे सक्कु खराब कामसे छुटैहीँ। ऊ महिन्हे बँचाके स्वर्गमे लैजिहीँ, जहाँ ऊ रज्वक रुपमे राज करथाँ। हुँकार महिमा सदासर्वदा हुइती रहे। आमेन! (यकर मतलब हुइत, अस्तेहेँ होए।)

19 प्रिस्किला और ओकर थरवा अकिलासहे और ओनेसिफरसके परिवारहे मोरिक ओहोँरसे अभिवादन कहिदेहो। 20 इरास्तस अभिनसम कोरिन्थ शहरमे पलिबताँ, और त्रोफिमसहे मै मिलेटस शहरमे छोर्ले बतुँ, काकरेकी ऊ बेमार रहिँत। 21 जार छेँक अइनासे पैलेहेँ अइना पूरा कोशिस करहो। और यहाँ रहुइया सक्कु विश्वासी भैयन तुहिन्हे अभिवादन पठैले बताँ। और युबुलस, पुडेस, लेनस और क्लौडिया यने फेन तुहिन्हे अभिवादन पठैले बताँ। 22 मै प्राथना करतुँ कि प्रभु तोहाँर संग पलिरहिँत, और हुँकार अनुग्रह फेन तोहाँर संग पलिरहे।