1 येशू महिन्हे असिके फेन कलाँ, "एफिसस शहरके मण्डलीक स्वर्गदूतहे यी सन्देश लिखो: मै वहे हुइतुँ, जे सातथो तोरैयँनहे मोरिक हाँथेम धरथुँ। और मै वहे हुइतुँ, जे सातथो सोनक दियक दिउँतके बिच्चे-बिच्चे नेंग्थु। मै ज्या कहतुँ उहिहे सुनो: 2 तैँ का काम कर्थे कहिके महिन्हे पता बा। तैँ पूरा मेहनतसे काम कर्थे, महिन्हे विश्वास कर्लक कारण जब तुहिहे मनै सतैथाँ तब तैँ सहथे। मै जन्थुँ कि तैँ खराब मनैनके झूँटा शिक्षाहे नै सहथे। तैँ ओइन्हे जाँचल बते, जेने अपन्हे निउतरह्या हुइतुँ कहिके कथाँ। पर जात्तिकमे ओइने नै हुइँत, और ओइन्हे तैँ झूँटा भेटैले। 3 तैँ धीरजसे दुःखहे सहल बते। काकरेकी तैँ महिन्हे विश्वास कर्थे, और तभुन फेन मोरिकमे तोरिक विश्वास पक्का बा। 4 पर महिन्हे तुहिसे यी गुनासो बा: आब तैँ महिन्हे ओसिके प्रेम नै कर्थे, जसिके तैँ महिन्हे तब करिस, जब तैँ सुरुमे महिन्हे विश्वास करल रहिस। 5 आब तैँ ओसिके नै जिअथुइते, जसिके तैँ सुरुवातमे जिअतिहिस। ओकर बारेमे सोँच। आब, तैँ अपन मन बदलके पाप करना छोरदे। और उ कामहे करना सुरु करदे, जोन काम तैँ सुरुवातमे करतिहिस। यदि तैँ अपन मन बदलके पाप करना नै छोर्बे कलेसे मै तोरिक थेन अइम। और जहाँ तोरिक दियक दिउँत धारल बा, वहाँसे उहिहे हटाके मै तुहिहे दण्ड देहम। 6 पर मै तुहिसे खुशी फेन बतुँ, काकरेकी तैँ फेन उ मनैनके कामहे ओस्तेहेँके घृणा कर्थे, जेने निकोलाइटस*के समूहक शिक्षाहे अनुशरण करथाँ। जसिके मै ओइन्के कामहे घृणा करथुँ। 7 प्रत्येक मनै जेने मोरिक सन्देशहे बुझे चहथाँ, ओइने उ बातहे ध्यानसे सुने परत। जोन बात पवित्र आत्मा मण्डलीनहे कथाँ: जोन मनै जीत हाँसिल करहीँ, ओइन्हे मै जीवन देना रुख्वामेसे फारा खैना अधिकार देहम। जोन रुख्वा परमेश्वरके बगियामे बतिन।"

8 येशू महिन्हे असिके फेन कलाँ, "स्मुर्ना शहरके मण्डलीक स्वर्गदूतहे यी सन्देश लिखो: सक्कु चिजके सुरुवात करुइया महिँ हुइतुँ। और मै वहे हुइतुँ, जे सक्कु चिजके अन्त्य कराई: मै एकचो मुगिल रहुँ। पर आब मै जित्ती बतुँ, और हरदम जित्ती रहम। मै ज्या कहतुँ उहिहे सुनो: 9 मै जन्थुँ कि तैँ सतागिल बते और तैँ गरीब बते। पर आत्मिक मामलामे तैँ गजब धनी बते। मै ओइन्हे चिहिन्थुँ जेने यहूदी हुइती कहिके दाबी करथाँ। पर ओइने सच्चा यहूदी नै हुइँत। ओइने तोरिक बारेमे खराब बात बत्वैथाँ। पर जात्तिकमे ओइने उ समूहक सदस्य हुइँत, जोन समूह शैतानके हुइतिस। 10 उ दुःखसे ना डरा जोन दुःख तुहिहे मिली। शैतान तुहुरिन्मेसे गोड्गात मनैनहे दोसुर मनैनसे गिरफ्तार करवाई, और तुहुरे झेलमे दरवा पैबो, ताकि ओइने तुहुरिन्के जाँच करे सेकिँत। तुहुरे दस दिनसम बरे समस्यक अनुभव कर्बो। पर मोरिकमे पक्कासे विश्वास लगातार करल पलिरहो, चाहे ओइने तुहुरिन्हे मुवादारिँत। काकरेकी मै तुहुरिन्के जित्लक ईनामके रुपमे सदाकालके जीवन देहम। 11 प्रत्येक मनै जेने मोरिक सन्देशहे बुझे चहथाँ, ओइने उ बातहे ध्यानसे सुने परत। जोन बात पवित्र आत्मा मण्डलीनहे कथाँ: जोन मनै जीत हाँसिल करहीँ। ओइन्हे दोसुर मृत्युसे *कुछु नोकसान नै हुइहिन। जब परमेश्वर अन्तिम न्याय करहीँ।"

12 येशू महिन्हे असिके फेन कलाँ, "पर्गामम शहरके मण्डलीक स्वर्गदूतहे यी सन्देश लिखो: मै वहे हुइतुँ जेकर थेन दुनु ओहोँर चोखुर रहल तरवाल बा। मै ज्या कहतुँ उहिहे सुनो: 13 महिन्हे पता बा कि तैँ उ शहरमे रथे, जहाँ शैतान राज करत। तैँ मोरिकमे विश्वासयोग्य पलिरले, और महिन्हे विश्वास करना कबु नै छोर्ले। तैँ उ समयमे फेन विश्वास कर्ले, जब ओइने मोरिक बारेमे मनैनहे विश्वासयोग्यतासे बतुइया एन्टिपासहे वहाँ मुवाँदरलाँ जहाँ शैतान राज करत। 14 पर महिन्हे तुहिसे यी गुनासो बा, काकरेकी तैँ उ मनैनके विरोध नै कर्थे जेने तोरिक मण्डलीमे झूँटा शिक्षा देथाँ। जसिके बालाम अगमवक्ता गैल समयमे सिखाइल रहे। बालाम अगमवक्ता बालाक रज्वाहे इजरायलके मनैनहे पाप करवाइक लग कसिके उक्साई सेकजाई कहिके सिखाए। ऊ ओइन्हे मूर्तिनहे चह्राइल खैना चिज खाई और व्यभिचार करके जिए सिखाइल। 15 ओस्तेहेँके, तुहुरिन्के बिच्चेम गोड्गात मनै बताँ, जेने निकोलाइटसके समूहक शिक्षाहे अनुशरण करथाँ। 16 तबेकमारे तुहिहे अपन मन बदलके पाप करना छोरे परी। यदि तैँ असिन काम करना बन्द नै कर्बे कलेसे मै झत्तेहेँ अइम। और ओइन्के विरोधमे जेने गलत शिक्षा देथाँ, मै उ तरवालसे लरम जोन मोरिक मुहेमसे निकरत, जोन मोरिक वचन हो। 17 प्रत्येक मनै जेने मोरिक सन्देशहे बुझे चहथाँ, ओइने उ बातहे ध्यानसे सुने परत। जोन बात पवित्र आत्मा मण्डलीनहे कथाँ: जोन मनै जीत हाँसिल करहीँ, ओइन्हे मै उ मन्नमेसे कुछु चिज देहम, जोन चिज नुकल बा। मै ओइन्मेसे प्रत्येक जहनहे एकथो उज्जर पठरा फेन देहम, जेम्ने एकथो लावा नाउँ लिखल हुई। जोन मनैया उहिहे भेटाई, उहिहे छोरके बाँकी केऊ फेन उ नाउँहे जाने नै सेकी।"

18 येशू महिन्हे असिके फेन कलाँ, "थिआटिरा शहरके मण्डलीक स्वर्गदूतहे यी सन्देश लिखो: यी सन्देश परमेश्वरके छावक ओहोँरसे हो। जेकर आँखी आगिक मोँजा हस बतिन। और जेकर गोरा आगिक भट्ठीमे धिकैती रहल काँस हस चम्कतिहिन। ऊ ज्या कहतताँ उहिहे सुनो: 19 मै जन्थुँ कि तुहुरे एकदोसर जहनहे प्रेम करथो। और तुहुरे महिन्हे पक्कासे विश्वास करथो। मै जन्थुँ कि तुहुरे कसिके एकदोसर जहनहे सहायता कर्ले बतो। और तुहुरिन्के सहना क्षमता फेन जन्थुँ। मै जन्थुँ कि तुहुरे आब यी मजा काम उ समयसे धेउर करतो, जब तुहुरे महिन्हे सुरुमे विश्वास कर्ले रहो। 20 पर महिन्हे तुहुरिन्से यी गुनासो बा: कि तुहुरे उ ईजेबेल कना जन्नी मनैयाहे झूँटा शिक्षा फैलाई देथो। ऊ कहत कि ऊ एकथो अगमवादी हो। पर ऊ अपन शिक्षामे मोरिक मनैनहे व्यभिचारके पापमे शामिल हुइक लग और मूर्तिनहे चह्राइल खाना खाइक लग बहकाइत। 21 मै उहिहे मन बदलके पाप करे छोरना मौका देले बतुँ। पर ऊ अपन व्यभिचारके काम छोरना नै चाहत। 22 तबेकमारे मै उहिहे बेमार बनादेहम। और ओकर संग व्यभिचारमे शामिल होउइयन सक्कु जाने यदि अपन मन बदलके पाप करना नै छोरहीँ कलेसे ओइने डरलग्तिक दुःख भेटैहीँ। 23 मै ओइन्हे मुवादेहम, जेने ओकर शिक्षक अनुशरण करथाँ। तब सक्कु मण्डलीनके जानलिहीँ कि मै वहे हुइतुँ, जे हरेक मनैनके विचार और उद्देश्यहे जन्थुँ। मै तुहुरिन्मेसे हरेक जहनहे ओइन्के काम कर्लक अनुसार ईनाम देहम। 24,25 पर थिआटिरा शहरमे तुहुरे बाँकी रहल मनै उ झूँटा शिक्षक अनुशरण नै कर्लो। तुहुरे उ शिक्षाहे सिखे नै चहथो जिहिहे शैतानके ज्ञान कहिके कहिजाइत। मै तुहुरिन्हे कहतुँ कि कौनो दोसुर खास आज्ञा मै तुहुरिन्केमे नै लादम। यकर बाहेक कि जबसम मै नै अइम तबसम तुहुरे महिन्हे पक्कासे विश्वास करल पलिरहो। 26,27 जोन मनै जीत हाँसिल करहीँ, और जेने यी संसारके अन्त्य नै हुइतसम मोरिक आज्ञा पालन कर्ती रहिहीँ। ओइन्हे मै जाति-जातिनमे राज करक लग वहे अधिकार देहम जसिके मोरिक बाबा महिन्हे देले बा। ओइन्के राज लोह हस बल्गर रहिहीन, जोन नै टुटट्। और ओइन्के दुश्मन माटिक भाँरा हस नाश होजिहीन। 28 ओइन्के जीत हुइल बतिन कहिके देखाइक लग मै ओइन्हे भिन्सर्या तोरैयाँ देहम। 29 प्रत्येक मनै जेने मोरिक सन्देशहे बुझे चहथाँ, ओइने उ बातहे ध्यानसे सुने परत, जोन बात पवित्र आत्मा मण्डलीनहे कथाँ।"